ស្រស់ស្អាត វ័យក្មេង តែ សំណាង អេលីណា មានមហិច្ឆតាធំសម្បើម ក្នុងជួរការងាររដ្ឋ!
- 2020-02-27 04:06:08
- ចំនួនមតិ 0 | ចំនួនចែករំលែក 0
ស្រស់ស្អាត វ័យក្មេង តែ សំណាង អេលីណា មានមហិច្ឆតាធំសម្បើម ក្នុងជួរការងាររដ្ឋ!
ចន្លោះមិនឃើញ
ត្បិតថាបានចូលខ្លួនក្នុងវិស័យសិល្បៈ ប៉ុន្តែអតីតបវរកញ្ញាកម្ពុជាឆ្នាំ ២០១៩ កញ្ញា សំណាង អេលីណា មានមហិច្ឆតាធំសម្បើមនៅក្រៅរង្វង់នេះ ដូច្នេះហើយ ទើបនាងប្រឹងប្រែងរៀនសូត្រខ្លាំងនាពេលបច្ចុប្បន្ន។
តាមការបញ្ជាក់របស់សាមីខ្លួន នាងមានបំណងធ្វើជាមន្ត្រីទំនាក់ទំនងផ្នែកការទូតមួយរូប។ នេះជាការងារដែលតារាស្រី បញ្ជាក់ថា ជាអ្វីដែលនាងស្រឡាញ់បំផុត។ "ខ្ញុំចូលចិត្តធ្វើការក្នុងការងារណាដែលអាចឲ្យខ្ញុំផ្សព្វផ្សាយពីកម្ពុជា ពីវប្បធម៌ ចង់ធ្វើការងារណាដែលអាចឲ្យខ្ញុំបានទំនាក់ទំនងមនុស្ស ព្រោះនិយាយទៅគឺខ្ញុំចូលចិត្តការទំនាក់ទំនងតែម្ដង។ សំណាង អេលីណា ថ្លែង។
ការងារជាមន្ត្រីការទូត ទាមទារឲ្យមានចំណេះដឹងខ្ពស់ ទូលំទូលាយ មានភាពបត់បែន និងមានចំណេះដឹងភាសាបរទេសល្អ។ ឈរលើហេតុផលនេះ អេលីណា ប្រាប់ថា សព្វថ្ងៃ នាងកំពុងតែប្រឹងប្រែងលើការងារទាំងនេះ ពិសេសកំពុងព្យាយាមពង្រឹងសមត្ថភាពប្រើប្រាស់អង់គ្លេស ដោយបច្ចុប្បន្ននេះ នាងកំពុងសិក្សាឆ្នាំទី២ នៅសកលវិទ្យាល័យបញ្ញាសាស្ត្រជំនាញទំនាក់ទំនងអន្តរជាតិ។
ទាំងនេះ ក៏ជាមូលហេតុដែលប្រមាណ១ឆ្នាំហើយ ដែលប្រិយមិត្តរបស់នាង មិនដែលឃើញ អេលីណា ហក់ចូលប្រឡូកក្នុងវិស័យភាពយន្ត បើទោះជានាងអំណោយផលទាំងវ័យ និងសម្រស់ស្រស់ស្អាតក៏ដោយ។ អេលីណា ប្រាប់ថា នាងមិនព្រមទទួលការថតភាពយន្តរហូតមក បញ្ញាក៏ព្រោះតែខ្លាចប៉ះពាល់ដល់ការសិក្សារបស់។ តារាស្រីវ័យ ១៩ឆ្នាំ ប្រាប់ថា ភាពយន្តមួយរឿងៗ ត្រូវការចំណាយពេលថតច្រើនថ្ងៃ បែបនេះចង់មិនចង់ គឺប៉ះពាល់ការងារសិក្សានាង។
ដូច្នេះហើយ ម្ដងជាពីរដង ស្រីស្អាត បានបញ្ជាក់ថា នាងបានច្រានចោលការទាក់ទងពីផលិតករ ក៏ដូចជាម្ចាស់ផលិតកម្មនានា។ ប៉ុន្តែនាងនៅទទួលត្រឹមការងារសិល្បៈមួយចំនួន ដូចជាថតសំអាងការ ស្ប៉តពាណិជ្ជកម្មនានា និងការងារធ្វើជាតារាតំណាងផលិតផល(Brand Ambassdor) ដែលការងារទាំងនេះ ត្រូវការពេលខ្លីជាងការថតរឿង ហើយនាងអាចលៃលកពេលឆ្លៀតពីការសិក្សាបាន។
អេលីណា បន្តឲ្យដឹងថា នាងនឹងបន្តការសិក្សារបស់នាងឲ្យដល់ទីសិន ប៉ុន្តែយ៉ាងណា ការសម្ដែងភាពយន្តក៏ទំនងជាមិនទាន់ជាជម្រើសទី១ដដែល ដោយនាងលើកឡើងថា នាងចង់សម្រេចក្ដីប្រាថ្នាក្នុងការធ្វើជា មន្ត្រីការទូតមួយរូបនេះ។ "ខ្ញុំគិតថា ខ្ញុំអាចធ្វើបាន ព្រោះការស្រឡាញ់បានជំរុញឲ្យខ្ញុំគិតអីចឹង គឺខ្ញុំចង់ធ្វើជាអ្នកការទូត ឬមន្ត្រីទំនាក់ទំនងអន្តរជាតិ អីចឹងហើយ គឺខ្ញុំចង់ធ្វើការនៅក្រសួងការបរទេស"។
សំណាង អេលីណា គឺជាជយលាភីបវរកញ្ញាកម្ពុជាឆ្នាំ ២០១៩។ ជាមួយនឹងតំណែងនេះ នាងធ្លាប់បានតំណាងកម្ពុជាចេញទៅប្រកួតសម្រស់ និងសមត្ថភាពនៅសហរដ្ឋអាមេរិកកាលពីពាក់កណ្ដាលឆ្នាំមុន។ យ៉ាងណា នាពេលនោះ នាងនបានទទួលលទ្ធផលល្អនោះឡើយ។ យ៉ាងណានាងនៅតែមោទកភាពក្នុងការបង្ហាញខ្លួនតំណាងឲ្យកម្ពុជា ហើយវាបានបន្តក្ដីសុបិនរបស់នាងក្នុងការងារជាអ្នកការទូត ដើម្បីផ្សព្វផ្សាយពីកម្ពុជាបន្តទៀត៕