មហោស្រពភាពយន្តវីដេអូសម្រាប់កុមារអាស៊ីអាគ្នយ៍ (Southeast Asia Video Festival for Children - SEAVFC) ត្រូវបានចាប់បដិសន្ធិឡើងតាំងពីឆ្នាំ២០១៧មក នៅទីក្រុងម៉ានីឡា ប្រទេសហ្វីលីពីន ដើម្បីអបអរដល់ស្នាដៃវីដេអូដែលផលិតដោយ និងស្តីពីកុមារ ពីបណ្តាប្រទេសអាស៊ីអាគ្នេយ៍ទាំង១០។​

​ដើម្បីស្វាគមន៍ជំនាន់ថ្មី SEAVFC បានបើកប្រកាសទទួលរឿងប្រកួត ដល់វីដេអូខ្លី ចាប់តាំងពីចុងខែមេសាកន្លងទៅ។ មហោស្រពនេះទទួលស្វាគមន៍ម្ចាស់ស្នាដៃសឹងគ្រប់វ័យចាប់កុមារ ដល់មនុស្សពេញវ័យ មិនថាអ្នកអាជីព ឬថ្មោងថ្មីក្តី ឱ្យតែសាច់រឿងទាក់ទង ឬផលិតដោយកុមារក្នុងបណ្តាប្រទេសទាំងនោះ។ ការប្រកួតនេះ ត្រូវបានប្រព្រឹត្តឡើងជារៀងរាល់ឆ្នាំ ទោះបីមានការអាក់ខានកំឡុងពេលវិបត្តិកូវីដក្តី ដើម្បីលើកទឹកចិត្តដល់ កុមារ និងយុវសមិទ្ធិករយើង ឱ្យបង្ហាញទេពកោសល្យ និងគំនិត ច្នៃប្រតិដ្ឋរបស់ខ្លួន។ SEAVFC ជំនាន់ទី៥នេះនឹងត្រូវបានរៀបចំនៅក្នុងប្រទេសកម្ពុជាយើង ដោយ«ក្រុមភាពយន្តឈូករ័ត្ន» (Sunflower Film Alliance [SFA]) រួមជាមួយដៃគូក្នុងស្រុកជាច្រើន ជាមួយនឹងប្រធានបទថ្មីគឺ «វេទមន្តនៃសន្តិភាព» (The Magic of Peace)។

