ទិដ្ឋភាពកម្ពុជា ស្មើ ឡាវ ១-១ កក្រើកអូឡាំពិកយប់មិញ

2015-06-03 16:30:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតរវាងក្រុមបាល់ទាត់ជម្រើសជាតិកម្ពុជានិងក្រុមជម្រើសជាតិ ឡាវបានបញ្ចប់ក្នុងលទ្ធផលស្មើគ្នា ១-១។ នៅតង់ទី១ ក្រុមទាំងពីរមិនអាចទម្លាយសំណាញ់ទីគ្នាបានទេ ប៉ុន្តែនៅតង់ទីពីរទើបក្រុមទាំងពីរអាចទម្លាយសំណាញ់ទីគ្នាបានដោយខ្សែប្រយុទ្ធមុតស្រួចលេខ៩របស់កម្ពុជា ឃួន ឡាបូរ៉ាវី បានធ្វើឲ្យអ្នកគាំទ្រហ៊ោកងរំពងកក្រើកស្តាតអូឡាំពិក បន្ទាប់ពីស៊ុតចូលទីឡាវនៅទី៤៦ដើម្បីនាំមុខ ១-០ ប៉ុន្តែប៉ុន្មាននាទីក្រោយមកខ្សែប្រយុទ្ធលេខ៩ឡាវ Sangvone Phimmasen បានតែតចូលទីរបស់កម្ពុជាដើម្បីតាមស្មើនៅនាទីទី ៥០។ ចប់ការប្រកួតក្រុមទាំងពីរស្មើគ្នា ១-១។

សម្រាប់ការប្រកួតនេះ លោកគ្រូបង្វឹកជម្រើសជាតិឡាវបាននិយាយក្នុងសន្តិសីទក្រោយការប្រកួតថា ក្រុមរបស់លោកធ្វើបានល្អគួរសមដោយអាចស្មើនឹងម្ចាស់កម្ពុជា ប៉ុន្តែក៏មានកំហុសច្រើនដែរដែលកូនក្រុមរបស់លោកត្រូវតែកែលម្អនាពេលខាងមុខ។ ទោះជាយ៉ាងណា លោកក៏មានការភ្ញាក់ផ្អើលចំពោះអ្នកគាំទ្របាល់ទាត់កម្ពុជាដែលចូលទស្សនា និងគាំទ្រយ៉ាងច្រើនកុះករ។

ជាមួយគ្នានេះលោកគ្រូបង្វឹកជម្រើសកម្ពុជា Kazunori Ohara បានលើកឡើងថា ក្រុមរបស់លោកលេងមិនសូវបានល្អទេដោយបង្កើតឲ្យមានកំហុសជាច្រើនទាំងចំណុចការពារ និងបម្រើប្រយុទ្ធ។ ក្រុមរបស់លោកត្រូវតែកែលម្អចំណុចទាំងនេះឲ្យបាន ប៉ុន្តែលោកក៏កោតសរសើរដែលកូនក្រុមរបស់លោកខំប្រឹងលេងអស់ពីសមត្ថភាព៕