ឆ្នាំនេះគ្មានយក្សនោះទេ ទោះមាននំផ្លែអាយទម្ងន់ ២០ គីឡូក្រាមក៏ដោយ

2016-04-16 21:19:49
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ខេង ខេមា អ្នកប្រចាំការនៅភូមិបង្អែមនៃក្តីស្រលាញ់បាននិយាយថា បើទោះឆ្នាំនេះ មានធ្វើនំផ្លែអាយទម្ងន់២០គីឡូក្រាមពិតមែន តែនំនេះមិនត្រូវបានគេហៅថានំផ្លែអាយយក្យនោះឡើយ ដូច្នេះសូមអ្នកចូលរួមកុំមានការយល់ច្រឡំនោះអី។

ឆ្នាំមុនៗមានអង្រុតយក្ស មួកយក្ស នំអន្សមយក្សជាដើម ដោយឡែកសម្រាប់ឆ្នាំនេះគ្មានការផលិតជាទ្រង់ទ្រាយធំបែបយក្សនោះទេ។

លោកបន្តថា ក្នុងមួយថ្ងៃនំផ្លែអាយនេះធ្វើតែមួយលើកទេ ដោយការចម្អិនប្រើរយៈពេលយូរ រហូតដល់៤-៥ម៉ោង និងពិបាកក្នុងការធ្វើផងដែរ។ សម្រាប់ល្ងាចនេះម៉ោងប្រមាណ ៥ នៅភូមិបង្អែមនៃក្តីស្រលាញ់ នំផ្លែអាយរសជាតិឈ្ងុយឆ្ងាញ់ទម្ងន់២០គីឡូក្រាមធ្វើដោយស្នាដៃចុងភៅខ្មែរ នឹងពុះចែកនំនេះជូនអ្នកចូលរួមបរិភោគគ្រប់ៗគ្នាភ្លក់ដោយសេរី។

លោកថា រយៈពេលនៃព្រឹត្តិការណ៍អង្គរសង្រា្កន្តនេះ ក្រុមចុងភៅបានផលិតនំផ្លែអាយទម្ងន់២០គីឡូក្រាមនេះ ចំនួន ៣ ដងរួចមកហើយ ហើយរាល់ល្ងាច អ្នកចូលរួមទាំងអស់អាចមកភ្លក់នំនេះបានដោយសេរី។

ក្នុងភូមិបង្អែមនៃក្តីស្រលាញ់ ក្រៅពីមានការបង្ហាញជូននំពីរប្រភេទ គឺនំផ្លែអាយ នំត្រៀបបាយ ការប្រកួតយកជយលាភីធ្វើនំ ក៏មានកម្មវិធីសប្បាយៗរាំលេងកម្សាន្តដើម្បីបង្កើតបរិយាកាសរីករាយដល់អ្នកទស្សនា៕

អត្ថបទ៖ លឹម សុនា