ជ័យលាភី នឹងត្រូវបែងចែកយ៉ាងហោចជា១១ប្រភេទដូចតទៅ៖

វីដេអូឯកសារផលិតដោយអ្នកអាជីព សម្រាប់កុមារអាយុ៧ឆ្នាំចុះ

វីដេអូឯកសារផលិតដោយអ្នកអាជីព សម្រាប់កុមារអាយុពី៨ ដល់១២ឆ្នាំ

វីដេអូឯកសារផលិតដោយអ្នកអាជីព សម្រាប់កុមារអាយុពី១៣ ដល់១៧ឆ្នាំ

វីដេអូប្រតិដ្ឋផលិតដោយអ្នកអាជីព សម្រាប់កុមារអាយុ៧ឆ្នាំចុះ

វីដេអូប្រតិដ្ឋផលិតដោយអ្នកអាជីព សម្រាប់កុមារអាយុពី៨ ដល់១២ឆ្នាំ

វីដេអូប្រតិដ្ឋផលិតដោយអ្នកអាជីព សម្រាប់កុមារអាយុពី១៣ ដល់១៧ឆ្នាំ

សមិទ្ធករវីដេអូកុមារ អាយុ១២ឆ្នាំចុះ

សមិទ្ធករវីដេអូ អាយុពី១៣ ដល់១៥ឆ្នាំ

សមិទ្ធករវីដេអូ អាយុពី១៦ ដល់១៧ឆ្នាំ

សមិទ្ធករវីដេអូថ្មោងថ្មី ឯករាជ្យ អាយុចាប់ពី១៨ឆ្នាំឡើង

សមិទ្ធករវីដេអូថ្មោងថ្មី និស្សិត អាយុចាប់ពី១៨ឆ្នាំឡើង

មហោស្រពធំរបស់យើង គ្រោងនឹងប្រព្រឹត្តទៅនៅចុងខែវិច្ឆិកាឆ្នាំ២០២៥នេះ នៅទីក្រុងបាងកក ព្រះរាជាណាចក្រថៃឡង់ដ៍ បន្ទាប់ពីសិក្ខាសាលា តាមប្រទេសនានា នៅតំបន់អាស៊ីអាគ្នេយ៍ និងយុទ្ធនាការផ្សេងៗទៀត តាមសាលារៀន និងអង្គការមួយចំនួនតាម ប្រទេសនីមួយៗ។ អ្វីដែលពិសេស កុមារតាមប្រទេសនីមួយៗ យ៉ាងហោចណាស់ម្នាក់ នឹងត្រូវបានជ្រើសរើស ឱ្យចូលរួមតំណាង ក្នុងមហោស្រពធំនេះ ជាមួយអាណាព្យាបាលមួយរូប ដោយបង់ចំណាយមួយចប់ ដោយលេខាធិការដ្ឋានរបស់មហោស្រពប្រចាំតំបន់!

លោក ស៊ុំ ស៊ីថែន ជានាយកគណៈប្រឹក្សាភិបាលរបស់ មហោស្រពSEAVFC ប្រចាំប្រទេសកម្ពុជា នេះថ្លែងថា៖ «ទោះបីឆ្នាំមុន កម្ពុជាមិនមានវីដេអូណា បានជាប់ទៅវគ្គផ្តាច់ព្រ័ត្រ លើឆាកតំបន់នេះក៏ដោយ ក៏គណៈប្រតិភូកម្ពុជា ត្រូវបានអញ្ជើញចូលរួមចំណែក៖​

១. សម្រេចសេចក្តីវីេដអូជាប់វគ្គផ្តាច់ព្រ័ត្រ ២. សម្របសម្រួលកិច្ចពិភាក្សាលើគម្រោងវីដេអូទាក់ទងនឹងកុមារ ៣. កំណត់ប្រធានបទសម្រាប់ឆ្នាំ ២០២៥ ៤. ចាក់បង្ហាញវីដេអូស្តីពីខេត្តសៀមរាប ទីក្រុងវប្បធម៌របស់ អាស៊ាន និង ៥. ចែករង្វាន់ដល់ជ័យលាភីប្រចាំឆ្នាំ។ ដូច្នេះ ឆ្នាំនេះ យើងខ្ញុំសង្ឃឹមថា កម្ពុជានឹងបង្កើនចំនួនវីដេអូដែលដាក់ប្រកួត និងពង្រឹងគុណភាពរឿង តាមរយៈមេរៀនដែលយើងទទួល បានពីបណ្តាប្រទេសអាស៊ីអាគ្នេយ៍ផ្សេងទៀត»។

ដោយសារមហោស្រពត្រូវបានរៀបចំដោយ ក្រុមភាពយន្តឈូករ័ត្ន កញ្ញា ឃុំ ធីតា អនុប្រធានក្រុម បានផ្តល់យោបល់ថា៖ «ក្រុមភាពយន្តឈូករ័ត្ន រៀបចំ «មហោស្រពភាពយន្តវីដេអូសម្រាប់កុមារអាស៊ី អាគ្នយ៍» ជំនាន់ទី៥ ដោយសារគោលបំណងដូចខាងក្រោម : កម្មវិធីនេះស្របជាមួយគោលដៅរបស់ ក្រុមភាពយន្តឈូករ្ន័តដែលជំរុញ និងបណ្តុះបណ្តាលយុវជន ដែលស្រលាញ់វិស័យភាពយន្ត ដោយយើងអាចចាប់ផ្តើមពីកុមារជំទង់ឡើងទៅ។

ការចូលរួមមិនថាគណៈកម្មការអភិបាល និងកុមារជ័យលាភីទេ សុទ្ធតែតំណាងឱ្យមុខមាត់ប្រទេសជាតិ។ កាលណាកុមារ ឬ បេក្ខជនប្រកួតទទួលបានភាពជោគជ័យនោះបង្ហាញថាកុមារឬ អ្នកប្រកួតរបស់កម្ពុជាគឺមានសមត្ថភាព និងទេពកោសល្យ ជាលក្ខណអន្តរជាតិ។ ក្រុមភាពយន្តឈូករ័ត្ន នឹងទទួលបានកត្តិយស ដោយសារក្លាយជាកន្លែងដែលអាចឱ្យអ្នកស្នេហាវិស័យភាពយន្ត ឬវីដេអូ នឹកដល់មុនគេ។»

