ប្រយ័ត្ន! ហូបគ្រឿងសមុទ្រឆៅ ចុងក្រោយហើម និងកើតពងបែកពេញដៃ គួរឲ្យរន្ធត់

2018-08-29 07:27:07
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិកូរ៉េខាងត្បូងម្នាក់ មានអាយុ៧១ឆ្នាំ បានបាត់បង់ដៃឆ្វេងរបស់ខ្លួន បន្ទាប់ពីហូបគ្រឿងសមុទ្រឆៅ ហើយឆ្លងមេរោគដែលគំរាមកំហែងដល់ជីវិត។

យោងតាមរបាយការណ៍វេជ្ជសាស្ត្រ ដែលចេញផ្សាយក្នុងកាសែត New England Journal of Medicine បានឲ្យដឹងថា បុរសវ័យចំណាស់ខាងលើមានការឈឺចាប់យ៉ាងខ្លាំង នៅពេលដែលដៃឆ្វេងរបស់ខ្លួនចាប់ផ្ដើមហើម បន្ទាប់ពីហូបគ្រឿងសមុទ្រឆៅ ត្រឹមតែ១២ម៉ោងប៉ុណ្ណោះ។

បន្ទាប់មក បុរសដែលគេមិនបញ្ចេញអត្តសញ្ញាណរូបនេះ ត្រូវបានបញ្ជូនទៅកាន់មន្ទីរពេទ្យមួយ ក្នុងទីក្រុង Jeonju ហើយគ្រូពេទ្យបានរកឃើញថា គេបានឆ្លងមេរោគម្យ៉ាងហៅថា Vibrio vulnificus។ បុរសនេះបានកើតពងបែកមានឈាមដ៏ធំនៅលើបាតដៃខាងឆ្វេង ព្រមទាំង ហើមខ្នងដៃ និងកំភួនដៃទៀតផង។

មិនបង្អង់យូរ ក្រុមគ្រូពេទ្យបានធ្វើការវះកាត់ដើម្បីបង្ហូរពងបែកនោះតែម្ដង។ ក្រោយពេលវះកាត់ អ្នកជំងឺបានទទួលថ្នាំអង់ទីប៊ីយ៉ូទីក ប៉ុន្តែស្បែករបស់អ្នកជំងឺបានវិវត្តទៅជាដំបៅរលួយ ក្នុងរយៈពេល២៥ថ្ងៃ។ ចុងក្រោយ កំភួនដៃឆ្វេងរបស់គេក៏ត្រូវបានកាត់ចោលតែម្ដង។

របាយការណ៍មួយដែលបានចេញផ្សាយ នៅក្នុងកាសែត The Korean Journal of Internal Medicine បាននិយាយថា ការឆ្លងមេរោគ Vibrio vulnificus ជាការគំរាមកំហែងដល់សុខភាពសាធារណៈ នៅតាមបណ្ដាប្រទេសមួយចំនួន ដូចជា កូរ៉េខាងត្បូង និងតៃវ៉ាន់ ហើយវាកើតមានច្រើនបំផុត នៅចន្លោះខែមិថុនា និងកញ្ញាជារៀងរាល់ឆ្នាំ។ ជារឿយៗ អ្នកជំងឺកើតអាការៈដែលគេស្គាល់ថាជាការ ពុលឈាម នេះ ដោយសារការហូបអាហារឆៅ ឬអាហារសមុទ្រមិនស្អាត ហើយមុខរបួសប៉ះពាល់ដល់ទឹកប្រៃដែលមានជាតិកខ្វក់ជាដើម៕

ចុចអាន៖