Corolla រូបរាងថ្មីចេញលក់នៅជប៉ុន មិនប្រើឡូហ្គោ Toyota នៅពីមុខ
- 2019-09-18 03:52:18
- ចំនួនមតិ 0 | ចំនួនចែករំលែក 0
Corolla រូបរាងថ្មីចេញលក់នៅជប៉ុន មិនប្រើឡូហ្គោ Toyota នៅពីមុខ
ចន្លោះមិនឃើញ
រថយន្ត Toyota Corolla ជំនាន់ទី ១២ បានចេញលក់នៅក្នុងទឹកដីកំណើតរបស់ខ្លួនជាផ្លូវការ ដោយវាមានជម្រើសចំនួន ៣ ប្រភេទដូចលក់នៅអឺរ៉ុបដែរ គឺ Corolla (ប្រភេទ Sedan), Corolla Touring (ប្រភេទ Wagon) និង Corolla Sport (ប្រភេទ Hatchback)។
ប្រភេទ Corolla និង Corolla Touring ដែលដាក់លក់នៅជប៉ុន គឺមានផ្នែកខាងមុខដូចជាម៉ូដែល Levin ដែលលក់នៅប្រទេសចិន ចំណែក Corolla Sport មានរូបរាងដូចនឹងម៉ូដែលដែលលក់នៅអឺរ៉ុប និងសហរដ្ឋអាមេរិក។
គួរឲ្យចាប់អារម្មណ៍នោះគឺ Corolla ដែលលក់នៅជប៉ុន មានបំពាក់នូវឡូហ្គោអក្សរ "C” នៅខាងមុខ ជំនួសឲ្យឡូហ្គោ Toyota ប៉ុន្តែនៅផ្នែកខាងក្រោយ និងនៅលើគម្របយ៉ាន់នៅមានបំពាក់ឡូហ្គោ Toyota ដដែល។
ចំពោះម៉ាស៊ីនគឺមានចាប់ពីម៉ាស៊ីនចំណុះ ១,៨ លីត្រ ៤ ស៊ីឡាំង ភ្ជាប់នឹងប្រអប់លេខ ៧ វគ្គ និងប្រព័ន្ធបើកបរវិលកង់មុខ ដែលវាមានសម្រាប់តែប្រភេទ Corolla និង Corolla Touring។ បន្ទាប់មកគឺម៉ាស៊ីន ១,២ លីត្រ Turbocharged ៤ ស៊ីឡាំង ដែលអាចភ្ជាប់នឹងប្រអប់លេខ ១០ វគ្គ ឬ ៦ វគ្គ ដោយមានសម្រាប់គ្រប់ម៉ូដែល។
ចុងក្រោយគឺម៉ាស៊ីន Hybrid ដែលប្រើម៉ាស៊ីន ១,៨ លីត្រ ៤ ស៊ីឡាំង គួបផ្សំនឹងម៉ូទ័រអគ្គិសនីមួយ ប្រើប្រាស់ប្រព័ន្ធបើកបរវិលកង់មុខ (សម្រាប់គ្រប់ប្រភេទ) និងមានប្រភេទបើកបរវិលកង់ទាំងអស់ផងដែរ (សម្រាប់តែ Corolla និង Corolla Touring)។
តម្លៃ Corolla ស៊េរីថ្មីនៅជប៉ុនគឺមានចាប់ពី ១,៩៣ លានយេន (ប្រមាណ ១៧ ៨៨៨ ដុល្លារ) រហូតដល់ ២,៩៩ លានយេន (ស្មើប្រមាណ ២៧ ៦៩៧ ដុល្លារ)៕
ចុចអាន ៖ តិចទៀត រថយន្ត Prius នឹងប្រើថាមពលព្រះអាទិត្យសុទ្ធសាធតែម្ដង