សូមរំលឹកដែរថាកាលពីឆ្នាំ២០២៤ តំណាងឱ្យប្រទេសកម្ពុជាយើង កុមារា សេង សូលីហេង មកពីសាលា Ontario International School នៅរាជធានីភ្នំពេញ កាលនោះរៀនថ្នាក់ទី៦ ត្រូវបានជ្រើសរើសតំណាងប្រទេសកម្ពុជា ក្នុងឱកាសមហោស្រពធំ នៅទីក្រុង គួឡាឡាំពួរ អមដំណើរដោយនាយកគណៈប្រឹក្សាភិបាល និង គណៈមេប្រយោគ ប្រចាំស្រុកផងដែរ។

បើអ្នកចង់ចូលរួមជាមួយសមិទ្ធករផ្សេងៗទៀតនៅកម្ពុជា និងអាស៊ីអាគ្នេយ៍ ក៏ដូចជាផ្សារភ្ជាប់រឿងរបស់លោកអ្នក ជាមួយទស្សនិកជនឱ្យបាន ច្រើន ជាពិសេសក្នុងតំបន់អាស៊ីអាគ្នេយ៍ ផ្ញើរឿងខ្លីរបស់លោកអ្នក កុមារ ឬយុវជនរបស់លោកអ្នក មកមហោស្រពយើងខ្ញុំឥឡូវមក តាមរយៈ៖ Link ។

SEAVFC Cambodia ឆ្នាំនេះមានការគាំទ្រពីស្ថាប័នក្នុងស្រុករួមមាន៖ អង្គការភាពយន្តឈូករ័ត្ន, Box Media Production, អង្គការមូលនិធិកុមារកម្ពុជា, នំ នាឡិ៍ ហាងកាហ្វេ ១១៖១១ និង Chill Out, រោងពុម្ព KhmerFace, ដៃគូផ្សព្វផ្សាយរួមមាន៖ Sabay News, TV5, Apsara Media Services, និង «មហោស្រពភាពយន្តភាពយន្តខ្លីចតុមុខ»។

ទោះបីជាយ៉ាងណាក៏ដោយ មហោស្រពនៅតែបន្តទទួលការចូលរួមជាថវិកាបន្ថែម ដើម្បីសម្រេចសមិទ្ធផលជំនាន់ទី៤ នៅប្រទេសកម្ពុជា ប្រកបដោយភាពរលូន តាមរយៈ៖​ ABA - SUNFLOWER FILM ORGANIZATION - 000 804 814។

សម្រាប់បច្ចុប្បន្នភាពបន្ថែម សូមចូលមើលតាមប្រព័ន្ធផ្សព្វផ្សាយរបស់យើងខ្ញុំដូចជា៖ គេហទំព័រ៖ www.seavideofest.com ទំព័រហ្វេសប៊ុក៖ Link TikTok
YouTube

អំពី «ក្រុមភាពយន្តឈូករ័ត្ន» ក្រុមភាពយន្តឈូករ័ត្ន ឬ Sunflower Film​ ​Alliance គឺជាក្រុមមួយដែលបានបង្កើតឡើង ដោយ អង្គការភាពយន្ត ឈូករ័ត្ន - Sunflower Film Organization - SFO ។ ក្រុមភាពយន្តឈូករ័ត្ន មានសមាជិកចូលរួមដោយ អ្នកស្ម័គ្រចិត្តជាច្រើនរូបទូទាំងប្រទេសកម្ពុជាដែលពួកគាត់សុទ្ធតែមាន ចំណង់ចំណូលចិត្ត ទៅលើជំនាញ ផលិតភាពយ​ន្ត ដែលមានអាយុ​ចន្លោះពី១៥ឆ្នាំដល់៤០ឆ្នាំ។ អង្គការភាពយន្តឈូករ័ត្នបានចុះឈ្មោះ ជាផ្លូវការ នៅក្រសួងមហាផ្ទៃ ជាអង្គការមិនរកប្រាក់ ចំណញ ចុះថ្ងៃ ទី១៣ ខែមីនា ឆ្នាំ២០១៩ តាមសេចក្តីប្រកាសលេខ ១៣៩៤ ប្រ.ក។

