ហេតុផលដែលសិស្សតាមខេត្តមករៀនគួរត្រៀមប្រលងបាក់ឌុបនៅភ្នំពេញ

2016-08-12 15:38:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រលងបាក់ឌុបទូទាំងប្រទេសកាន់តែខិតជិតមកដល់ ជាមួយគ្នានោះ សិស្សថ្នាក់ទី១២ជាច្រើនក៏កំពុងសម្រុករៀនគួរនិងស្វ័យសិក្សាតាំងពីព្រឹករហូតដល់យប់ ដើម្បីត្រៀមខ្លួនយកនិទ្ទេសល្អនៅថ្ងៃសំខាន់នោះ។ តាមការសាកសួរនៅសាលាជ័យថាវី សិស្សមកពីខេត្តមួយចំនួនបានឲ្យដឹងថា ពួកទៅរៀននៅទីនោះ គឺដោយសារទៅតាមមិត្តភ័ក្ដិ និងចង់រៀនបទពិសោធន៍ពីលោកគ្រូ អ្នកគ្រូបង្រៀននៅភ្នំពេញ ហើយមួយចំនួនទៀតបានបញ្ជាក់ថាវិញ្ញាសារនៅភ្នំពេញស្រដៀងច្រើនទៅនឹងវិញ្ញាសាប្រលងច្រើន។

យុវជន ញឹម ស៊ីថុល សិស្សទី១២ មកពីវិទ្យាល័យ ហ៊ុន សែន តាំងគោក ខេត្តព្រៃវែង បានឲ្យដឹងថា រូបគេបានរៀនគួរពីសាលានៅខេត្តបានច្រើនរួចហើយ និងឡើងមករៀននៅភ្នំពេញ បានជាង១០ថ្ងៃ ដោយមករៀនផ្ដោតសំខាន់លើ មុខវិជ្ជា គណិត និងរូបវិទ្យា។ ចំពោះហេតុផលដែលរូបគេសម្រេចចិត្ត នៅសាលាជ័យថាវី យុវសិស្សរូបនេះនិយាយថា៖ "ខ្ញុំឡើងមករៀននៅហ្នឹង ចង់ដូរបទពិសោធន៍ ចង់មករៀនយកចំណេះផ្សេងៗទៀត ព្រោះនៅហ្នឹងមានគ្រូច្រើន "។

ងាកទៅស្ដាប់ យុវតី គុជ រតនៈ មកពីវិទ្យាល័យ ហ៊ុនសែន ក្រគរ ខេត្តពោធិ៍សាត់ កញ្ញាបានឲ្យដឹងពីហេតុផល ដែលឡើងមករៀននៅសាលាជ័យថាវីថា៖ "ខ្ញុំខ្សោយមុខវិជ្ជាគណិត ហើយឮតែគេល្បីថា នៅជ័យថាវីហ្នឹងគេមានបើកបង្រៀនគួរគណិត គ្រូខ្លាំងខ្លាំង ទើបឡើងមករៀន ២ម៉ោងថែម ព្រោះពិន្ទុវាច្រើន"។ កញ្ញា រតនៈ បានបន្ថែមថា ធ្លាប់ល្បីពីមុនមក គឺវិញ្ញាសាត្រៀមនៅភ្នំពេញមានថ្ម័ីៗច្រើន ហើយក៏ស្រដៀងនឹងវិញ្ញាសាចេញប្រលងដែរ ព្រោះគ្រូសុទ្ធតែធ្លាប់មានបទពិសោធន៍យូរឆ្នាំ។

ចំណែកយុវសិស្ស ព្រំ បុរិន មកពីវិទ្យាល័យ សុខអាន សន្លុងខេត្តតាកែវ ដែលបានឡើងមករៀននៅភ្នំពេញបានរយៈពេល១០ថ្ងៃ បានឲ្យដឹងថា រូបគេទៅរៀននៅសាលាជ័យថាវី ដោយស្គាល់តាមរយៈមិត្តភ័ក្ដិ។ យុវជនរូបនេះបាននិយាយថា៖ "មកតាមពួកម៉ាក ។ ហើយរៀនទាំងអស់ គ្រប់មុខវិជ្ជាបង។... អត់សូវចេះមុខវិជ្ជាគណិតវិទ្យាជាងគេ "។

អត្ថបទ៖ មាន រតនា