នាយកដ្ឋានឧតុនិយមថៃ (TMD) បានចេញសេចក្តីព្រមានអាកាសធាតុសម្រាប់ទីក្រុងបាងកក និងតំបន់ជុំវិញខ្លួន ដោយព្យាករណ៍ថានឹងមានភ្លៀងធ្លាក់ខ្លាំងគ្របដណ្តប់ប្រមាណ ៧០% នៃតំបន់នៅថ្ងៃទី២ ខែមិថុនា ឆ្នាំ២០២៥នេះ។ សេចក្តីព្រមាននេះបានអំពាវនាវឱ្យប្រជាជនត្រៀមខ្លួនសម្រាប់ភ្លៀងធ្លាក់ខ្លាំង និងហានិភ័យនៃទឹកជំនន់ភ្លាមៗ និងការហូរច្រោះពីភ្នំ។

យោងតាមនាយកដ្ឋានឧតុនិយមថៃ ស្ថានភាពអាកាសធាតុនេះបណ្តាលមកពីខ្យល់មូសុងនិរតីដែលមានកម្លាំងមធ្យម ដែលកំពុងគ្របដណ្តប់សមុទ្រអាន់ដាម៉ាន់ ប្រទេសថៃ និងឈូងសមុទ្រថៃ រួមផ្សំជាមួយនឹងជ្រលងមូសុងដែលឆ្លងកាត់តំបន់ភាគខាងជើង និងភាគខាងត្បូងនៃប្រទេស។ ភ្លៀងធ្លាក់ខ្លាំងនេះត្រូវបានរំពឹងថានឹងប៉ះពាល់ដល់តំបន់ជាច្រើននៅទូទាំងប្រទេសថៃ ជាពិសេសនៅភាគខាងជើង ឦសាន កណ្តាល និងឆ្នេរសមុទ្រខាងលិចនៃភាគខាងត្បូង។

នៅទីក្រុងបាងកក និងតំបន់ជុំវិញខ្លួន ព្យាករណ៍អាកាសធាតុបានបង្ហាញថា នឹងមានផ្គររន្ទះគ្របដណ្តប់ ៧០% នៃតំបន់ ដោយមានភ្លៀងធ្លាក់ខ្លាំងនៅតំបន់មួយចំនួន។ សីតុណ្ហភាពនឹងស្ថិតនៅចន្លោះពី ២៥ ទៅ ២៦ អង្សាសេ នៅពេលយប់ និងពី ៣១ ទៅ ៣៤ អង្សាសេ នៅពេលថ្ងៃ ជាមួយនឹងខ្យល់បក់ពីទិសនិរតីក្នុងល្បឿន ១០ ទៅ ២០ គីឡូម៉ែត្រក្នុងមួយម៉ោង។

អាជ្ញាធរបានណែនាំឱ្យប្រជាជននៅតំបន់ដែលរងគ្រោះ ជាពិសេសនៅតំបន់ជើងភ្នំ ក្បែរផ្លូវទឹក និងតំបន់ទំនាប ប្រុងប្រយ័ត្នចំពោះទឹកជំនន់ភ្លាមៗ ការហូរច្រោះ និងការបាក់ដី។ អ្នកធ្វើដំណើរត្រូវបានណែនាំឱ្យជៀសវាងផ្លូវដែលងាយរងការជន់លិច និងតំបន់ដែលមានផ្គររន្ទះ។ កសិករត្រូវបានលើកទឹកចិត្តឱ្យធ្វើអនុវត្តប្រព័ន្ធបង្ហូរទឹកឱ្យបានល្អនៅក្នុងដីស្រែចម្ការ ដើម្បីកាត់បន្ថយការខូចខាតដល់ដំណាំ និងសត្វចិញ្ចឹម។

នៅសមុទ្រអាន់ដាម៉ាន់ និងឈូងសមុទ្រថៃ រលកសមុទ្រត្រូវបានគេរំពឹងថានឹងមានកម្ពស់ប្រមាណ ១ ទៅ ២ ម៉ែត្រ និងអាចលើសពី ២ ម៉ែត្រនៅក្នុងតំបន់ដែលមានផ្គររន្ទះ។ អ្នកនេសាទ និងនាវិកត្រូវបានណែនាំឱ្យប្រុងប្រយ័ត្ន និងជៀសវាងការធ្វើនាវាចរណ៍នៅក្នុងតំបន់ដែលមានអាកាសធាតុអាក្រក់៕