ដល់កហើយ! Taeyeon ត្រូវក្លាយជាជនរងគ្រោះខាតលុយអស់ទទេៗរាប់លាន ព្រោះចាញ់បោកឈ្មួញអចលនទ្រព្យ

2021-10-28 02:10:47
ចំនួនមតិ 0 | ចំនួនចែករំលែក 0

ចន្លោះមិនឃើញ

មានសេចក្តីរាយការណ៍ឲ្យដឹងថា Taeyeon (Girls’ Generation) ត្រូវក្លាយជាជនរងគ្រោះម្នាក់ក្នុងចំណោមជនរងគ្រោះជាច្រើននាក់ផ្សេងទៀត ដែលជាប់ពាក់ព័ន្ធនឹងករណីបោកប្រាស់អចលនទ្រព្យ ចំនួន ២៥០ពាន់លានវ៉ុន (ខ្ទង់ ២១៣លានដុល្លារ) ហើយសម្រាប់តែខ្លួននាងម្នាក់គឺ ត្រូវខាតអស់ ១,១០ពាន់លានវ៉ុន (ខ្ទង់៩៣៨,០០០ដុល្លារ)។

បើយោងតាមព័ត៌មានចេញផ្សាយពី Tenasia បានបញ្ជាក់ថា Taeyeon បានទិញដីនៅស្រុក Hanam ខេត្ត Gyeonggi កាលពីឆ្នាំ ២០១៩ ពីក្រុមហ៊ុនអចលនទ្រព្យធំមួយ ក្នុងតម្លៃ ១,១០ពាន់លានវ៉ុន (ខ្ទង់ ៩៣៨,០០០ដុល្លារ)។ ទោះជាយ៉ាងណា ដីដែលនាងបានទិញនោះស្ថិតក្នុងតំបន់ភ្នំត្រូវបានគេកំណត់ថា មិនស័ក្តិសមសម្រាប់ការអភិវឌ្ឍទេ លើកលែងតែសម្រាប់ប្រើប្រាស់ក្នុងវិស័យយោធា ឬជាគ្រឹះស្ថានសាធារណៈ។ នៅក្រោមច្បាប់អភិរក្សព្រៃឈើ ដីដែលចោទសួរ គឺស្ទើរតែមិនអាចអភិវឌ្ឍបាន ដោយសារវាជាតំបន់ដីដែលត្រូវអភិរក្ស។

ក្រុមហ៊ុនអចលនទ្រព្យ បានទិញដីនេះក្នុងតម្លៃ ៤០០លានវ៉ុន (ខ្ទង់៣៤១,០០០ដុល្លារ) ហើយ៣ខែក្រោយ ក្រុមហ៊ុនក៏បានលក់ឲ្យទៅ Taeyeon ក្នុងតម្លៃ ១,១០ពាន់លានវ៉ុន (ខ្ទង់ ៩៣៨,០០០ដុល្លារ) ប៉ូលីសជឿជាក់ថា ក្រុមហ៊ុនអចលនទ្រព្យនេះបានបំបែកដីភ្នំនោះ ទៅជាកំណាត់តូចៗ ហើយលក់ដីឡូត៍ទៅឲ្យ មនុស្សជាង ៣០០០ នាក់ ដោយបញ្ឆោតពួកគេដោយនិយាយថា ពួកគេមានព័ត៌មានអ្នកអភិវឌ្ឍខាងក្នុងអំពីតំបន់ថ្មីបន្ទាប់ ដែលនឹងត្រូវបានអភិវឌ្ឍឡើងវិញ។ ក្រុមហ៊ុនថែមទាំងបានផ្សាយពាណិជ្ជកម្មតាមកញ្ចក់ទូរទស្សន៍ ហើយតារាកំប្លែងដ៏ល្បីម្នាក់គឺជា Salepeople របស់ពួកគេ។

ទាក់ទងនឹងបញ្ហានេះ ក្រុមហ៊ុន SM បានបដិសេធ សុំមិនធ្វើការបកស្រាយអ្វីទាំងអស់ ដោយបញ្ជាក់ថានេះ គឺជាជីវិតឯកជន និងទ្រព្យសម្បត្តិរបស់ Taeyeon ទើបពួកគេមិនចង់បញ្ចេញមតិអ្វីច្រើន៕

ប្រភព៖ Koreaboo ប្រែសម្រួល៖ យី សុធារី