ម្ដងនេះ យឹម តាស្រង់ឆ្លើយចំពោះចម្ងល់ថា ពេលណាធ្វើបទកាចៗឲ្យ ព្រាប សុវត្ថិ

2021-10-18 03:17:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយបានមករួមរស់ជាមួយ Galaxy Navatra លោក ព្រាប សុវត្ថិ ក្នុងនាមជាកំពូលតារា ផលិតកម្មបានធ្វើបទជាច្រើនរួចមកហើយ ហើយក៏មានបទមិនតិចដែរ ដែលទទួលបានការគាំទ្រខ្លាំងដូចជាបទ "ពេលណាជួបគេម្ដងទៀត" ជាដើម។ ប៉ុន្តែក្នុងចំណោមនោះ គេមិនទាន់ឃើញមានបទតុងខ្ពស់ ដែលជាសក្ដានុពលរបស់លោកកាលពីអតីតកាលនោះទេ។

ចំពោះបញ្ហានេះ ប្រិយមិត្តជាច្រើនបានចោទជាសំណួរទៅថ្នាក់ដឹកនាំ Galaxy ថាពេលណា ទើបធ្វើបទមួយប្រភេទដែលពួកគេហៅថា ជាបទ "កាចៗ" ឬ ប្រភេទបទតុងខ្ពស់នោះ។ លោក យឹម តាស្រង់ ដែលជាអ្នកគ្រប់គ្រងទូទៅ បានលើកឡើងថា Galaxy Navatra មានផែនការច្រើនសម្រាប់កំពូលតារាចម្រៀងប្រុស ក៏ដូចជាតារាចម្រៀងផ្សេងទៀតក្នុងផលិតកម្ម។

យ៉ាងណា ក្នុងតំណាក់កាលបន្ទាប់នេះ ផលិតកម្មកំពុងរៀបផែនការមួយចំនួនសម្រាប់លោក ព្រាប សុវត្ថិ។ ដោយឡែក ឆ្លើយតបទៅនឹងចម្ងល់របស់ក្រុមអ្នកគាំទ្រកំពូលតារាចម្រៀងប្រុស ក៏ដូចជាផលិតកម្ម លោកថា លោកដឹង អ្នកគាំទ្រកំពុងទន្ទឹងរង់ចាំអ្វីដែលពួកគេធ្លាប់ស្ដាប់ ហើយនោះជារឿងអតីតកាលដែលក្រុមអ្នកគាំទ្រធ្លាប់មានជាមួយអាយដលរបស់ពួកគេ។

យ៉ាងណា លោកថា លោកចង់ផ្ដល់រសជាតិថ្មីទៀត ទៅអ្នកគាំទ្ររបស់លោក ព្រាប សុវត្ថិ នាពេលបច្ចុប្បន្ន។ ដូចនឹងពាក្យថា អភិរក្ស តែក៏មិនភ្លេចអភិវឌ្ឍ យឹម តាស្រង់ បញ្ជាក់ថា ប្រិយមិត្តនឹងបានឃើញ និងទទួលយកបន្តិចម្ដងៗ ចំពោះ ព្រាប សុវត្ថិ នាពេលបច្ចុប្បន្ន និងតទៅអនាគត។ បែបនេះក្ដី ប្រភេទបទរសជាតិដែលប្រិយមិត្តធ្លាប់ទទួលបានពីអតីតកាល ក៏នឹងមានដូចគ្នា។

“និយាយទៅ មានបង នឹងមាន...តែខ្ញុំមិនអាចនិយាយថា ថ្ងៃនេះ ឬថ្ងៃណាទេ ប៉ុន្តែវានឹងមានខ្លះ…!”។ យឹម តាស្រង់ បញ្ជាក់។

គិតមកដល់ពេលនេះមានរយៈពេល ១ឆ្នាំហើយ ដែលលោក ព្រាប សុវត្ថិ បានមករួមរស់ជាមួយ Galaxy Navatra របស់អ្នកឧកញ៉ា ឡេង ណាវ៉ាត្រា។ ក្នុងរយៈពេលនេះ ផលិតកម្មបានធ្វើបទឲ្យលោកជាច្រើន ពិសេសអំឡុងបុណ្យចូលឆ្នាំប្រពៃណីជាតិខ្មែរឆ្នាំនេះ ត្បិតថា កម្មវិធីប្រពៃណីមិនបានប្រារព្ធឡើង ដោយសារ កូវីដ១៩ ប៉ុន្តែលោក ព្រាប សុវត្ថិ គេឃើញចេញបទដូចទឹកបាក់ទំនប់ ដើម្បីអបអរ និងបម្រើអារម្មណ៍អ្នកគាំទ្រក្នុងពិធីបុណ្យប្រពៃណីខ្មែរនេះ។

បទទាំងនោះ សុទ្ធជាប្រភេទប្រជាប្រិយ ហើយសុទ្ធតែទទួលបានការគាំទ្រខ្លាំងមិនធម្មតា។ ក្រៅពីនេះ លោកក៏មានបទមនោសញ្ចេតនាជាច្រើនបទទៀត ក្នុងនោះបទទាំងមានបទ "ពេលណាជួបគេម្ដងទៀត" “ស្ដាយអារម្មណ៍" ជាដើម សុទ្ធជាបទដែលទទួលបានការគាំទ្រខ្លាំង ដោយលោកមិនចាំបាច់ស្រែកខ្លាំងឲ្យរំខានដល់បំពង់ក។

ចំណុចនេះ ហើយ យឹម តាស្រង់ ប្រិយមិត្តផ្ដើមទទួលបានរសជាតិថ្មីរបស់លោក ព្រាប សុវត្ថិ នាពេលបច្ចុប្បន្ន ហើយពួកគេនឹងទទួលបានអារម្មណ៍ថ្មីៗទៀតនាពេលខាងមុខ។ ប៉ុន្តែយ៉ាងនេះ លោកបញ្ជាក់ដដែលថា អភិវឌ្ឍ ក៏មិនភ្លេចអភិរក្សដែរ៕

តោះ...រំលឹកបទល្បីខ្លាំងរបស់ ព្រាប សុវត្ថិ ក្នុង Galaxy ទាំងអស់គ្នា!