នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានប្រកាសថា កម្ពុជានឹងដាក់ពាក្យបណ្តឹងទៅកាន់តុលាការយុត្តិធម៌អន្តរជាតិ (ICJ) នៅទីក្រុងឡាអេ ដើម្បីដោះស្រាយជម្លោះព្រំដែនជាមួយប្រទេសថៃ បន្ទាប់ពីការប៉ះទង្គិចនៅតំបន់ព្រំដែនដែលបានធ្វើឱ្យទាហានកម្ពុជាម្នាក់ បានពលីជីវិត កាលពីថ្ងៃទី២៨ ខែឧសភា ឆ្នាំ២០២៥។

សម្តេចនាយករដ្ឋមន្រ្តី បានថ្លែងនៅលើបណ្តាញសង្គមនៅយប់ថ្ងៃទី១ ខែមិថុនា ថា កម្ពុជានឹងនាំយកបញ្ហាព្រំដែន ជាពិសេសនៅតំបន់ជុំវិញប្រាសាទតាមាន់ធំ តាមាន់តូច និងតាក្រាបី ទៅកាន់ តុលាការយុត្តិធម៌អន្តរជាតិ។ សម្តេចបានបញ្ជាក់ថា ទោះបីជាភាគីថៃ មិនយល់ស្របក្នុងការនាំយកបញ្ហានេះទៅ ICJ ក៏កម្ពុជានឹងនៅតែបន្តដាក់ពាក្យបណ្តឹង។ ក្រសួងការបរទេសនិងសហប្រតិបត្តិការអន្តរជាតិកម្ពុជា បានទាមទារឱ្យថៃស៊ើបអង្កេតលើការបាញ់សម្លាប់ទាហានកម្ពុជាកាលពីថ្ងៃទី២៨ ខែឧសភា ដោយហៅថាជា “ទង្វើឃោរឃៅនិងខុសច្បាប់”។

អតីតនាយករដ្ឋមន្ត្រី សម្តេច ហ៊ុន សែន បានសម្តែងការគាំទ្រចំពោះផែនការនេះ ដោយនិយាយថា អនុស្សរណៈនៃការយោគយល់គ្នាឆ្នាំ២០០០ (MOU) មិនបានឈានទៅរកវឌ្ឍនភាពគួរឱ្យកត់សម្គាល់ ដែលនាំឱ្យមានភាពមិនច្បាស់លាស់ ការចោទប្រកាន់គ្នាទៅវិញទៅមក និងការប៉ះទង្គិចប្រដាប់អាវុធ។ សម្តេចបានជំរុញឱ្យថៃយល់ព្រមនាំយកបញ្ហានេះទៅ ICJ ដើម្បីទទួលបានសេចក្តីសម្រេចចុងក្រោយ។

ទោះបីជាមានការប៉ះទង្គិចនេះក៏ដោយ នាយករដ្ឋមន្រ្តីកម្ពុជា បានបញ្ជាក់ឡើងវិញនូវការប្តេជ្ញាចិត្តរបស់កម្ពុជាក្នុងការដោះស្រាយបញ្ហាដោយសន្តិវិធី តាមរយៈយន្តការដែលមានស្រាប់ដូចជា គណៈកម្មការព្រំដែនរួម (JBC) និងគណៈកម្មការព្រំដែនទូទៅ (GBC)។ លោកក៏បានជំរុញឱ្យកងកម្លាំងប្រដាប់អាវុធកម្ពុជារក្សាភាពអត់ធ្មត់ ប៉ុន្តែត្រូវត្រៀមខ្លួនដើម្បីប្រយុទ្ធប្រឆាំងនឹងការឈ្លានពានណាមួយ៕