ច្រឡំមាត់ជាមួយពាក់មីហើយ! ថ្ងៃនេះលោក បញ្ជាក់ពីភក្ដីស្នេហ៍ចំពោះភរិយាតាមរយៈសំណេរខ្លីមួយ

2021-01-27 03:55:49
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែង ចែម ចាន់រា ហៅនាយពាក់មី បង្ហាញភាពស្និទ្ធស្នាលជាមួយភរិយាច្រើនណាស់ទៅកាន់មហាជនចាប់តាំងពីលោកមានឈ្មោះបោះសំឡេងក្នុងវិស័យសិល្បៈតាមរយៈអាជីពកំប្លែងរបស់លោក។ ភាពផ្អែមល្ហែម និងរស់នៅចុះសម្រុងគ្នាក្នុងភាពជាប្ដី-ប្រពន្ធនេះ ត្រូវបានគេមើលថាបើទោះបីជាលោកមានកេរ្តិ៍ឈ្មោះល្បី និងមានលុយក្រាស់ក្រែលទៅហើយក្ដីក៏នៅមានភក្ដីភាពចំពោះភរិយាដែលជាអតីតកម្មការិនីដែរ។

នៅព្រឹកថ្ងៃទី២៧ ខែមករា នេះ លោករំលឹកនូវពាក្យសម្ដីអ្នកធ្លាប់ស្គាល់លោកមួយចំនួនដែលទាយថាលោក និងភរិយា អាចនឹងបែកបាក់គ្នានៅពេលលោកមានកេរ្ដិ៍ឈ្មោះល្បីល្បាញ។ ពាក់មី៖"កាលប្រឡងកំប្លែងជាប់ដំបូងមានគេទាយថា យ៉ាងយូរ១ឆ្នាំ ពេលពាក់មីល្បីល្បាញ នឹងលែងប្រពន្ធដែលជាអតីតកម្មការិនីដែលមានប្រាក់ខែត្រឹមតែ៤៥ដុល្លារ ចោលហើយ"។

បើទោះបីជាលោកមិនបានបញ្ចេញចម្លើយ នៃការទាយនោះថាខុស ឬត្រូវយ៉ាងណា? ប៉ុន្ដែលោក បានសើច"ខិខិ" ហើយចង់បង្ហាញទៅកាន់មហាជនវិញថា សព្វថ្ងៃរូបលោក និងភរិយានៅស្រឡាញ់គ្នាដូចដើមមិនប្រែប្រួលសូម្បីតែបន្តិច ដោយបង្កើតបានកូនប្រុស-ស្រីដ៏គួរឲ្យស្រឡាញ់ជាចំណងដៃទៀតផង។

មុនពេលដែលលោក ចែម ចាន់រា ហៅនាយពាក់មី ប្រឡងជាប់ចូលក្រុមកំប្លែងប្រចាំស្ថានីយទូរទស្សន៍ CTN និងបានល្បីឈ្មោះខ្លាំងនៅអំឡុងឆ្នាំ២០១០ លោកធ្លាប់បង្ហើបថា រូបលោកគឺជាកម្មករសំណង់កម្សត់ម្នាក់ រីឯភរិយារបស់លោក គឺជាកម្មការិនីនៅរោងចក្រសានសាន ស្ថិតនៅម្ដុំលូ៥ ខណ្ឌមានជ័យ រាជធានីភ្នំពេញ៕

អត្ថបទ៖ ជិន សុភ័ក្ដ្រ