ក្រុមមន្ត្រីពាក់ព័ន្ធ ចុះត្រួតពិនិត្យ និងប្រមូលទុកនូវបុរាណវត្ថុមួយចំនួន ក្រោយជីកសាងសង់អគារអគ្គីសនីកម្ពុជា

2019-03-02 09:18:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមមន្រ្តីពាក់ព័ន្ធ បានចុះទៅត្រួតពិនិត្យ និងប្រមូលទុកនូវវត្ថុបុរាណ ក្រោយជីករកឃើញវត្ថុបុរាណមួយចំនួន នៃការជីកគ្រឹះសាងសង់អគារអគ្គិសនីកម្ពុជា បន្ថែមនៅខាងកើតវត្តភ្នំ។ នេះបើយោងតាមការប្រកាសឲ្យដឹងពីផេកមន្ទីរវប្បធម៌ និងវិចិត្រសិល្បៈ រាជធានីភ្នំពេញ បង្ហោះសារលើផេករបស់ខ្លួន។

ពេលជីកគ្រឹះសាងសង់អគារ អគ្គិសនីកម្ពុជា

ប្រភពដដែលបានសរសេរទៀតថា កាលពីថ្ងៃទី ២៨ ខែកុម្ភៈ កន្លងទៅថ្មីៗនេះ ក្រសួងវប្បធម៌ និងវិចិត្រសិល្បៈ និងមន្ទីរវប្បធម៌ និងវិចិត្រសិល្បៈរាជធានីភ្នំពេញ នគរបាលបេតិកភណ្ឌនៃក្រសួងមហាផ្ទៃ នគរបាលបេតិកភណ្ឌរាជធានីភ្នំពេញ និងបានសហការពីអាជ្ញាធរជាតិអគ្គិសនីកម្ពុជា បានចុះពិនិត្យ និងប្រមូលទុកនូវបុរាណវត្ថុមួយចំនួន ដែលលេចចេញពីការជីកគ្រឹះដើម្បីសាងសង់អាគារអគ្គិសនីកម្ពុជាបន្ថែមមានទីតាំងខាងកើតវត្តភ្នំ។ បុរាណវត្ថុដែលប្រមូលបានរួមមានបដិមាសាងពីថ្មភក់ បដិមាពីលោហៈ និងកុលាលភាជន៍រឹងជាច្រើនទៀត។

ប្រភពពីមន្ទីរវប្បធម៌រាជធានីភ្នំពេញ បានឲ្យដឹងទៀតថា ករណីនេះ ក្រុមការងារបានធ្វើការទុកដាក់ក្នុងកន្លែងមានសុវត្ថិភាពនិងធ្វើការចុះបញ្ជីតាមលក្ខណៈបច្ចេកទេសជាបណ្ដោះអាសន្ន។ ក្រសួង ក៏ដូចជាមន្ទីរសូមជម្រាបដល់សាធារណៈជនបងប្អូនថាប្រសិនបើបងប្អូនបានជួបប្រទះរាល់វត្ថុទាំងឡាយណា ដែលជាវត្ថុបុរាណសូមបងប្អូនសហការរាយការណ៍ជូនមន្ទីរវប្បធម៌ និងក្រសួងដើម្បីចុះពិនិត្យដូចក្នុងករណីខាងលើ។