ហេតុអ្វីប្រទេសថៃ មិនមានប្រេនរថយន្តផ្ទាល់ខ្លួន?

2024-08-06 03:39:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសថៃ សម្បូរទៅដោយរោងចក្រផលិត និងដំឡើងរថយន្តយ៉ាងច្រើន ហើយក៏ជាទីផ្សាររថយន្តដ៏ធំមួយនៅតំបន់អាស៊ានផងដែរ ប៉ុន្តែរោងចក្រទាំងនោះគឺសុទ្ធតែជារបស់បរទេសទាំងអស់ ពោលគឺមិនមានប្រេនរថយន្តផ្ទាល់ខ្លួននោះទេ ដោយខុសពីកម្ពុជា មានប្រេនរថយន្ត GTV ទើបបង្កើតថ្មី និងវៀតណាម មានប្រេន VinFast ហើយម៉ាឡេស៊ី មានប្រេន Proton និង Perodua ជាដើម។

មូលហេតុដែលថៃមិនមានប្រេនរថយន្តផ្ទាល់ខ្លួន គឺអាចបណ្តាលមកពីកត្តាមួយចំនួនដូចខាងក្រោមនេះ៖

ទំហំទីផ្សារក្នុងស្រុក៖ បើទោះបីជាទីផ្សាររថយន្តថៃ មានទំហំធំនៅក្នុងតំបន់ក៏ដោយ តែបើប្រៀបធៀបជាមួយទីផ្សាររថយន្តប្រទេសមួយចំនួនទៀត ដូចជា ចិន អាមេរិក ឬ ជប៉ុន គឺទីផ្សារថៃ នៅតែតូច។ ហេតុនេះ ប្រសិនបើមានការវិនិយោគបង្កើតប្រេនរថយន្តផ្ទាល់ខ្លួនក្នុងស្រុក គឺមានហានិភ័យដែលពិបាកដល់ការលក់ចេញ និងមិនអាចបង្កើតប្រាក់ចំណេញបានឡើយ។
ការគ្របដណ្តប់របស់ប្រេនបរទេស៖ ក្រុមហ៊ុនរថយន្តបរទេសធំៗជាច្រើន មានវត្តមានវិនិយោគក្នុងប្រទេសថៃ ជាយូរមកហើយ និងរឹងមាំទាំងការផលិត និងបណ្តាញចែកចាយ ជាពិសេសគឺក្រុមហ៊ុនជប៉ុន និងក្រុមហ៊ុនចិនដែលកំពុងចូលមកថ្មីៗនេះទៀត មិនងាយធ្វើឱ្យប្រេនរថយន្តថ្មីក្នុងស្រុក អាចប្រកួតប្រជែងបានឡើយ។
កង្វះខាតធនធានមនុស្ស៖ ក្នុងឧស្សាហកម្មរថយន្ត តម្រូវឱ្យមានជំនាញខ្ពស់ដូចជា វិស្វកម្ម, អ្នករចនា និងជំនាញផលិត។ ដូច្នេះ ប្រទេសថៃ ទំនងជាខ្វះធនធានទាំងនេះ។
បច្ចេកវិទ្យានៅមានកម្រិត៖ បច្ចេកវិទ្យាដែលប្រើប្រាស់ក្នុងការផលិត និងអភិវឌ្ឍរថយន្ត គឺស្មុគស្មាញ និងប្រែប្រួលជានិច្ច។ ការអភិវឌ្ឍបច្ចេកវិទ្យាទាំងនេះ តម្រូវឱ្យមានការចំណាយវិនិយោគ និងពេលវេលាជាច្រើន ដែលជាឧបសគ្គដ៏សំខាន់មួយសម្រាប់ក្រុមហ៊ុនរថយន្តថ្មីៗ ខណៈក្រុមហ៊ុនល្បីៗក្នុងពិភពលោក មានបទពិសោធន៍ និងអភិវឌ្ឍបច្ចេកវិទ្យារបស់ខ្លួនជាប់ជាប្រចាំអស់រថយៈពេលជាច្រើនឆ្នាំមកហើយ៕