នៅថ្ងៃទី២៥ ខែកុម្ភៈ ឆ្នាំ​២០២៤ ក្នុងប្រទេស​កម្ពុជា មានរៀបចំ​ការបោះឆ្នោត​ជ្រើសតាំង​សមាជិកព្រឹទ្ធសភា នីតិកាលទី៥ ដែលធ្វើឡើងរៀងរាល់ ៦ឆ្នាំម្តង។ ព្រឹទ្ធសភា​ មានចំនួន​សមាជិកស្មើនឹង​ពាក់កណ្តាល​នៃ​ចំនួន​សមាជិករដ្ឋសភា​ទាំងមូល។

-សមាជិក ២រូប ត្រូវបានចាត់តាំង​ដោយព្រះមហាក្សត្រ។

-សមាជិក ២រូប ត្រូវបាន​រដ្ឋសភា ជ្រើសតាំងតាមមតិភាគច្រើន។

-សមាជិកឯទៀត ត្រូវជ្រើសតាំងដោយ ការបោះឆ្នោតអសកល ពោលគឺ​ជាការ​បោះឆ្នោត​នៅថ្ងៃម្សិលមិញនេះតែម្តង ដោយអ្នកបោះឆ្នោត និងអង្គបោះឆ្នោត គឺ​ជាតំណាងរាស្រ្ត​ក្នុងតំណែង និងសមាជិក​ក្រុមប្រឹក្សាឃុំសង្កាត់​ទាំងអស់​ក្នុងតំណែង នៅក្នុងក្របខណ្ឌ​នៃភូមិភាគនីមួយៗ។

សម្រាប់ការបោះឆ្នោតព្រឹទ្ធសភា ក្នុងឆ្នាំ២០២៤នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានផ្តល់សុពលភាព​លើបញ្ជីបោះឆ្នោត​ជាផ្លូវការ ដែលមានឈ្មោះអ្នកបោះឆ្នោត​សរុបចំនួន ១១ ៧៤៧នាក់ ក្នុងនោះ តំណាងរាស្រ្ត ១២៥នាក់ និងសមាជិកក្រុមប្រឹក្សាឃុំសង្កាត់ ក្នុងតំណែង ១១ ៦២២នាក់ និងមានការិយាល័យបោះឆ្នោត​សរុបចំនួន ៣៣ការិយាល័យ។ នេះបើតាមសេចក្តីប្រកាស​ព័ត៌មានរបស់ គ.ជ.ប។

គណបក្សនយោបាយ​ឈរឈ្មោះបោះឆ្នោត​​ ត្រូវ​ធ្វើបញ្ជីរាយនាមបេក្ខជនពេញសិទ្ធិ​ស្មើនឹង​ចំនួនអាសនៈ​នៃភូមិភាគ​នីមួយៗ និងបេក្ខជន​បម្រុង​ មានចំនួន​ស្មើនឹង​បេក្ខជន​ពេញ​សិទ្ធរៀបតាម​លំដាប់លេខរៀង ដូចជាការរៀបចំ​បញ្ជី​បេក្ខជន​តំណាងរាស្រ្តដែរ។ បេក្ខជន ត្រូវមាន​អាយុយ៉ាងតិច ៤០ឆ្នាំ។

សូម​ជម្រាប​ថា មណ្ឌលបោះឆ្នោត​ ត្រូវរៀបចំ និងបែងចែកជា ៨ភូមិភាគ។ អាសនៈ​នៅក្នុងព្រឹទ្ធសភា​ដែលត្រូវបោះឆ្នោត​ជ្រើសតាំង ត្រូវកំណត់ត្រឹម​ចំនួន ៥៨ ដោយបែងចែកតាមភូមិភាគដូចខាងក្រោម៖

-ភូមិភាគទី១ រាជធានីភ្នំពេញ មាន ៦អាសនៈ

-ភូមិភាគទី២ ខេត្តកំពង់ចាម និងខេត្តត្បូងឃ្មុំ មាន ៨អាសនៈ

-ភូមិភាគទី៣ ខេត្តកណ្តាល មាន ៥អាសនៈ

-ភូមិភាគទី៤ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តឧត្តរមានជ័យ និងខេត្តប៉ៃលិន មាន១០ អាសនៈ

-ភូមិភាគទី៥ ខេត្តតាកែវ ខេត្តកំពត និងខេត្តកែប មាន៧ អាសនៈ

-ភូមិភាគទី៦ ខេត្តព្រៃវែង និងខេត្តស្វាយរៀង មាន៧ អាសនៈ

-ភូមិភាគទី៧ ខេត្តកំពង់ស្ពឺ ខេត្តកំពង់ឆ្នាំង ខេត្តពោធិ៍សាត់ ខេត្តកោះកុង និងខេត្តព្រះសីហនុ មាន៩ អាសនៈ

-ភូមិភាគទី៨ ខេត្តកំពង់ធំ ខេត្តព្រះវិហារ ខេត្តក្រចេះ ខេត្តស្ទឹងត្រែង ខេត្តរតនគិរី និងខេត្តមណ្ឌលគិរី មាន៦ អាសនៈ៕

ដកស្រង់ចេញពី ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា