ខេត្តកំពង់ស្ពឺ មានគម្រោង៣ធំៗ បើចេញដូចការរំពឹងទុក ដឹងតែមុខមាត់ខេត្តកាន់តែល្បីល្បាញ

2019-05-21 04:17:16
ចំនួនមតិ 0 | ចំនួនចែករំលែក 0

ចន្លោះមិនឃើញ

តើគម្រោងបីធំៗរបស់ខេត្តកំពង់ស្ពឺគឺជាអ្វី? គម្រោងទាំងបីនោះរួមមាន៖ គម្រោងទី១ ត្រៀមធ្វើសួនបែបធម្មជាតិដ៏ធំត្រៀមចំណាយប្រមាណជា ៥០០លានដុល្លារ, គម្រោងទី២ គឺត្រៀមសាងសង់អគារភ្លោះកប់ពពក និងគម្រោងទី៣ គឺត្រៀមសាងសង់ស្ពានអាកាសថ្មើរជើងមានតម្លៃប្រមាណជា ៣០ម៉ឺនដុល្លារ ដែលមិនធ្លាប់មានពីមុនមកនៅក្នុងខេត្តកំពង់ស្ពឺ។

១. គម្រោងធ្វើសួនបែបធម្មជាតិ

សូមចុចអាន៖ ពិតជាត្រជាក់ភ្នែក! គម្រោងកម្សាន្តបែបធម្មជាតិមួយគ្រោងចំណាយ៥០០លានដុល្លារ ត្រៀមរំលេចឡើងនៅខេត្តកំពង់ស្ពឺ

គម្រោងបែបធម្មជាតិមួយគ្រោងចំណាយថវិកាប្រមាណជា ៥០០លានដុល្លារ លើផ្ទៃដី ២០៥ហិកតា ត្រៀមរំលេចខ្លួននៅឃុំមហាសាំង ស្រុកភ្នំស្រួច និងឃុំកាហែង ស្រុកសំរោងទង ខេត្តកំពង់ស្ពឺ។

យោងតាមការសរសេរលើបណ្ដាញសង្គមរបស់រដ្ឋបាលស្រុកភ្នំស្រួច ខេត្តកំពង់ស្ពឺ បានឲ្យដឹងថា គម្រោងវិនិយោគតំបន់ទេសចរណ៍ធម្មជាតិមួយនេះ មានមណ្ឌលកម្សាន្ត សួនកម្សាន្ត សួនទឹក សួនកសិកម្មទេសចរណ៍ សួនកុមារ សួនសត្វ រមណីយដ្ឋាន និងសណ្ឋាគារ ត្រៀមធ្វើលើផ្ទៃដីជាង ២០០ហិកតា ត្រូវបានបើកកិច្ចប្រជុំគាំទ្រគម្រោង ដោយឯកឧត្ដម វ៉ី សំណាង អភិបាល នៃគណៈអភិបាលខេត្តខេត្តកំពង់ស្ពឺ កាលពីថ្ងៃទី ៨ ឧសភា ឆ្នាំ២០១៩។ គម្រោងវិនិយោគដែលគ្រោងចាយប្រាក់ប្រមាណជា ៥០០លានដុល្លារ ក្រោមគម្រោងវិនិយោគរបស់ក្រុមហ៊ុនចូហ្គ្រេន អ៉ិនវេសម៉ិន ឯ.ក (JOE GRAND ECOINVESTMENT Co.LTD)។

២. គម្រោងសង់អគារខ្ពស់កប់ពពក

កាលពីពេលថ្មីៗនេះ ខេត្តកំពង់ស្ពឺបានធ្វើឲ្យមហាជនមានការភ្ញាក់ផ្អើលនឹងគម្រោងដ៏ធំមួយទៀត នោះគឺ គម្រោងវិនិយោគសាងសង់អគារភ្លោះ ខ្ពស់កប់ពពកមួយទៀតត្រៀមរំលេចខ្លួនក្នុងខេត្តនាពេលខាងមុខនេះ។

សូមចុចអាន៖ អស្ចារ្យ ! អគារភ្លោះខ្ពស់កប់ពពកនឹងរំលេចខ្លួននៅក្នុងទឹកដីខេត្តកំពង់ស្ពឺ

