ប័ណ្ណមាសអាមេរិក ដែលបានប្រកាសដោយប្រធានាធិបតី ដូណាល់ ត្រាំ នៅថ្ងៃទី២៥ ខែកុម្ភៈ ឆ្នាំ២០២៥ គឺជាកិច្ចខិតខំប្រឹងប្រែងដើម្បីផ្លាស់ប្តូរកម្មវិធីអន្តោប្រវេសន៍អាមេរិក ដោយបង្កើត ផ្លូវថ្មីមួយដែលនឹងមកជំនួសកម្មវិធីទិដ្ឋាការ EB-5 ដែលមានស្រាប់នៅក្នុងប្រទេសអាមេរិក។

កម្មវិធីទិដ្ឋាការ EB-5 បានចាប់ផ្តើមនៅឆ្នាំ១៩៩០ ហើយបានអនុញ្ញាតឱ្យអ្នកវិនិយោគបរទេសទទួលបានការអន្តោប្រវេសន៍មកកាន់សហរដ្ឋអាមេរិកដោយការវិនិយោគប្រហែលជាង ១លានដុល្លារ ក្នុងការបើកអាជីវកម្មដែលបង្កើតការងារ ដល់មនុស្សចំនួនដប់នាក់ ឬច្រើនជាងនេះ។

ប័ណ្ណមាសអាមេរិក នឹងតម្រូវឱ្យអ្នកវិនិយោគបរទេសវិនិយោគ ៥ លានដុល្លារដើម្បីទទួលបានការអន្តោប្រវេសន៍មកកាន់សហរដ្ឋអាមេរិក ជាមួយនឹងការបើកផ្លូវ ឈានទៅយកសញ្ជាតិអាមេរិកផងដែរ។ កិច្ចខិតខំប្រឹងប្រែងនេះមានគោលបំណងចង់ទាក់ទាញអ្នកវិនិយោគដ៏សម្បូរបែបនៅក្នុងប្រទេសអាមេរិក។

“ពួកគេនឹងមានទ្រព្យសម្បត្តិច្រើន និងជោគជ័យ ហើយពួកគេនឹងចំណាយប្រាក់ច្រើន និងបង់ពន្ធច្រើន ហើយជួលបុគ្គលិកច្រើន។ យើងគិតថាវានឹងជោគជ័យខ្លាំងណាស់" លោកត្រាំបាននិយាយនៅថ្ងៃអង្គារពីការិយាល័យអូវ៉ាល់ Oval យោងតាមរបាយការណ៍ពីសារព័ត៌មាន AP៕