តារាលេងម៉ូដសក់ វី ជីវ័ន្ត រកឃើញដៃគូសក់សំពោងដូចគ្នាហើយ!

2015-06-17 15:28:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាតន្ត្រីករ វី ជីវ័ន្ត បានប៉ះគ្នាជាមួយអ្នកលេងម៉ូដសក់សំពោងម្នាក់ទៀតហើយ កាលពីថ្ងៃសន្និសីទសារព័ត៌មានរបស់ផលិតកម្មមហាហង្សនៅរោងភាពយន្ដ Major Cineplex by Cellcard ដើមសប្ដាហ៍នេះ។

“ភ្ញាក់ព្រើតតែម្ដងពេលបានឃើញគាត់មានម៉ូដសក់ដូចខ្ញុំចឹង ហើយពេលនៅជិតគ្នាមុខក៏ស្រដៀងគ្នាទៀត"។ ជីវ័ន្ត ប្រាប់ Sabay។ តារាសម្ដែងរូបនោះបានបន្តទៀតថា "ស្មានតែអ្នកសិល្បៈមានតែខ្ញុំទេដែលចូលចិត្តម៉ូដសក់សំពោង តែឥឡូវគឺមិនមែនទេព្រោះមានគេធ្វើដូចខ្ញុំដែរ"។

លោកបានបន្ថែមទៀតថា ការទុកសក់បែបនេះ ក៏ព្រោះតែការចូលចិត្ត ដែលជាសក់ពីកំណើតគ្រាន់តែបានលាបព័ណ៌តិចៗបន្ថែម និង បានថែទាំវាយ៉ាងយកចិត្តទុកដាក់មិនចាញ់មនុស្សស្រីឡើយ។ "ម៉ូដនេះខ្ញុំបានធ្វើវាប្រហែលជា ៥ ឆ្នាំ ហើយគ្មានគំនិតចង់ប្ដូរម៉ូដផ្សេងទេ"។

បុរសម្នាក់ទៀត ដែលមានសក់សំពោងដូច ជីវ័ន្ត ដែរនោះ មានឈ្មោះថា ដួង វាសនា ជាប្អូនតារាសម្ដែងស្រី ដួង ស្រីពេជ្រ។ វាសនា ក៏បានឲ្យដឹងដែរថា លោកក៏ពេញចិត្តម៉ូដសក់នេះដែរ ទើបធ្វើអស់រយៈពេលជិត១ឆ្នាំមកហើយ " ខ្ញុំពេញចិត្តសក់នេះណាស់ និង បានធ្វើម៉ូដនេះជាង ៩ ខែហើយ"។ វាសនា និយាយ៕

សក់ដូចគ្នាមែន តែប្រិយមិត្តថា អ្នកណាសមជាង?

អត្ថបទ៖ទ្រី រ៉ាវី