១៧ថ្ងៃទៀតប្រលងបាក់ឌុប តែផ្ទះសំណាក់ចាប់ផ្ដើមណែនបណ្ដើរៗ
- 2016-08-05 20:54:50
- ចំនួនមតិ 0 | ចំនួនចែករំលែក 0
១៧ថ្ងៃទៀតប្រលងបាក់ឌុប តែផ្ទះសំណាក់ចាប់ផ្ដើមណែនបណ្ដើរៗ
ចន្លោះមិនឃើញ
ផ្ទះសំណាក់នៅតាមបណ្ដាខេត្តចាប់ផ្ដើមមានសិស្សត្រៀមប្រលងបាក់ឌុបកក់បណ្ដើរៗពីពេលនេះទៅហើយ បើទោះការប្រលងធ្វើឡើងនៅថ្ងៃ២២ សីហាខាងមុខក្តី។ នេះបើតាមការឲ្យដឹងពីម្ចាស់ផ្ទះសំណាក់បានប្រាប់ Sabay។
អ្នកនាង ប្រា សុឆាវី ម្ចាស់ផ្ទះសំណាក់ចំប៉ីសនៅក្រុងកែប ប្រាប់ថា សិស្សមកកក់ជិតពេញហើយ នៅសល់តែប៉ុន្មានបន្ទប់ប៉ុណ្ណោះ។ ម្ចាស់ផ្ទះសំណាក់នៅជិតជើងភ្នំ និងឧទ្យានជាតិកែបនេះ បន្តថា មិនឡើងថ្លៃទេចំពោះការប្រលងបាក់ឌុបខាងមុខនេះ។ អ្នកនាងថា ពេលខ្លះអាណិតកូនសិស្សទាំងនោះ មានតែបញ្ចុះតម្លៃទៀតក៏មាន។
មិនខុសគ្នាប៉ុន្មាន ផ្ទះសំណាក់ភូមិឧទ្យាននៅសៀមរាប ក៏មានគេកក់បណ្ដើរៗដែរ។ កញ្ញា ផា ជាម្ចាស់ផ្ទះសំណាក់នេះប្រាប់ថា ការប្រលងបាក់ឌុបគឺមិនមានឡើងថ្លៃទេ ។
កន្លងមកតែងមានការរិះគន់ថា ផ្ទះសំណាក់មួយចំនួនបានឆ្លៀតឱកាសតំឡើងថ្លៃដែលធ្វើឲ្យសិស្សត្រូវចំណាយច្រើនសម្រាប់ការប្រលងរបស់ខ្លួន។ ក្រៅពីនេះ សិស្សខ្លះពិបាកស្វែងរកផ្ទះសម្រាប់ស្នាក់អាស្រ័យដោយសារមណ្ឌលប្រលងតម្រូវនៅតាមបណ្ដាប្រជុំជន ហើយផ្ទះសំណាក់ភាគច្រើនត្រូវបានគេកក់អស់ទៅហើយ។
ពាក់ព័ន្ធនឹងរឿងនេះ លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា បានអំពាវនាវសូមកុំឲ្យផ្ទះសំណាក់ឡើងថ្លៃអំឡុងការប្រលងបាក់ឌុប។ សម្រាប់សិស្សដែលមិនចង់ចំណាយច្រើន លោកសូមឲ្យមានការស្នាក់នៅជាមួយផ្ទះបងប្អូន ឬសាច់ញាតិដែលនៅជិតមណ្ឌលផងដែរ។
ការប្រលងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឆ្នាំ២០១៦ រួមមានបេក្ខជនប្រលងសរុបចំនួន ៩៣ ៧៥២ នាក់ ដោយមានមណ្ឌលប្រលងចំនួន ១៥៧មណ្ឌល ចែកចេញជា ៣ ៧៨១បន្ទប់ នៅរាជធានី ខេត្តទាំង២៥ នៃព្រះរាជាណាចក្រកម្ពុជា៕
សូមអាន៖ ក្រសួងអប់រំ ទម្លាយបែបផែនវិញ្ញាសាបាក់ឌុប
អត្ថបទ៖ លឹម សុនា