សេន ប៊ុនថេន ជាកីឡាករខ្មែរ កាន់ឯកត្តកម្មតម្លៃខ្លួនខ្ពស់៦ពាន់ដុល្លារ
- 2018-01-16 02:20:38
- ចំនួនមតិ 0 | ចំនួនចែករំលែក 0
សេន ប៊ុនថេន ជាកីឡាករខ្មែរ កាន់ឯកត្តកម្មតម្លៃខ្លួនខ្ពស់៦ពាន់ដុល្លារ
ចន្លោះមិនឃើញ
ក្នុងចំណោមកីឡាករប្រដាល់ខ្មែរល្បីៗរួមជំនាន់ និងស្រករក្រោយ សេន ប៊ុនថេន អាចចាត់ទុកជាកីឡាករកាន់កាប់ឯកត្តកម្ម មានតម្លៃខ្លួនខ្ពស់បំផុតក្នុងការប្រកួតនៅក្រៅប្រទេស។
ប្រភពកៀកកិតនឹងសេន ប៊ុនថេន បានបង្ហើបថា ការប្រកួតដែលធ្វើឲ្យកីឡាករល្អក្បាច់ទាត់ផ្កាប់ចានរូបនេះ បង្កើតបានកំណត់ត្រាតម្លៃខ្លួនលើសអ្នករួមអាជីព គឺការប្រកួតនៅក្នុងឆ្នាំ ២០១៤ តទល់ Super Star របស់ Thai Fight សញ្ជាតិបារាំងកីឡាករមុខស្រស់ Antoine Pinto ។ ប្រភពបន្ថែមថា ក្នុងការប្រកួតនៅប្រទេសថៃនោះ សេន ប៊ុនថេន ទទួលបានតម្លៃខ្លួន ប្រមាណ៦ពាន់ដុល្លារអាមេរិក ខណៈដែលកីឡាករខ្មែរល្បីៗផ្សេងទៀត ដែលធ្លាប់វ៉ៃក្នុងកម្មវិធីនេះ មានតម្លៃខ្លួនចន្លោះពីជាង១ពាន់ ទៅជាង២ពាន់ដុល្លារប៉ុណ្ណោះ។
ការបានតម្លៃខ្លួនខ្ពស់ ដល់ទៅ ៦ពាន់ដុល្លារនៅពេលនោះ ដោយសារតែនោះជាការប្រកួតពិសេស របស់ Thai Fight។ ប្រភពថា នោះជាការប្រកួតស្វែងរកជើងឯកពិភពលោក ទម្ងន់៧០គីឡូក្រាម ក្នុងកម្មវិធីប្រដាល់ដ៏ពេញនិយមរបស់ថៃនេះ ដែលមានឈ្មោះថា Thai Fight Asia-Europe 2014។ ប្រសិនបើពេលនោះ សេន ប៊ុនថេន ឈ្នះ Pinto នោះ សេន ប៊ុនថេន នឹងឡើងទៅវគ្គបន្ទាប់ ដោយមានប្រាក់រង្វាន់ក្នុងដៃប្រមាណ៣ម៉ឺនដុល្លារ ជាស្វ័យប្រវត្តិ។
ក្នុងចំណោមការប្រកួត៣លើករបស់ខ្លួន នៅ Thai Fight នោះជាការប្រកួតដែលបានតម្លៃពលកម្មច្រើនបំផុតរបស់ សេន ប៊ុនថេន។ ប៉ុន្តែជើងខ្លាំងមកពីកំពង់ចាម ដែលដកខ្លួនពីជីវិតលើរេញរូបនេះ ក៏កម្រនឹងបង្ហើបព័ត៌មាននេះ ឲ្យបែកធ្លាយណាស់ ដោយបារម្ភមានការយល់ច្រលំ ដ្បិតធ្លាប់ទទួលតម្លៃខ្លួនខ្ពស់ដាច់មិត្តរួមអាជីព តែក្នុងមួយប្រកួតនោះប៉ុណ្ណោះ។
គួររំលឹកថា ការប៉ះគ្នានៅ ខែវិច្ឆិកា ២០១៤នោះ អាចចាត់ទុកជាការសងសឹក នឹង Antoine Pinto។ ប៉ុន្តែជាលទ្ធផល ស៊េន ប៊ុនថេន បានបន្តចាញ់ជើងខ្លាំងបារាំង ដោយពិន្ទុ បើទោះជាមុនប៉ះគ្នាជាថ្មី១ខែ សេន ប៊ុនថេន ទើបតែបង្ហាញសាច់ដុំ ដោយការយកឈ្នះពិន្ទុកីឡាករជប៉ុន Takeru Shinmizu។