Apple សារភាពថាបានធ្វើឲ្យ iPhone ចាស់ៗដើរយឺត

2017-12-21 02:23:37
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលប៉ុន្មានសប្ដាហ៍កន្លងមកនេះ មានការសង្ស័យថា Apple បានកាត់បន្ថយល្បឿនលើ iPhone ដែលមានថ្មអាយុកាលចាស់។ ទាក់ទងនឹងចំណុចនេះ Apple បានទទួលស្គាល់ថាខ្លួនពិតជាបានធ្វើបែបនេះមែន។

ក្នុងសេចក្ដីប្រកាស Apple បាននិយាយថា ៖ "គោលដៅរបស់យើងគឺនាំយកបទពិសោធន៍ល្អៗឲ្យអ្នកប្រើប្រាស់ រួមមានដំណើរការគ្រប់សព្វបែបយ៉ាង និងជួយពន្យារអាយុកាលឧបករណ៍របស់ពួកគេ។ ពពួកថ្មលីចូមនឹងចាប់ផ្ដើមថយចុះសមត្ថភាព ពេលស្ថិតក្នុងស្ថានភាពត្រជាក់, ពេលថាមពលថ្មធ្លាក់ចុះ ឬ ពេលវាមានអាយុកាលចាស់ ដែលនាំឲ្យពេលខ្លះឧបករណ៍ត្រូវរលត់ដោយខ្លួនឯង ដើម្បីការពារគ្រឿងបន្លាស់អេឡិចត្រូនិក”។

Apple បន្តថា ៖ "កាលពីឆ្នាំមុន យើងបានបញ្ចេញមុខងារមួយសម្រាប់ iPhone 6, iPhone 6s និង iPhone SE ដើម្បីឲ្យទូរសព្ទដំណើរការលឿនតែនៅពេលដែលចាំបាច់ ដើម្បីទប់ស្កាត់កុំឲ្យមានការរលត់ដោយស្វ័យប្រវត្តិ។ ពេលនេះយើងបន្តនាំមកមុខងារនេះទៅដាក់លើ iPhone 7 ជាមួយ iOS 11.2 ហើយគ្រោងនឹងបន្ថែមលើឧបករណ៍ដទៃទៀតនាពេលអនាគត”។

ការលើកឡើងរបស់ Apple មានន័យថា iPhone ដែលមានថ្មអាយុកាលយូរនឹងចាប់ផ្ដើមថយចុះល្បឿនសម្រាប់ការប្រើប្រាស់ធម្មតា ហើយវានឹងដំណើរការលឿនតែនៅពេលចាំបាច់ (ដូចជាការប្រើកម្មវិធីដែលប្រើកម្លាំងម៉ាស៊ីនច្រើន) ដើម្បីឲ្យ iPhone ប្រើបានយូរ និងទប់ស្កាត់កុំឲ្យរលត់ដោយខ្លួនឯង ពេលដែលថាមពលថ្មនៅសេសសល់នៅឡើយ។

Apple បានបញ្ជាក់ថា ថ្មរបស់ iPhone ផលិតឡើងដោយវាអាចរក្សាជីវិតបាន ៨០% នៃថាមពលថ្មដើម ក្រោយពីសាកមួយពេញអស់ ៥០០ លើក៕ នេះមានន័យថាប្រសិនបើអ្នកសាកបំពេញថ្ម iPhone មួយថ្ងៃម្ដង នោះជីវិតថ្ម iPhone នឹងនៅសល់ ៨០% ក្រោយពីប្រើបានជាងមួយឆ្នាំ៕

ប្រភព៖ macrumors ប្រែសម្រួល៖ សុខហេង