នាយករដ្ឋមន្ត្រីថៃ ស្នើសុំឲ្យពួកអ្នកមានជួយ ព្រោះកូវីដ១៩អាចវាយប្រហារសេដ្ឋកិច្ចថៃ៩ខែទៀត
- 2020-05-06 07:02:32
- ចំនួនមតិ 0 | ចំនួនចែករំលែក 0
នាយករដ្ឋមន្ត្រីថៃ ស្នើសុំឲ្យពួកអ្នកមានជួយ ព្រោះកូវីដ១៩អាចវាយប្រហារសេដ្ឋកិច្ចថៃ៩ខែទៀត
ចន្លោះមិនឃើញ
សេដ្ឋកិច្ចថៃទំនងជានឹងបន្តរងផលប៉ះពាល់ពីការវាយប្រហារពីជំងឺកូវីដ១៩ រយៈពេល៩ខែទៀត នេះបើតាមនាយករដ្ឋមន្ត្រីប្រាយុទ្ធ ថ័ន្ទអូចា។
ក្នុងអំឡុងពេលធ្វើសន្និសីទកាសែតមួយក្រោយប្រជុំគណៈរដ្ឋមន្ត្រីកាលពីថ្ងៃអង្គារទី០៥ឧសភា លោកប្រាយុទ្ធ បាននិយាយថា "យើងរំពឹងថាផលប៉ះពាល់លើសេដ្ឋកិច្ចអូសបន្លាយពេលមួយរយៈទៀត មិនមែន៣ខែ តែអាច៦ទៅ៩ខែ។យើងត្រូវត្រៀមវិធានការដោះស្រាយ។" ឧត្តមសេនីយ៍ប្រាយុទ្ធ បាននិយាយទៀតថា លោកពិចារណាស្នើសុំអ្នកជំនួញមានៗសហការដោះស្រាយផលប៉ះពាល់សេដ្ឋកិច្ចបណ្តាលមកពីជំងឺឆ្លងនេះ ដូចដែលលោកបានធ្វើម្តងមកហើយគឺផ្ញើលិខិតទៅកាន់កំពូលអ្នកមាន២០រូបរបស់ប្រទេសដើម្បីសុំឲ្យពួកគេជួយ។ រដ្ឋាភិបាលថៃបានដាក់ចេញកញ្ចប់ថវិកាសង្គ្រោះសេដ្ឋកិច្ចនិងសម្រាលបន្ទុកតម្លៃ១,៩៧លានលានបាតជាកម្មវិធីសង្គ្រោះធំបំផុតដែលប្រទេសថៃមិនដែលធ្លាប់ដាក់ចេញដើម្បីសម្រាលការខូចខាតសេដ្ឋកិច្ចនិងទុក្ខសោកបង្កឡើងពីកូវីដ១៩។ក្នុងចំនួនទឹកប្រាក់នេះ ១លានលានបាតសម្រាប់ចែកដល់ប្រជាជនក្រីក្រដែលរងផលប៉ះពាល់ពីជំងឺឆ្លងនេះ ការចំណាយលើសុខាភិបាល ការស្តារសេដ្ឋកិច្ចនិងសង្គម។
ប្រាក់៥០០ពាន់លានបាតទៀតលៃទុកសម្រាប់គម្រោងឥណទានការប្រាក់ទាបដល់បណ្តាក្រុមហ៊ុនសហគ្រានធុនតូចនិងមធ្យមហើយប្រាក់៤០០ពាន់លានសម្រាប់មូលនិធិស្ថិរភាពមូលបត្រសារជីវកម្ម។ កាលពីខែមីនា ធនាគារកណ្តាលថៃបានព្យាករថា សេដ្ឋកិច្ចថៃនឹងមានកំណើនអវិជ្ជមាន(ដក)៥,៣ភាគរយនៅឆ្នាំនេះ ធៀបនឹងកំណើនវិជ្ជមាន២,៨ភាគរយដែលធនាគារបានព្យាករទុកនៅមុនផ្ទុះកូវីដ១៩។ ឧត្តមសេនីយ៍ ប្រាយុទ្ធ ក៏បានព្រមានថា ហាងណាដែលមិនអនុវត្តវិធានការគ្រប់គ្រងជំងឺ នឹងត្រូវបិទទ្វារ នៅពេលរដ្ឋាភិបាលបានចាប់ផ្តើមបន្ធូរបន្ថយវិធានការស្ថានភាពគ្រាអាសន្ន ក្នុងបំណងស្តារសេដ្ឋកិច្ចឡើងវិញ។
ការព្រមានរបស់លោកកើតឡើងចំពេលប្រជាជននាំគ្នាទៅផ្សារពពាក់ពពូន ដើម្បីទិញសុរា បន្ទាប់ពីបម្រាមលក់ស្រានិងស្រាបៀរត្រូវបានដកចេញនៅខេត្តជាច្រើននិងក្រុងបាងកក។ លោកប្រាយុទ្ធបានបញ្ជាក់ថា រដ្ឋាភិបាលត្រៀមបើកប្រទេសឡើងវិញដំណាក់កាលទី២ បើដំណាក់កាលទី១ទទួលបានជោគជ័យ៕