មេរៀនសង្ខេប និងលំហាត់គំរូថ្នាក់ទី១២ ជាច្រើន មាននៅវិបសាយ និងហ្វេសប៊ុក គ្រូ

2016-07-29 18:41:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំ យុវជន និង កីឡា បានចងក្រង និងបង្ហោះមេរៀនសង្ខេប លំហាត់គំរូ សម្រាប់មុខវិជ្ជាសំខាន់ៗមួយចំនួន លើវិបសាយ និងហ្វេសប៊ុក គ្រូ។ ឯកសារទាំងនេះ ត្រូវបានរៀបរៀងឡើងដើម្បីជាជំនួយដល់សិស្សថ្នាក់ទី១២ ដែលកំពុងត្រៀមខ្លួនប្រឡងមធ្យមសិក្សាទុតិយភូមិ នៅថ្ងៃទី២២ និង ២៣ សីហា ខាងមុខនេះ។

លោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានឲ្យដឹងថា វិបសាយនេះក្រសួងបានបង្កើតតាំងពីឆ្នាំ២០១៣ មកម្ល៉េះ តែការបង្ហោះកម្រងមេរៀនសង្ខេប និងលំហាត់គំរូ បានចាប់ផ្ដើមដំបូងក្នុងឆ្នាំ២០១៤ ហើយកាន់តែលម្អិត និងខ្លឹម ក្នុងឆ្នាំ២០១៦ នេះ។

លោកថា៖ "ឯកសារទាំងនេះ គឺចងក្រងដោយសាស្ត្រាចារ្យជំនាញ និងមានបទពិសោធន៍ជាច្រើនឆ្នាំលើមុខវិជ្ជានីមួយៗ ដើម្បីជួយពង្រឹងសមត្ថភាពមូលដ្ឋាន និងសម្រួលដល់ការសិក្សាត្រៀមខ្លួនប្រឡងរបស់សិស្សថ្នាក់ទី១២ ដែលចង់រៀនធ្វើលំហាត់ខ្លួនឯង ឬសិក្សាជាក្រុម"។

កម្រងមេរៀនដែលបានសង្ខេប និងចែកចាយឲ្យប្រើប្រាស់ជាសាធារណៈកន្លងមក រួមមាន មុខវិជ្ជាគណិតវិទ្យា គីមីវិទ្យា រូបវិទ្យា ជីវវិទ្យា អក្សរសាស្ត្រខ្មែរ និងប្រវត្តិសាស្ត្រ។ ទោះយ៉ាងណា ឯកសារដែលបង្ហោះក្នុងវិបសាយ និងបណ្តាញសង្គមខាងលើ គ្រាន់តែជាឯកសារជំនួយដល់សិស្សដែលមានឈ្មោះប្រឡងសញ្ញាប័ត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាប៉ុណ្ណោះ មិនមែនជាឯកសារពេញលេញសម្រាប់កម្មវិធីសិក្សាថ្នាក់ទី១២ ទាំងមូលនោះទេ។

សិស្សអាចចូលមើល និងទាញយកឯកសារសម្រាប់រៀនត្រៀមប្រឡងបាក់ឌុបឆ្នាំ២០១៦ នេះ ដោយចូលវិបសាយ http://krou.moeys.gov.kh ឬហ្វេសប៊ុក Krou Cambodia។

ចង់បានវិញ្ញាសាគណិតវិទ្យាថ្មីបំផុត ដែលទើបចេញផ្សាយកាលពីថ្ងៃចន្ទ ទី២៥ កក្កដា ២០១៦ សូមចុចទីនេះ http://krou.moeys.gov.kh/kh/article/item/1397-1397.html#.V5g-nxLFrwI ៕

អត្ថបទ៖ លីដា