Earth Hour មកដល់យប់នេះហើយ! សូមចូលរួមបិទភ្លើង ១ម៉ោង ជានិមិត្តរូប ដើម្បីភពផែនដីយើង!
- 2020-03-28 04:29:45
- ចំនួនមតិ 0 | ចំនួនចែករំលែក 0
Earth Hour មកដល់យប់នេះហើយ! សូមចូលរួមបិទភ្លើង ១ម៉ោង ជានិមិត្តរូប ដើម្បីភពផែនដីយើង!
ចន្លោះមិនឃើញ
ទិវា ១ម៉ោង សម្រាប់ភពផែនដីឆ្នាំនេះ ប្រព្រឹត្តឡើងស្របពេលពិភពលោក ប្រឈមនឹងប្រធានបទសំខាន់បន្ទាន់មួយចំនួន។ ជាក់ស្ដែង យើងអាចតាមដានមើលឃើញពីឥទ្ធិពលយាយីខ្លាំងឡើងៗ នៃការប្រែប្រួលអាកាសធាតុ ការបាត់បង់ធនធានជីវចម្រុះ ការបំពុលបរិស្ថាន ការរិចរិលដី កង្វះខាតទឹក និងហានិភ័យលើសុខភាពមនុស្ស។
អ្វីដែលជាដំណឹងល្អនោះគឺ គេអាចស្វែងរកដំណោះស្រាយចំពោះបញ្ហាទាំងនេះបាន ព្រោះថាយើងនៅមានលទ្ធភាពអាចទប់ស្កាត់ការប្រែប្រួលអាកាសធាតុ និងលទ្ធភាពក្នុងការការពារភពផែនដី ក៏ដូចជាថែរក្សាអនាគតរបស់យើង ប្រកបដោយនិរន្តរភាពបាន។
ទិវា ១ម៉ោងសម្រាប់ភពផែនដី ផ្ដល់ឱកាសឲ្យសាមញ្ញជនគ្រប់រូប ដើម្បីបង្ហាញនូវក្ដីស្រលាញ់របស់ពួកគេចំពោះបរិស្ថាន និងធម្មជាតិ ព្រមទាំងប្ដេជ្ញាចិត្តចាប់យកសកម្មភាពនានា ដែលនាំឲ្យមានការផ្លាស់ប្ដូរជាវិជ្ជមានក្នុងការរស់នៅប្រចាំថ្ងៃ សម្រាប់ជាការរួមចំណែកដល់សង្គមមួយប្រកបដោយនិរន្តរភាព។
ទិវា១ម៉ោងសម្រាប់ភពផែនដី បង្រួបបង្រួមប្រជាជនទាំងអស់ ដើម្បីការពារភពផែនដីរបស់យើង។
ប្រជាជនទាំងអស់ កំណត់យកទិវានេះសម្រាប់ពិចារណា ហើយស្វែងរកវិធីសាស្រ្ដផ្សេងៗ ដើម្បីចូលរួមការពារភពផែនដី ឲ្យមានលក្ខណៈប្រសើរឡើង។ វិធីសាស្រ្ដទាំងនោះ មានដូចជា៖ ការសន្សំសំចៃ និងការកែច្នៃសម្រាប់ប្រើប្រាស់ឡើងវិញ ការកាត់បន្ថយសារធាតុប្លាស្ទិក ការងារទៅចាប់យកការប្រើប្រាស់ថាមពលកកើតឡើងវិញ ក៏ដូចជាកំណត់វិធានការដើម្បីកាត់បន្ថយកម្រិតកាបូន ដែលទាំងនេះ សុទ្ធតែជាវិធីសាស្រ្ដគន្លឹះសម្រាប់ការពារភពផែនដីរបស់យើង។
សូមចូលរួមបិទភ្លើងជានិមត្តរូប នៅក្នុងយប់នេះ រយៈពេល ១ម៉ោង នៅតាមគេហដ្ឋានរៀងៗខ្លួន សម្រាប់ភពផែនដីយើង ហើយប្ដេជ្ញាចិត្តជាថ្មី ក្នុងការរួមគ្នាប្រយុទ្ធនឹងការប្រែប្រួលអាកាសធាតុ។
លោក សេង ទៀក នាយកអង្គការ WWF ប្រចាំកម្ពុជា មានប្រសាសន៍ថា៖ "បន្ទាប់ពីការបង្ហាញឆន្ទៈដោយសារបិទភ្លើង១ម៉ោងនេះរួច យើងខ្ញុំសូមស្នើយ៉ាងទទូចដល់ប្រជាជនទាំងអស់ ឲ្យបន្តធ្វើសកម្មភាពវិជ្ជមានសម្រាប់ភពផែនដី និងបង្កើនការសន្ទនា និងពិភាក្សាឲ្យបានទូលំទូលាយអំពីវិធីសាស្រ្ដអនុវត្តល្អៗ ដែលយើងទាំងអស់គ្នា អាចធ្វើបានជាប្រចាំ ដើម្បីរួមចំណែកធានានិរន្តរភាព នៃជីវចម្រុះ នៃការប្រើប្រាស់ថាមពល នៃអាហារ និងទឹកដែលយើងបរិភោគ សម្រាប់ប្រយោជន៍យូរអង្វែងដល់មនុស្សគ្រប់ៗគ្នា"។
លោកមានប្រសាសន៍បន្ថែមថា៖ "សកម្មភាពវិជ្ជមានរបស់យើងនៅថ្ងៃនេះ និងនៅអនាគតសម្រាប់ភពផែនដី បង្កើតបានជាទង្វើគំរូល្អ និងជាកេរ្តិ៍តំណែលសម្រាប់មនុស្សជំនាន់ក្រោយៗទៀត"។
ចូរយើងរួមគ្នាកសាងអនាគតមួយដែលមានបរិស្ថាន និងធម្មជាតិល្អប្រសើរ ស្រស់បំព្រង ប្រកបដោយសុវត្ថិភាព និងសេចក្ដីសុខក្នុងភាពបៃតងស្អាត សម្រាប់ជាប្រយោជន៍ដល់មនុស្សជំនាន់បច្ចុប្បន្ន និងអនាគត៕