ឆ្នាំមុននិងឆ្នាំនេះ សៀន សុភក្ត្រា ស៊ុតចូលបឹងកេតដូចគ្នា តែលទ្ធផលផ្សេងគ្នា
- 2020-08-04 08:07:31
- ចំនួនមតិ 0 | ចំនួនចែករំលែក 0
ឆ្នាំមុននិងឆ្នាំនេះ សៀន សុភក្ត្រា ស៊ុតចូលបឹងកេតដូចគ្នា តែលទ្ធផលផ្សេងគ្នា
ចន្លោះមិនឃើញ
ក្នុងការប្រកួតដណ្ដើមពានរង្វាន់លីគកំពូលកម្ពុជារដូវកាលមុន សៀន សុភក្ត្រា បានស៊ុតចូលបឹងកេត១គ្រាប់ ជួយឱ្យក្រុមម្ចាស់ផ្ទះអគ្គិសនីកម្ពុជាឈ្នះ១-០។ យ៉ាងណារដូវកាលឆ្នាំ២០២០ ក្នុងសប្ដាហ៍ទី១០ទើបបញ្ចប់កាលពីពេលថ្មីៗ គេក៏បានស៊ុត១គ្រាប់ដែរ ប៉ុន្តែត្រូវចាញ់ក្រុមភ្ញៀវបឹងកេតក្នុងលទ្ធផល ២-៤។
លទ្ធផលចាញ់ ២-៤ នេះ ខ្សែប្រយុទ្ធពាក់លេខ១១ បានបង្ហាញអារម្មណ៍សោកស្ដាយ ដែលមិនអាចជួយក្រុមឱ្យឈ្នះក្លឹបជើងឯកលីគកំពូលកម្ពុជា៣សម័យកាលដូចឆ្នាំមុន ប៉ុន្តែគេក៏មានការសប្បាយចិត្ត ព្រោះបានបំប៉ោងសំណាញ់ទី ក្រុមខ្លាំងសំបូរដោយកីឡាករខ្មែរបរទេសល្អៗ។
ខ្សែប្រយុទ្ធមុតស្រួចរបស់ក្លឹបអគ្គិសនីកម្ពុជា បានពន្យល់ថា ៖«ខ្ញុំមានអារម្មណ៍ថារំភើប ពេលបានទាត់ចូលក្រុមខ្លាំងអ៊ីចឹង ព្រោះអីកន្លងមកការប្រកួតរដូវកាលមុននៅទឹកដីអគ្គិសនី ខ្ញុំក៏បានទាត់ចូល១គ្រាប់ដែរ ជួយឱ្យអគ្គិសនីឈ្នះ ១-០ ហើយនៅពេលរដូវកាលនេះនៅទឹកដីអគ្គិសនីដូចគ្នា ខ្ញុំក៏បានទាត់ចូល១គ្រាប់ទៀត អឺ...ខ្ញុំមានអារម្មណ៍រំភើប ហើយក៏រៀងសោកស្ដាយ ពេលមិនអាចជួយក្រុមឱ្យទទួលលទ្ធផលល្អ»។
សុភក្ត្រា យល់ឃើញក្លឹបបាល់ទាត់អគ្គិសនីកម្ពុជារងសម្ពាធច្រើន ព្រោះបឹងកេតសំបូរកីឡាករខ្មែរបរទេសល្អៗ ចំណែកការលេងជាក្រុម និងឯកជនរបស់ពួកគេ មានភាពសង់តង់គ្នា និងច្បាស់លាស់ ជាពិសេសគឺការបញ្ចប់ទី។
ទោះបីជាយ៉ាងណា អតីតជម្រើសជាតិកម្ពុជាក្រោមអាយុ១៩ AFC U-19 Championship មិនគិតអ្វីច្រើនឡើយ ក្រៅតែពីការខំប្រឹងប្រែងប្រជែងជាមួយដៃគូលើទីលានប៉ុណ្ណោះ។
សៀន សុភក្ត្រា បានស៊ុតបញ្ចូលទីគ្រាប់ទី២លើក្រុមបឹងកេតនៅនាទី៣៥ នាំមុខក្រុមភ្ញៀវ ២-១ បន្ទាប់ពីកីឡាករលេខ២៩ ចន្ថា ចន្ទាកា ស៊ុតគ្រាប់តាមស្មើនៅនាទី២៩។ រដូវកាលនេះ គេទើបរកបានតែ២គ្រាប់ប៉ុណ្ណោះ គឺស៊ុតចូលអង្គថាយហ្គឺរ និងបឹងកេត៕