បាតុកម្មដែលចាប់ផ្តើមពីការតវ៉ារបស់សិស្សវិទ្យាល័យនៅប្រទេសបារាំង បានរីករាលដាលក្លាយជាចលនាតវ៉ាទូទាំងប្រទេស ដោយមានការចូលរួមពីសហជីពកម្មករ អ្នកគាំទ្រចលនា «អាវកាក់លឿង» និងក្រុមប្រជាជនផ្សេងៗ ដែលមិនពេញចិត្តនឹងការកើនឡើងនៃថ្លៃរស់នៅ ការខ្វះធនធានសាធារណៈ និងផែនការកាត់បន្ថយចំណាយរបស់រដ្ឋាភិបាល។

តាមសារព័ត៌មាន Al Jazeera ចេញផ្សាយថ្ងៃទី១៨ ខែតុលា ក្រសួងមហាផ្ទៃបារាំងបានឱ្យដឹងថា មនុស្សប្រមាណ ៥៥០ ០០០នាក់ បានចូលរួមបាតុកម្មទូទាំងប្រទេសកាលពីថ្ងៃទី១៧ ខែតុលា។ ភាគច្រើននៃបាតុករបានដើរដង្ហែក្នុងសន្តិវិធី ប៉ុន្តែមានក្រុមមួយចំនួនបានបំផ្លាញអគារ លួចទំនិញពីហាង និងប៉ះទង្គិចជាមួយប៉ូលិស។ នាយករដ្ឋមន្ត្រីបារាំង Sébastien Lecornu បាននិយាយថា មនុស្សប្រមាណ ១ ២០០នាក់ត្រូវបានចាប់ខ្លួន និងប៉ូលិស ១៥០នាក់រងរបួស។

បាតុកម្មបានចាប់ផ្តើមពីសិស្សវិទ្យាល័យនៅតំបន់ជាយក្រុងប៉ារីស ដែលទាមទារឱ្យមានគ្រូបង្រៀនគ្រប់គ្រាន់ បន្ទប់រៀនមិនចង្អៀតពេក អគារសិក្សាល្អប្រសើរ និងកាលវិភាគសិក្សាដែលមិនធ្វើឱ្យសិស្សហត់នឿយខ្លាំង។ បន្ទាប់មក ចលនានេះបានពង្រីកទៅកាន់ទីក្រុងជាច្រើន ដូចជា Lyon, Marseille និង Bordeaux។

បញ្ហានេះបានក្លាយជាវិបត្តិនយោបាយកាន់តែធ្ងន់ធ្ងរ នៅពេលការតវ៉ារបស់សិស្សបានភ្ជាប់ជាមួយការមិនពេញចិត្តរបស់កម្មករ និងប្រជាជនចំពោះស្ថានភាពសេដ្ឋកិច្ច។ ផែនការថវិកាឆ្នាំ២០២៧ របស់រដ្ឋាភិបាលមានវិធានការកាត់បន្ថយចំណាយ និងបង្កើនពន្ធសរុប ៥៤ពាន់លានអឺរ៉ូ ដើម្បីកាត់បន្ថយឱនភាពថវិកា។ សហជីពក៏ប្រឆាំងនឹងគម្រោងបង្កកប្រាក់បៀវត្សមូលដ្ឋានរបស់មន្ត្រីរដ្ឋ ដែលអាចបន្តជាឆ្នាំទី៤ជាប់គ្នា។

ប្រធានាធិបតី Emmanuel Macron បានព្រមានថា អ្នកដែលប្រព្រឹត្តអំពើហិង្សានឹងត្រូវទទួលទោសតាមច្បាប់។ ទន្ទឹមនឹងនេះ មេដឹកនាំគណបក្សឆ្វេងនិយម Jean-Luc Mélenchon បានរិះគន់ការឆ្លើយតបរបស់រដ្ឋាភិបាល ខណៈអ្នកវិភាគយល់ថា ការបែកបាក់នយោបាយក្រោយការបោះឆ្នោតសភាឆ្នាំ២០២៤ បានធ្វើឱ្យការស្វែងរកដំណោះស្រាយរួមកាន់តែពិបាក។

វិបត្តិនេះកើតឡើងនៅមុនការបោះឆ្នោតប្រធានាធិបតីបារាំងនៅខែមេសា ឆ្នាំ២០២៧។ បញ្ហាប្រឈមសម្រាប់រដ្ឋាភិបាល គឺមិនត្រឹមតែការរក្សាសណ្តាប់ធ្នាប់សាធារណៈប៉ុណ្ណោះទេ ប៉ុន្តែថែមទាំងការដោះស្រាយការព្រួយបារម្ភអំពីជីវភាពរស់នៅ គុណភាពអប់រំ និងសេវាសាធារណៈ ដែលបានជំរុញឱ្យប្រជាជនចេញមកតវ៉ា៕

ប្រភព៖ Al Jazeera