សហព័ន្ធកីឡាហុកគី៖ អ្នកមានសមត្ថភាពខ្លាំង និងលេចធ្លោជាប់ជាជម្រើសជាតិបន្តទៀត
- 2021-12-27 03:33:41
- ចំនួនមតិ 0 | ចំនួនចែករំលែក 0
សហព័ន្ធកីឡាហុកគី៖ អ្នកមានសមត្ថភាពខ្លាំង និងលេចធ្លោជាប់ជាជម្រើសជាតិបន្តទៀត
ចន្លោះមិនឃើញ
សហព័ន្ធកីឡាហុកគីកម្ពុជា បានធ្វើតេស្តសមត្ថភាពក្រុមកីឡាការិនីដើម្បីជ្រើសរើសអ្នកដែលខ្លាំងៗ និងលេចធ្លោជាងគេដើម្បីជាប់ជាតិជម្រើសជាតិបន្តប្រមូលផ្ដុំហ្វឹកហាត់ជាថ្មីនៅឆ្នាំ២០២២ ខាងមុខនេះ។
លោក កាំង សុធា អគ្គលេខាធិការសហព័ន្ធខាងលើនេះបានបញ្ជាក់ថា កាលធ្វើតេស្តលើកចុងក្រោយនេះគឺមានសារសំខាន់ណាស់ក្នុងការសម្រេចថាកីឡាការិនីរូបណាខ្លះដែលមានសមត្ថភាពខ្លាំងៗ និងត្រូវជាប់ជម្រើសជាតិជាថ្មីទៀត។
អគ្គលេខាធិការរូបនេះបន្តទៀតថា តាមការសង្កេតការប្រកួតមើលឃើញថាម្នាក់ៗមានការរីកចម្រើនច្រើន ប៉ុន្តែដោយសារតែការជ្រើសរើសមានកំណត់ និងផ្ដោតលើតែអ្នកខ្លាំងដូច្នេះក៏មានអ្នកធ្លាក់ផងដែរ។ ធម្មតាការប្រកួតតែងតែមានអ្នកធ្លាក់ អ្នកជាប់អាស្រ័យលើសមត្ថភាពជាក់ស្ដែង យ៉ាងណាអ្នកដែលមិនបានជាប់សូមបន្តខំប្រឹងប្រែងហ្វឹកហាត់ដើម្បីមានឱកាសលើកក្រោយទៀត។
រំលឹកដែរថា សហព័ន្ធកីឡាហុកគីកម្ពុជា បានធ្វើការប្រកួតតេស្តសមត្ថភាពកីឡាការិនីរបស់ខ្លួនកាលពីថ្ងៃទី២៣-២៤ នៅពហុកីឡដ្ឋានមរតកតេជោ។ ការធ្វើតេស្តនេះដើម្បីជ្រើសរើសអ្នកដែលមានសមត្ថភាពល្អជាប់ជម្រើសជាតិ និងបន្តប្រមូលផ្ដុំហ្វឹកហាត់នៅឆ្នាំថ្មីនេះ៕