ប្រុសឡា ចេញមុខវិញព្រលប់នេះ អះអាងថា គ្មានរឿងវាយតប់ជាមួយនរណា

2021-01-26 13:18:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់បទ "នារីសក់ខ្លី" ប្រុស ឡា នៅព្រលប់ថ្ងៃទី ២៦ មករា ២០២១ នេះ បានចេញមកអះអាងជុំវិញរឿងរងបណ្ដឹងពីតារារ៉េប នេត្រ ចាន់តារាវីត ហៅ Vid Cooler ថាលោក មិនមានរឿងដូច្នោះឡើយ។

នៅព្រឹកមិញនេះ មានរឿងក្ដៅគគុកមួយក្នុងសង្គមសិល្បៈខ្មែរ ពិសេសក្នុងសង្គមសិល្បៈចម្រៀងរ៉េប ក្រោយតារាចម្រៀងរ៉េប Vid Cooler បានបញ្ចេញសារគួរឲ្យភ្ញាក់ផ្អើលទាំងព្រឹក បញ្ជាក់ពីការសម្រេចចិត្តរបស់រូបគេ ក្នុងការប្ដឹង ផ្ដល់ប្រុសឡា និង 4t5 ដែលលោកអះអាងថាជាប្អូនរបស់ ប្រុសឡា។ ហេតុផលនៃការប្ដឹងផ្ដល់ គឺមានពាក់ព័ន្ធនឹងករណីហិង្សាមួយ ដែល Vid Cooler អះអាងថា ខ្លួនបានទទួលរងអំពើហិង្សាពីភាគីខាង ប្រុសឡា បង្កដោយប្អូនប្រុសឈ្មោះ 4t5។

បើតាមឯកសារពាក្យបណ្ដឹង បង្ហោះជាសាធារណៈនៅលើហ្វេសប៊ុកដោយលោក នេត្រ ចាន់តារាវីដ ហៅ Vid Cooler បានឲ្យដឹងសាច់រឿងថា បានកើតឡើងកាលពីថ្ងៃទី ៦ ខែសីហា ២០២០ ម្ល៉េះ។ កាលណោះ បើតាមសំដីរបស់ Vid Cooler នៅក្នុងពាក្យបណ្ដឹង គឺនៅវេលាម៉ោង ៤ :០០ លោកបានទៅទទួលទានអាហារនៅហាងផ្តះលេខ ២៥ E0 ផ្លូវលេខ ១៨៤ សង្កាត់ជ័យជំនះខណ្ឌដូនពេញ ដោយខាងលោកមានគ្នា ២នាក់អង្គុយញុំាស្រាបៀ។

ពេលនោះ លោកបានដើរទៅតុមួយផ្សេងដែលមានប្រុសឡានិងគ្នីគ្នា៤នាក់កំពុងញុំាអាហារជុំគ្នាដែរ។ Vid Cooler បញ្ជាក់ថា លោកបានយកកែវទៅក្នុងបំណងសុំជល់កែវជាមួយភាគីប្រុសឡា ហើយពេលនោះ ប្រុសឡា បាននិយាយថា "ថ្ងៃនេះវាយបង់លុយ" ហើយលោកបានហៅប្រុសឡាចេញមកក្រៅដើម្បីនិយាយគ្នា ប៉ុន្តែពេលចេញដល់ខាងក្រៅ មិនទាន់បាននិយាយគ្នាផង ស្រាប់តែឈ្មោះ 4t5 ដែលលោកអះអាងថាជាប្អូនរបស់ប្រុសឡា បានយកដបស្រាវាយលោកបណ្ដាលឲ្យរបួសដេរ ៣០ថ្នេរ ឯអ្នកបង្កក៏បានគេចខ្លួនបាត់។

ករណីនេះ Vid Cooler បានប្ដឹងប្រុសឡា អាយុ ៣៥ឆ្នាំ និងប្អូនឈ្មោះ 4t5 អាយុ ២២ឆ្នាំ ព្រមទាំងគូកន២នាក់ទៀត ពីបទ ហិង្សាដោយចេតនា មានស្ថានទម្ងន់ទោស។ ងាកមកភាគីខាង ប្រុសឡា ប្រមាណ ១ម៉ោងក្រោយមក ក៏បានចេញសារតាមក្រោយ ដោយស្នើឲ្យប្រិយមិត្តរង់ចាំទទួលបានព័ត៌មានទាំងសងខាងសិន ចាំថ្លឹងថ្លែង ហើយថា ករណីបណ្ដឹងរបស់ Vid Cooler មេធាវីលោក កំពុងពិនិត្យលើរឿងនេះហើយ។

យ៉ាងណាក៏ដោយ នៅប្រមាណ១ម៉ោងមុននេះ ប្រុសឡា បានចេញសារលើទំព័រហ្វេសប៊ុករបស់លោកថ្មីទៀតថា លោកមិនមានរឿងដូចព័ត៌មានខាងលើនោះទេ។ លោកសរសេរថា៖ ខ្ញុំសូមជម្រាបជូនសាធារណជន ក៏ដូចជាអង្គភាពសារពត៌មានជ្រាបថា ខ្ញុំបាទប្រុសឡាមិនបានបង្កហិង្សាទៅលើបុគ្គលណាម្នាក់នោះទេ"។

បន្ថែមពីលើនេះ លោកបានបន្តថា បុគ្គលមួយចំនួនបានផ្សព្វផ្សាយពត៌មានដូចខាងលើ ក្នុងគោលបំណងបរិហារដែលធ្វើអោយប៉ះពាល់ដល់កិត្តិយសរបស់លោក។ ដូច្នេះហើយ លោកបានបញ្ជាក់ថា បុគ្គលណាដែលមានបញ្ហា ជាមួយលោក សូមធ្វើការទាក់ទងលោកដោយផ្ទាល់ ដើម្បីដោះស្រាយ គ្នាតាមនិតិវិធីច្បាប់។

ជុំវិញបញ្ហានេះ សាមីខ្លួន ប្រុសឡា នៅតែមិនទាន់អាចសុំទំនាក់ទំនងដោយផ្ទាល់មាត់បាន ដោយការព្យាយាមខលទាក់ទងលោកតាមរយៈប្រអប់សារ(Messenger Calling) ចូល២ដង តែលោកមិនទទួល៕

ខាងក្រោមនេះ គឺជាឯកសារពាក្យបណ្ដឹង ដែលបញ្ចេញដោយ Vid Cooler