អ្នកគាំទ្រកកកុញរង់ចាំទទួល Nani នៅទួរគី

2015-07-06 20:21:24
ចំនួនមតិ 0 | ចំនួនចែករំលែក 0

ចន្លោះមិនឃើញ

Nani បានទៅដល់ប្រទេសទួរគីហើយដើម្បីពិនិត្យសុខភាព មុនពេលចុះកុងត្រាផ្ទេរពី Manchester United ទៅលេងឱ្យក្លិប Fenerbahce របស់ទួរគី។ ការមកដល់របស់ខ្សែបម្រើស្លាបរូបនេះ ត្រូវបានអ្នកគាំទ្រទទួលរាក់ទាក់យ៉ាងគគ្រឹកគគ្រេង។

Nani ត្រូវបានក្លិបបិសាចក្រហម Manchester United សម្រេចលក់ទៅឱ្យក្លិប Fenerbahce នៅក្នុងប្រទេសទួរគី ក្នុងតម្លៃខ្លួន៣,៥លានផោន (ប្រហែល ៥,៤៥លានដុល្លារ) នៅឡើយតែពិនិត្យសុខភាពទៀតប៉ុណ្ណោះ។ ខណៈដែលម្សិលមិញនេះ កីឡាករជម្រើសជាតិព័រទុយហ្គាល់ បានទៅដល់ទីក្រុងអ៊ីស្តាន់ប៊ុលហើយ ដើម្បីពិនិត្យសុខភាពមុនប្រកាសការផ្ទេរជាផ្លូវការ។

វត្តមានរបស់ Nani នៅទឹកដីទួរគីនេះពិតជាធ្វើឱ្យអ្នកគាំទ្រសប្បាយរីករាយយ៉ាងខ្លាំង ពោលគឺមានអ្នកគាំទ្ររាប់រយនាក់បានរង់ចាំកីឡាករវ័យ២៨ឆ្នាំរូបនេះនៅព្រលានយន្តហោះ និងមានមនុស្សមួយចំនួនទៀតឈរចាំនៅតាមដងផ្លូវផងដែរ។

ក្រោយពីបានឃើញទិដ្ឋភាពដ៏អស្ចារ្យនេះ បុរសកម្ពស់១,៧៥ម៉ែត្រខាងលើបាននិយាយថា៖ "ខ្ញុំពិតជាសប្បាយចិត្តណាស់ដែលបានមកទីនេះ។ ខ្ញុំបានរកឃើញឱកាសថ្មីមួយទៀតហើយក្នុងអាជីព។ នេះជាឱកាសល្អមួយសម្រាប់ខ្ញុំដើម្បីបង្ហាញពីសមត្ថភាពខ្លួនឯង។ ខ្ញុំសូមអរគុណដល់អ្នកគាំទ្រទាំងអស់ ហើយសង្ឃឹមថានឹងអាចនាំជោគជ័យដល់ពួកគេ”៕

ចុចអាន៖Van Gaal ត្រៀមចាយលុយធំ ជួយក្រុមលើកពាន

ប្រែសម្រួល៖ មុន្នី រម្យ ប្រភព៖ dailymail