Sabay FC ធ្វើបានល្អជាងជើងទី១ ក្នុងការប្រកួតជាមួយមហាហង្សយប់មិញ

2017-07-15 03:39:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ Sabay FC នាយប់មិញនេះ ធ្វើបានល្អក្នុងការប្រកួតមិត្តភាពជាមួយក្រុមបាល់ទាត់មហាហង្សនាយប់មិញនេះនៅទីលានបាល់ទាត់របស់ក្រុមកីឡាបាល់ទាត់ វេសស្ទើន បើទោះលទ្ធផលបញ្ចប់ ៣ ទល់ ១ក្ដី។ នេះបើតាមប្រធានក្រុម។

នៅក្នុងការប្រកួតយប់មិញ ៣០នាទីដំបូងក្នុងតង់ទី១ ក្រុមទាំងពីរមានឱកាសទៅវិញទៅមក ប៉ុន្តែមិនមាននរណាធ្វើបានសម្រេចទេ។ លុះសល់១០នាទីចុងក្រោយ មហាហង្ស ធ្វើបានសម្រេចដល់ទៅ ៣គ្រាប់។ ដូច្នេះបញ្ចប់តង់ទី១ គឺមហាហង្ស នាំមុខ Sabay FC ៣ ទល់ ០។

ចូលមកដល់តង់ទី២ ការប្រកួតកាន់តែតានតឹង ខណៈ Sabay បានសម្រុក ហើយមហាហង្សដែលគាំទ្រដោយកីឡាករនាំលេង (Play Maker) ហេង នរៈកក្កដា ក៏វាយបកជារឿយៗ បង្កជាការព្រួយបារម្ភដល់ក្រុមស្ថាប័នព័ត៌មានមួយនេះដែរ។

យ៉ាងនេះក្ដី នៅសល់ប្រមាណ១០នាទីចប់ការប្រកួត Sabay FC រកបានមួយគ្រាប់វិញ ក្រោយខ្សែប្រយុទ្ធ ឌុំ វណ្ណៈគំនិត បានលោតឆ្កឹះបាល់ផុតដៃអ្នកចាំទីចូលទីបានសម្រេច បន្ទាប់ពីការតែតទម្លាក់យ៉ាងល្អ របស់កីឡាករ សេង ឡុង ជាខ្សែបម្រើ និងជាប្រធានក្រុម។ ជារួម ក្រុមទាំងពីរបានយកឈ្នះគ្នាម្នាក់មួយតង់។ ប៉ុន្តែមហាហង្សរកបានគ្រាប់បាល់ច្រើនជាងហើយឈ្ន ៣ ទល់ ១ ចប់ការប្រកួត។

បើទោះជាបរាជ័យ ប៉ុន្តែប្រធានក្រុម Sabay FC កីឡាករ សេង ឡុង បានសម្ដែងការពេញចិត្តចំពោះទម្រង់លេងរបស់ក្រុមទាំងមូល។ លោកថា ការប្រកួតយប់មិញនេះ កីឡាករគ្រប់តំណែងលេងបានល្អ និងយល់ចិត្តគ្នាជាងការប្រកួតជើងទី១។ ម្យ៉ាងកីឡាករក្នុងក្រុមទាំងអស់ ហាក់ផ្ដើមសុំានឹងទីលានធំ(ស្ដង់ដា) ដោយមុនមកជួបជាមួយមហាហង្សទាំងពីរជើង គឺ Sabay FC មិនដែលលេងទីលានធំស្ដង់ដាបែបនេះឡើយ ដោយធ្លាប់តែលេងតារាង Fusal ។

ដូច្នេះហើយ លោក សង្ឃឹម និងមានជំនឿថា ក្រុមរបស់លោក នឹងអាចធ្វើបានល្អទៀត សម្រាប់ការប្រកួតបន្តបន្ទាប់នៅលើទីលានស្តង់ដាបែបនេះនាពេលខាងមុខ។ ដោយឡែកខាងមហាហង្ស ក៏បានឲ្យដឹងដែរថា មហាហង្សបានបាត់បង់កីឡាករល្អៗមួយចំនួន សម្រាប់ការប្រកួតយប់មិញនេះ។ ប៉ុន្តែយ៉ាងណាក៏ដោយ លទ្ធផលជ័យជំនះ ៣ ទល់ ១ ក្រុមទាំងមូលនៅតែពេញចិត្ត ព្រោះការប្រកួតនេះ សំខាន់បំផុតគឺមិត្តភាពប៉ុណ្ណោះ៕