Ancelotti សរសើរខ្លាំងៗថា សមត្ថភាព Vinicius ឡើងមួយកម្រិតទៀតហើយ

2021-11-29 13:12:14
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Carlo Ancelotti គ្រូបង្គោលក្លឹប Real Madrid បានធ្វើការសរសើរខ្សែប្រយុទ្ធវ័យក្មេង Vinicius Jr ខ្លាំងៗនៅក្នុងថ្ងៃនេះក្រោយជួយឲ្យឈ្នះការប្រកួតតទល់នឹងក្លឹប Sevilla ថាសមត្ថភាព កីឡាករវ័យ២១ឆ្នាំឡើងមួយកម្រិតទៀតហើយ ក្នុងផ្លូវឈានទៅក្លាយជាកីឡាករដ៏ឆ្នើមមួយរូបនៅលើពិភពលោក។

លោក Ancelotti បាននិយាយថា៖" អ្វីដែលធ្វើឲ្យខ្ញុំភ្ញាក់ផ្អើលនឹងសមត្ថភាពរបស់ Vinicius នោះ គឺគុណភាពនៃការស៊ុតបញ្ចូលទីរបស់គេតែម្ដង។ រឿងសមត្ថភាពផ្សេងៗរបស់គេទៀតដូចជា រឿងញាក់ ដណ្ដើមបាល់ មួយទល់មួយអីហ្នឹង ខ្ញុំមិនសូវភ្ញាក់ផ្អើលប៉ុន្មានទេ ព្រោះខ្ញុំដឹងថាគេខ្លាំងខាងហ្នឹងណាស់ "។

លោកបានបន្តថា៖" និយាយទៅថ្ងៃនេះ គេបង្ហាញសមត្ថភាព ដែលខ្ញុំគិតថា គេមិនធ្លាប់មានពីមុនមក។ អញ្ចឹងគេឡើងមួយជំហានទៀត ក្នុងផ្លូវឈានទៅ ក្លាយជាកីឡាករដ៏ឆ្នើមមួយរូបនៅលើពិភពលោក។ អ្វីដែលសំខាន់បំផុតគឺថា គេផ្ដោតលើការបញ្ចប់ទីហ្នឹងតែម្ដង អញ្ចឹងឲ្យតែឱកាស គេដឹងតែស៊ុតយកហើយ "។

នៅក្នុងការប្រកួតខាងលើ Vinicius ជាអ្នកជួយ Real ឲ្យឈ្នះនូវលទ្ធផល ២-១ ដោយកីឡាកររូបនេះជាអ្នកស៊ុតបញ្ចូលទីចុងម៉ោង ជួយក្រុមគេឲ្យឈ្នះបែបនេះ។

នៅក្នុងរដូវកាលនេះ កីឡាករវ័យក្មេងនេះចូលលេងឲ្យ Real បាន១៩ប្រកួតហើយ និងរកគ្រាប់បាល់បាន ១១គ្រាប់៕

ប្រភព៖ Dailymail ប្រែសម្រួល៖ ហ៊ីម រស្មី