ស្គាល់ក្មេងដែលយកថង់ប្លាស្ទិកធ្វើអាវ Messi ពាក់ហើយ

2016-01-27 16:10:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងប្រុសម្នាក់ ដែលយកថង់ប្លាស្ទិកធ្វើអាវពាក់ ដោយមានឈ្មោះ Messi និងលេខ១០ សប្ដាហ៍មុននោះ ពេលនេះត្រូវបានគេរកឃើញហើយ។

រូបភាពកុមារាតូច ដែលគេចែកចាយយ៉ាងច្រើនលើអ៊ីនធឺណិត ព្រោះតែអាណិតអាសូរ និងចង់ស្វែងរកដើម្បីជួយ ដំបូងឡើយត្រូវបានគេរាយការណ៍ថា រូបគេនៅក្នុងទីក្រុងមួយ ដែលញាំញីដោយភ្លើងសង្គ្រាម នៃប្រទេសអ៊ីរ៉ាក់។

ប៉ុន្តែកាលពីថ្ងៃអង្គារម្សិលមិញ BBC បានរាយការណ៍ថាមានបុរសម្នាក់ឈ្មោះ Arif Ahmadi បានចេញមកបញ្ជាក់ថា ក្មេងម្នាក់នោះគឺជាក្មួយប្រុសអាយុ៥ឆ្នាំរបស់ខ្លួន ដែលរូបគេមានឈ្មោះ Murtaza រស់នៅតំបន់ជនបទ នៃប្រទេសអាហ្វហ្គានីស្ថាន។

Arif បានប្រាប់ដល់ BBC ថា៖ "Murtaza ពិតជាស្រលាញ់ Messi និងបាល់ទាត់ខ្លាំងណាស់។ តែពួកយើងមិនមានលទ្ធភាពទិញអាវឲ្យគាត់ទេ ព្រោះយើងជាកសិករមានជីវភាពខ្វះខាត។ ដូច្នេះទើបគាត់ យកថង់ប្លាស្ទិកសរសេរឈ្មោះ Messi ពាក់”។

“យើងក៏បានឭពីមិត្តភ័ក្ដិដែលគេមានអ៊ីនធឺណិតប្រាប់មកដែរ។ ក្មួយរបស់ខ្ញុំក៏សង្ឃឹមថា ប្រទេសនានានឹងអាចជួយពួកយើងបានជួប Messi ហើយបើគាត់មានសំណាងក៏ចង់ហ្វឹកហាត់ឲ្យក្លាយជាកីឡាករល្អដូច Messi ផងដែរ នាពេលអនាគត”។ Arif បញ្ជាក់បន្ថែម៕