Pub ធ្វើពីកុងតឺន័រដំបូងគេបង្អស់កំពុងតែពេញនិយម

2016-04-07 16:07:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ធ្លាប់តែឃើញកុងតឺន័រគៗគ្នានៅកំពង់ផែ ពេលនេះឃើញគេយកកុងទីន័រមកធ្វើ Pub នៅចំកណ្តាលរាជធានីភ្នំពេញ ។ K-Race គឺជាហាងកុងតឺន័រដំបូងបង្អស់នៅកម្ពុជា ដែលធ្វើឡើងពីការផ្គុំកុងតឺន័រជាច្រើនលាបពណ៌ស្រស់ទាក់ភ្នែក នៅលើផ្ទៃដីប្រមាណ២០០ម៉ែត្រការ៉េ។

ចាប់ផ្តើមបើកដំណើរការនៅចុងឆ្នាំ២០១៥នេះ តែមានភ្ញៀវចូលមិនដាច់ ។ អាចនិយាយបានថាមនុស្សភាគច្រើនចាប់អារម្មណ៍ចង់ចូលភ្លាមពេលបានឃើញ K-RACE ដោយសារការរចនាមិនធម្មតា តែស្រស់ស្អាត ។

លក្ខណៈពិសេសខុសគេមិនធ្លាប់មានមួយទៀតនោះ គឺគំនិតច្នៃប្រឌិតប្លែកៗនឹកស្មានមិនដល់ នៃការរចនាផ្ទៃខាងក្នុង ដែលរួមមានការកែច្នៃធុងសាំងដែក និង កង់ឡាន កង់ម៉ូតូ ធ្វើជាកៅអីអង្គុយ យកដែកប៉ារ៉ាសឡានធ្វើឆាកតន្ត្រី យកគ្រឿងខ្ចៅខ្ចង សោឡានបិទព្រោងព្រៀតនៅតាមជញ្ជាំង ដែលមើលទៅហាក់ដូចជាពិភពមនុស្សយន្ត។

ប្រសិនបើអ្នកបានចូល Pub នេះ មិនត្រូវខកខានចូលបន្ទប់ទឹកនោះទេ ព្រោះសូម្បីតែបន្ទប់ទឹក ក៏មានការតុបតែងពិសេសដែរ ដោយគេបានយកកង់ឡានធ្វើជាចានសម្រាប់លាងដៃ និង បំពង់ចាក់សាំងជាក្បាលរ៉ូប៊ីនេទឹក ។

អ្វីដែលកាន់តែធ្វើឲ្យប្លែកអារម្មណ៍ទៀតនោះ គឺ Pub មួយនេះ បានដាក់តាំងមនុស្សយន្តធំមួយនៅមាត់ទ្វារចូលសម្រាប់និយាយស្វាគមន៍ភ្ញៀវ និង មានការតាំងបង្ហាញឡានទំនើប ម៉ូតប្លែកៗ ដែលធ្វើឲ្យភ្ញៀវមួយចំនួនឃើញហើយទប់ចិត្តមិនថតរូបមិនបាន។

K-Race មិនត្រឹមតែមានការទាក់ទាញខ្លាំងនៅពេលរាត្រី ដោយសារពន្លឺភ្លើងចែងចាំងចម្រុះ ពណ៌នោះទេ តែប្រព័ន្ធសំឡេង និងការប្រគំតន្ត្រី Live band ក៏ទំនើប រំពងល្អណាស់ដែរ ។

ប្រសិនបើភ្ញៀវមិនចង់ស្តាប់ការប្រគំតន្ត្រីសំឡេងខ្លាំងៗ ភ្ញៀវក៏អាចអង្គុយនៅសួនខាងក្រៅ ក្រោមពន្លឺព្រះចន្ទ ជជែកគ្នាលេង គយគន់រថយន្តទំនើប និងម៉ូតូម៉ូតប្លែកៗ ស្តាប់តន្ត្រីស្រាលៗ។

មិនខុសពី Pub ឯទៀតទេ K-Race ក៏តែងរៀបចំកម្មវិធីពិសេសដូចជា Lady Night, Happy Hours ហើយយើងក៏ឃើញមានភ្ញៀវខ្លះបានធ្វើខួបកំណើរផ្លុំទៀន កាត់នំជួបជុំមិត្តភក្តិនៅទីនោះផងដែរ ។

ប្រិយមិត្តគិតថា Pub កុងតឺន័រមួយនេះ ឡូយគួរឲ្យចង់ចូលដែរទេ?

K-Race មានទីតាំងនៅខាងលិចក្រុមហ៊ុនម៉ូប៊ីថែល ចម្ងាយប្រមាណ៤០០ម៉ែត្រពីវិមានឯករាជ្យ៕

អត្ថបទ៖ លីដា

រូបថត៖ ផ្តល់ឲ្យ