លោក វី សំណាង អភិបាលខេត្តកំពង់ស្ពឺ បានថ្លែងថា អគារភ្លោះនឹងត្រូវសាងសង់នៅកណ្ដាលក្រុងច្បារមន ខេត្តកំពង់ស្ពឺផ្ទាល់តែម្ដងដោយវិនិយោគិនខ្មែរ ខណៈការសិក្សាពីគម្រោង និងប្លង់បានបញ្ចប់រួចរាល់ហើយ ដោយរង់ចាំតែការសម្រេច ពីប្រមុខរាជរដ្ឋាភិបាលលកម្ពុជាតែប៉ុណ្ណោះ។ ការសាងសង់អគារភ្លោះខ្ពស់កប់ពពកនេះ រំពឹងថា នឹងទាក់ទាញវិនិយោគិនកាន់តែច្រើនឡើងមកបណ្ដាក់ទុនក្នុងខេត្តកំពង់ស្ពឺ ខណៈខេត្តមួយនេះ គឺជាតំបន់តភ្ជាប់រវាងប៉ូលសេដ្ឋកិច្ចសំខាន់ពីររបស់កម្ពុជា គឺរាជធានីភ្នំពេញ និងខេត្តព្រះសីហនុ។

ដោយមិនបានបញ្ជាក់ឈ្មោះក្រុមហ៊ុនបោះទុនវិនិយោគ និងទំហំទឹកប្រាក់ លោកអភិបាលខេត្តបានឱ្យដឹងថា អគារភ្លោះទី១នេះ មានកម្ពស់ ៣២ ជាន់ និងទី២ មាន៦៤ ជាន់ ដោយមានផ្សារទំនើប អគារការិយាល័យ និងកន្លែងកម្សាន្តជាដើម។

៣. ស្ពានអាកាសថ្មើរជើងតាមបណ្ដោយផ្លូវជាតិលេខ ៤ ដែលគ្រោងចំណាយ៣០ម៉ឺនដុល្លារ

ស្ពានអាកាសថ្មើរជើង កាត់ផ្លូវជាតិលេខ៤ ដំបូងបង្អស់ក្នុងភូមិសាស្ត្រខេត្តកំពង់ស្ពឺ តម្លៃជាង ៣០ម៉ឺនដុល្លារអាម៉េរិក។ ស្ពាននេះត្រូវបានកសាងឡើង ដើម្បីសម្រួលការឆ្លងកាត់របស់ប្រជាពលរដ្ឋថ្មើរជើងពីគ្រោះថ្នាក់ និងការកកស្ទះចរាចរណ៍។

ឯកឧត្ដម វ៉ី សំណាង អភិបាលខេត្តកំពង់ស្ពឺបានប្រាប់ Sabay ឱ្យដឹងថា ស្ពាននេះនឹងត្រូវសាងសង់ត្រង់ចំណុចបេនឡានផ្សារកំពង់ស្ពឺ ដោយមានប្រវែង ៣០ម៉ែត្រ កម្ពស់ ៥,២ម៉ែត្រ ទទឹង៣ម៉ែត្រ ធ្វើពីបេតុងអាមេ ក្រោមជំនួយឧបត្ថម្ភពីលោកជំទាវបណ្ឌិត សៀង ចាន់ហេង អគ្គនាយកក្រុមហ៊ុន ហេង អភិវឌ្ឍន៍ ក្នុងតម្លៃសាងសង់ ៣៤ម៉ឺនដុល្លារអាមេរិក ហើយចំណាយពេលសាងសង់ជិតមួយឆ្នាំ។

សូមចុចអាន៖ កំពង់ស្ពឺទៀតហើយ! ស្ពានអាកាសថ្មើរជើងកាត់ផ្លូវជាតិលេខ៤តម្លៃជាង ៣០ម៉ឺនដុល្លារនឹងត្រូវសាងសង់ឆាប់ៗនេះ

ពេលបច្ចុប្បន្ននេះ ខេត្តកំពង់ស្ពឺ បាននិងកំពុងពង្រីកវិសាលភាពផ្នែកសេដ្ឋកិច្ច កាន់តែប្រសើរជាងមុន ខណៈសិប្បកម្មធនតូច និងមធ្យមនៅតាមមូលដ្ឋានមានរហូតរាប់រយមូលដ្ឋាន ដែលអាចផ្ដល់ការងារដល់កម្មករកម្មការិនីរាប់ម៉ឺននាក់។ ការអភិវឌ្ឍខេត្តកំពង់ស្ពឺបច្ចុប្បន្នបានតភ្ជាប់គ្នាជាមួយរាជធានីភ្នំពេញរួចហើយ នៅតាមបណ្ដោយផ្លូវជាតិលេខ៤។ រាជរដ្ឋាភិបាលនឹងរៀបចំ តំបន់តាមផ្លូវជាតិលេខ៤ ពីរាជធានីភ្នំពេញ ទៅកាន់ខេត្តព្រះសីហនុ ជាតំបន់ឧស្សាហកម្មនៅឆ្នាំ ២០២៥ ខាងមុខនេះ៕

អត្ថបទ៖ ប៊ិន ប៊ុណ្ណា