រឿងរ៉ាវខ្មៅងងឹតពីក្រោយពិភព K-Pop គ្រប់គ្នាអាចស្មានមិនដល់

2019-10-16 06:50:34
ចំនួនមតិ 0 | ចំនួនចែករំលែក 0

ចន្លោះមិនឃើញ

K-Pop ជាប្រភេទចម្រៀងមួយបែបដែលទទួលបានការចាប់អារម្មណ៍ខ្លាំងបំផុតនាពេលបច្ចុប្បន្ន។ គេមើលឃើញថា K-Pop គឺមានពោរពេញដោយភាពសប្បាយ ជាមួយបទចម្រៀងទាក់ចិត្ត និងវីដេអូចម្រៀងច្រុះពណ៌ស្អាត។ យ៉ាងណាក្ដីពេលខ្លះរូបរាងខាងក្រៅអាចបំភ័ន្តភ្នែកបាន។ បើចូលទៅឲ្យជ្រៅពិភព K-Pop មានរឿងរ៉ាវខ្មៅងងឹតជាច្រើន ដែលតារា K-Pop ត្រូវឆ្លងកាត់ ដើម្បីសម្រេចក្ដីស្រមៃរបស់ខ្លួន។

១. កុងត្រាទាសករ

ប្រសិនបើអ្នកជាអ្នកគាំទ្រ K-Pop យូរឆ្នាំ ប្រហែលជាធ្លាប់ឮពាក្យ "Slave Contract” ដែលមានន័យថា "កុងត្រាទាសករ"។ អតីតសមាជិកក្រុម JJCC ឈ្មោះ Prince Mak បានអះអាងថា "កុងត្រាទាសករ" មិនត្រឹមតែជារឿងពិតនោះទេ ហើយថែមទាំងមានការប្រើប្រាស់យ៉ាងទូលំទូលាយទៀតផង។

Prince Mak

Prince Mak បានប្រាប់រឿងនេះក្នុងកម្មវិធីវិទ្យុរបស់ខ្លួន "The Prince Mak Hour” ថា "ជាធម្មតាកុងត្រាមានរយៈពេល ៧ ទៅ ១៥ ឆ្នាំ។ ៧ ឆ្នាំជារយៈពេលដែលខ្ញុំធ្លាប់ឮតិចដងជាងគេ...សម្រាប់ខ្ញុំគឺមានកុងត្រា ៧ ឆ្នាំ ហើយខ្ញុំគិតថាខ្លួនឯងមានសំណាង។”

B.A.P

កាន់តែអាក្រក់នោះគឺ កុងត្រាទាំងនេះគិតចាប់ផ្ដើមពីពេលដែលតារារូបនោះចូលប្រឡូក (Debut) មិនរាប់ពីពេលដែលចូលក្នុងផលិតកម្មនោះទេ។ មានតារាខ្លះហ៊ានខ្លាំងដល់ថ្នាក់ឡើងតុលាការជាមួយផលិតកម្មទៀតផង ដូចជាក្រុម B.A.P នៅឆ្នាំ ២០១៤ ពួកគេបានចោទប្រកាន់ជាបើកចំហលើផលិតកម្ម TS Entertainment ចំពោះការដាក់កុងត្រាទាសករនេះ។

២. ធ្វើជាតារាបានប្រាក់កម្រៃតិចបំផុត

តាមការលើកឡើងរបស់ Prince Mak ដដែល ភាគរយខ្ពស់បំផុតនៃប្រាក់ចំណេញដែលតារាទទួលបានពី ២០% ដែលសេសសល់ ៨០% គឺបានទៅលើផលិតកម្ម។ តារាខ្លះបានតិចតួចដល់ ១០% ហើយវាត្រូវបែងចែកទៅតាមចំនួនសមាជិកនៃក្រុមទៀតផង។ ប្រសិនបើក្រុមមានសមាជិក ៥ នាក់ នោះម្នាក់ៗនឹងទទួលបានចំណែកលុយ ២% ប៉ុណ្ណោះ។ លុយ ២% នេះទៀតសោត តារាត្រូវសងទៅផលិតកម្ម ចំពោះការចំណាយដែលផលិតកម្មបានចំណាយលើពួកគេ ពេលស្ថិតក្នុងដំណាក់កាលហ្វឹកហាត់។

