យកជ័រព្នៅត្បៀតក្លៀក! ឪពុក លី ច័ន្ទសីហា ថាលោកនៅតែជីវិត១ទៀតទេដែលត្រូវយកទៅបញ្ចាំយមរាជដើម្បីដោះបំណុល

2021-07-26 05:32:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ឪពុករបស់តារាសម្ដែង លី ច័ន្ទសីហា គឺលោក លី សុខជុន បង្ហាញលុយដុល្លារទាំងបាច់នៅក្នុងដៃពីយានដ្ឋានមួយនាថ្ងៃទី២៦ ខែកក្កដា នេះ ដោយលោកអះអាងថាលុយនេះបានមកពីការលក់ឡានដែលជាទ្រព្យចុងក្រោយរបស់លោកដើម្បីជួយដោះបំណុលគេដែលមានឈ្មោះរបស់លោកជាអ្នកធានាជាមួយម្ចាស់បំណុល។

លោក លី សុខជុន បានបង្ហោះសារដ៏វែងអន្លាយមួយតាមបណ្ដាញសង្គមFacebookដោយមានភ្ជាប់រូបថតពីរបីសន្លឹកនៅមុននេះបន្តិចថា ដល់ថ្ងៃម្ចាស់លុយគេទូរស័ព្ទមកធ្វើឲ្យលោកព្រលឹងនៅចុងសក់ តែអ្នកជំពាក់គេបែរជាមិនរវល់នឹងលោកសោះ។ លោកថានេះជាទ្រព្យចុងក្រោយរបស់លោកដែលត្រូវយកមកបញ្ចាំដើម្បីបង់ការប្រាក់ជំនួសគេរយៈពេលកន្លះឆ្នាំ ខណៈដែលលោកជួបទុក្ខផ្ទួនៗដែរ គឺលោកទើបស្លាប់បងៗពីរនាក់ ហើយលោកផ្ទាល់ក៏កំពុងតែឈឺដែរ។

លី សុខជុន៖"ខ្ញុំសូមផ្ដាំប្រាប់អ្នកថាចុងក្រោយគឺខ្ញុំនៅសល់តែជីវិតរបស់ខ្ញុំតែប៉ុណ្ណោះ ដែលត្រូវយកទៅចងការជាមួយយោមរាជធានាជំនួសអ្នកទៀត...អ្នកនៅមានឡានជិះហិចហើរទៅនេះទៅនោះ រក្សាទ្រព្យសម្បត្ដិរបស់អ្នកបានល្អណាស់។ ចំណែកខ្ញុំអស់រលីងពីខ្លួនដោយសារអ្នក"។

ឪពុករបស់តារាសម្ដែងរូបនេះ មិនបានបង្ហើបពីទំហំទឹកប្រាក់ជំពាក់គេ និងឈ្មោះអ្នកខ្ចីគេផ្ទាល់ដោយយកឈ្មោះលោកទៅធានានោះទេ។ រីឯដំណើរដើមទង នៃការខ្ចីបុលនោះក៏មិនទាន់ត្រូវបានលោកលាតត្រដាងដែរ ប៉ុន្តែលោកថា អ្នកដែលខ្ចីគេនោះ គឺជាកូនអ្នកមានពូជមានអំបូរ ស្គាល់បុណ្យស្គាល់បាប មិនគួរធ្វើបាបលោកឲ្យបញ្ចាំនេះបញ្ចាំនោះ លើកដាក់ប្រាក់ពីនេះទៅនោះ ដល់ពេលយូរៗទៅបែរជាលោកអ្នកយកឧស្សាហ៍គេ វ័នកលើសអ្នកជំពាក់លុយគេទៅទៀត៕

អត្ថបទ៖ ជិន សុភ័ក្ដ្រ