ចំនួន​សត្វ​ខ្លា​នៅ​ប្រទេស​ឥណ្ឌា មាន​ការ​កើន​ឡើង​រយៈ​ពេល ៤​ឆ្នាំ​ចុង​ក្រោយ​នេះ

  • 2019-07-29 13:01:41
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្នុង​ថ្ងៃ​ច័ន្ទ​នេះ​ដែរ លោក​នាយករដ្ឋមន្ត្រី​ប្រទេស​ឥណ្ឌា Narendra Modi បាន​ប្រកាស​ថា ចំនួន​សត្វ​ខ្លា​នៅ​ប្រទេស​ឥណ្ឌា​បាន​កើន​ឡើង​ពី ២,២២៦ ក្បាល នៅ​ឆ្នាំ​២០១៤ ឡើង​មក​ដល់ ២,៩៦៧​ក្បាល​នៅ​ឆ្នាំ​២០១៨។

បើ​តាម​ការ​ប្រកាស​តាម​បណ្ដាញ​ Twitter របស់​លោក​បាន​ឲ្យ​ដឹង​ថា ប្រទេស​ឥណ្ឌា​ពេល​នេះ ជា​ជម្រក​នៃ​សត្វ​ខ្លា​ដ៏​ធំ​ជាង​គេ និង​សុវត្ថិភាព​ជាង​គេ ខណៈ​សារព័ត៌មាន BBC បាន​ឲ្យ​ដឹង​ថា ប្រទេស​ឥណ្ឌា​ជា​ជម្រក​សត្វ​ខ្លា ៧០% នៃ​ចំនួន​សត្វ​ខ្លា​ទាំង​អស់​លើ​ពិភពលោក។

បើ​តាម​សារព័ត៌មាន​អង់គ្លេស​នេះ​បាន​ឲ្យ​ដឹង​ថា ការ​អភិរក្ស​មាន​ភាព​ជោគជ័យ​ ដោយ​សារ​តែ​មាន​ការ​អនុវត្ត​ច្បាប់​ការពារ​ដែន​ជម្រក​សត្វ​ព្រៃ ឆ្នាំ​១៩៧២ ដែល​ចាត់​ទុក​ថា ការ​សម្លាប់ ឬ ការ​ចាប់​សត្វព្រៃ​ជា​អំពើ​ខុស​ច្បាប់។ លើសពីនេះ​ទៀត ឥណ្ឌា​បាន​វិនិយោគ​ច្រើន​លើ​ការ​ជួល​ឆ្មាំ​យាម​ព្រៃ និង​ការ​ការពារ​ដែន​បម្រុង។

គួរ​បញ្ជាក់​ផង​ដែរ​ថា កំឡុង​ឆ្នាំ​១៨៧៥ និង​ឆ្នាំ​១៩២៥ សត្វ​ខ្លា​ជាង​ ៨ម៉ឺន​ក្បាល​ត្រូវ​បាន​សម្លាប់​នៅ​ឥណ្ឌា ដោយ​ការ​ប្រមាញ់​តាម​រូប​ភាព​ផ្សេង​ៗ។ ចាប់​ពី​ឆ្នាំ​២០០៦ មក ចំនួន​សត្វ​ខ្លា​នៅ​ឥណ្ឌា ចាប់​មាន​ផ្ដើម​មាន​ការ​កើន​ឡើង​រហូត​មក​ដល់​បច្ចុប្បន្ន៕

ប្រភព៖ BBC   ប្រែ​សម្រួល៖ ហ៊ីម រស្មី