នៅឆ្នាំ ២០១៦ ក៏មានការបង្ហាញថាក្រុម AOA បានទទួលប្រាក់ចំណូលលើកដំបូង ក្រោយពីប្រឡូកសិល្បៈបាន ៣ ឆ្នាំ។ ដោយសារតែការចំណាយដូចជាការហ្វឹកហាត់ ថ្លៃស្នាក់នៅ និងអាហារជាដើម អ្នកហាត់ការ (Trainee) ត្រូវសងបំណុលនេះឲ្យក្រុមហ៊ុនវិញ នៅពេលបានចេញប្រឡូក។

៣. តារាៗធ្វើការរហូតខ្សោះខ្លួន

ក្នុងនាមជាតារា K-Pop វាគឺជាការងារពេញម៉ោងមួយ ហើយតារាៗខ្លះ អាចត្រូវធ្វើការលើសម៉ោងទៀតផង។ Prince Mak និយាយថា ៖ "អ្នកអាចនឹងធ្វើការ ២០ ម៉ោង ឬពេញមួយថ្ងៃក៏មាន។ ខ្ញុំធ្លាប់ធ្វើការដល់ ២០ ម៉ោង។ ខ្ញុំថតកម្មវិធីទូរទស្សន៍ ដែលវាមានរយៈពេលដល់ ២០ ម៉ោង មិនលេងសើចទេ។ ជារៀងរាល់ថ្ងៃយើងមានពេលសម្រាកប្រមាណ ៣ ទៅ ៤ ម៉ោង ក្រៅពីនេះត្រូវធ្វើការហ្វឹកហាត់ ឬធ្វើការ។”

ការធ្វើការលើសម៉ោង ក៏បានធ្វើឲ្យតារាកូរ៉េជាច្រើនរូបដួលសន្លប់នៅលើឆាកផងដែរ។ ជាក់ស្ដែងខាងក្រោមនេះជាវីដេអូបង្ហាញអំពីការដួលសន្លប់របស់ Krystal សមាជិក f(x) ៖

៤. របបអាហារមានការគ្រប់គ្រងយ៉ាងតឹងតែង

អ្នកហាត់ការ (Trainee) ជាច្រើនធ្លាប់បានលើកឡើងអំពីវិធីសាស្ត្រក្នុងការគ្រប់គ្រងទម្ងន់របស់ពួកគេ។ Chaeyeon សមាជិកក្រុម DIA ធ្លាប់បានបង្ហាញថានាងត្រួតពិនិត្យទម្ងន់របស់ខ្លួនជាប្រចាំ ដោយប្រើវិធីសាស្ត្រដូចជាវាស់កំភ្លៅដោយប្រើខ្សែម៉ែត្រ។ នាងថាមានការកំណត់មួយសម្រាប់ទម្ងន់របស់នាង ប្រសិនលើសពីការកំណត់ អាចទទួលរងការពិន័យ។

Momo ក្រុម TWICE ក៏ធ្លាប់បានបង្ហាញថាបានស្រកអស់ ៧ គីឡូក្រាមក្នុងពេលមួយសប្ដាហ៍។ នាងត្រូវក្រុមហ៊ុនប្រាប់ថាត្រូវតែសម្រក ៧ គីឡូក្រាម ដើម្បីអាចឡើងលើឆាកសម្ដែង។ នាងទទួលស្គាល់ថាមិនបានញ៉ាំអ្វីច្រើននោះឡើយ ក្រៅតែពីទឹកកកមួយដុំ និងហាត់ប្រាណពេញមួយសប្ដាហ៍។ Momo បកស្រាយថា ពេលផ្ដេកខ្លួនសម្រាក នាងភ័យខ្លាចថាមិនអាចងើបឡើងវិញនៅពេលព្រឹកឡើង ហើយគិតដល់រឿងនេះធ្វើឲ្យនាងចង់យំតែម្ដង៕

ចុចអាន ៖ មុន Sulli ធ្វើអត្តឃាត នាងក៏ធ្លាប់ស្នើឲ្យ SM ចាត់វិធានការលើជននិយាយព្យាបាទនាងដែរ

ប្រភព៖ Nicki Swift ប្រែសម្រួល៖ សុខហេង