លើសពីនេះក្រុមភាពយន្តឈូករ័ត្ន ក៏បានផលិតគម្រោងខ្លួនឯង និងសហផលិត តាំងពីចុងឆ្នាំ២០១៧ ដែល រួមមានកម្មវិធី«កុនខ្ញុំ» សម្រាប់ទូរទស្សន៍ ជាតិ​កម្ពុជា (ទទក) កម្រងរឿងពី«គ្រួសារ» និងភាពយន្តខ្លីៗដូច ជារឿង “akumu”និងរឿងខ្លីៗមួយ​ចំនួន ទៀត។ តាំងពីឆ្នាំ ២០១៩ ក្រុមនេះក៏ បានរៀបចំកម្មវិធី«តស់ ថត ឯកសារនៅកម្ពុជា» (Let’s Document Cambodia) ដោយបានបណ្តុះបណ្តាល យុវជននៅភ្នំពេញ និងតាម ខេត្តនានាបានមិនតិចជាង២០០នាក់ទេ។

ក្រុមភាពយន្តឈូករ័ត្ន មានគោលដៅដ៏ចម្បង គឺចង់ឱ្យមាន ការ​យល់ដឹង កាន់តែទូលំទូលាយ អំពីការផលិត ភាពយន្ត ដើម្បីកសាងឧស្សាហកម្ម ភាពយន្តកម្ពុជាឱ្យ រឹងមានដោយរៀបចំវគ្គ បណ្តុះបណ្តាលខ្លីៗ និង ចាក់បង្ហាញស្នាដៃ តាមប្រព័ន្ធផ្សព្វផ្សាយនានា និង រោងភាពយន្ត ឬមហោស្រពនានា ជាមួយ​សម្ព័ន្ធមិត្តតាមបណ្តាខេត្តនៅកម្ពុជា ក៏ដូចជា ដៃគូនៅ ក្រៅស្រុក ដើម្បីនាំស្នាដៃយុវជនខ្មែរ ឱ្យមានការទទួលស្គាល់នៅលើឆាកអន្តរជាតិ។

អំពី «មហោស្រពភាពយន្តវីដេអូសម្រាប់កុមារអាស៊ីអាគ្នយ៍» (SEAVFC) SEAVFC ត្រូវបានចាប់បដិសន្ធិ តាំងពីឆ្នាំ២០១៧ នៅប្រទេសហ្វីលីពីន ដោយមូលនិធិAnak TV ក្នុងគោលបំណងជំរុញ អបអរ និងផ្តល់តម្លៃដល់គុណភាពនៃវីដេអូរបស់យុវជន និងកុមារ នៅក្នុងតំបន់អាស៊ីអាគ្នេយ៍ ដោយរួមទាំងប្រទេសកម្ពុជាផងដែរ។ មហោស្រពនេះជាព្រឹត្តិការណ៍ប្រចាំឆ្នាំ ដែលចាប់ផ្តើមពីការទទួលរឿងក្នុងស្រុក មុននឹងយកដាក់ប្រកួតថ្នាក់តំបន់ ជាទូទៅ ក្នុងខែវិច្ឆិកា ទៅតាម ប្រទេសនានានៅអាស៊ីអាគ្នេយ៍ដែលប្តូរវេនគ្នា ធ្វើម្ចាស់ផ្ទះពីមួយឆ្នាំទៅមួយឆ្នាំ។

សម្រាប់ព័ត៌មានលម្អិត សូមទាក់ទង៖ លោក ស៊ុំ ស៊ីថែន នាយកគណៈប្រឹក្សាភិបាលរបស់ «មហោស្រពវីដេអូសម្រាប់កុមារអាស៊ីអាគ្នេយ៍» ប្រចាំប្រទេសកម្ពុជា

លេខទំនាក់ទំនង: +855 12 684 955 អុីមែល: seavfc.kh@gmail.com