Technovation ឆ្នាំ ២០១៨ ឃើញមាន ៣ ចំណុចប្លែកជាងរាល់ឆ្នាំ

2017-12-24 08:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Technovation Cambodia ឆ្នាំ ២០១៨ ជាកម្មវិធីប្រកួតប្រជែងសរសេរកូដបង្កើតកម្មវិធីសម្រាប់ការប្រកួតប្រជែងអន្តរជាតិ ក្នុងគោលបំណងបង្កើនចំនួនស្ត្រីក្នុងវិស័យបច្ចេកវិទ្យា និងសហគ្រិនភាព។ ក្នុងកម្មវិធីបើកឃើញថា មានការចូលរួមច្រើន និងប្លែកជាងឆ្នាំមុនៗ។

ក្រុម Cambodia Identity Product តំណាងកម្ពុជាជាប់វគ្គFinal ឆ្នាំមុន

**- ១** មានការផ្សាយផ្ទាល់លើទំព័រផ្លូវការក្រសួងអប់រំ យុវជន និងកីឡា រួមទាំងទំព័រ Technovation Cambodia តាំងពីចាប់ផ្ដើមដល់បញ្ចប់កម្មវិធី។

- ២ មានការចូលរួមចែករំលែកបទពិសោធន៍ពីក្រុមយុវតីវ័យក្មេង Cambodia Identity Product ដែលជាក្រុមខ្លាំងតំណាងកម្ពុជា បានជាប់ដល់វគ្គផ្ដាច់ព្រ័ត្រនៅទីក្រុងសាន់ហ្វ្រាន់ស៊ីស្កូ សហរដ្ឋអាមេរិកកាលពីឆ្នាំមុន និងក្រុមជាប់ថ្នាក់ជាតិឈ្មោះ Girl Team For Tomorrow រួមទាំងការណែនាំឲ្យស្គាល់គ្រូបង្វឹក (Mentor) ជាច្រើនរូបដែលបានស្ម័គ្រចិត្តរួមចំណែកជួយបង្រៀនកូដ ដល់ក្មេងៗស្រីដោយមិនគិតថ្លៃ ដើម្បីត្រៀមខ្លួនចូលរួមប្រកួតថ្នាក់អន្តរជាតិនេះ។

- ៣ មានការជំរុញលើកទឹកចិត្តពីថ្នាក់ដឹកនាំ ដោយមានការអញ្ជើញចូលរួមដោយអនុរដ្ឋលេខាធិការក្រសួងអប់រំ ឯកឧត្ដម សិរី ជំនះ និងនាយករងវិទ្យាស្ថានបច្ចេកវិទ្យាកម្ពុជា ឯកឧត្ដម ផល ណារិទ្ធ រួមទាំងតំណាងដៃគូក្រុមហ៊ុនឯកជនដូចជា Smart Axiata និង DMI(Digital Mobile Innovation Limited) និងអាណាព្យាបាលសិស្សយ៉ាងច្រើនកុះករ

#ជួបជាមួយក្រុមយុវតីវ័យក្មេង Cambodia Identity Product

Technovation Cambodia ឆ្នាំនេះបានធ្វើពិធីបើកនៅក្នុងសាលាតិចណូ ដោយអ្នកចូលរួមរហូតជាង ៣០០ នាក់ ដែលភាគច្រើនជាសិស្សកំពុងសិក្សានៅថ្នាក់អនុវិទ្យាល័យ និងវិទ្យាល័យស្ថិតនៅវ័យអាយុចន្លោះពី ១០ ទៅ ១៨ ឆ្នាំ មានទាំងសិស្សខេត្តបាត់ដំបង និងសៀមរាបផងដែរ។

ចំពោះលក្ខខណ្ឌកម្មវិធីមិនសូវខុសគ្នាពីឆ្នាំមុនៗនោះទេ សិស្សដែលដាក់ពាក្យចូលរួមនឹងបែងចែកជាក្រុមតូចៗជាច្រើន ក្នុងមួយក្រុមអាចមានសមាជិកបី ឬប្រាំនាក់ រិះរកបញ្ហាណាមួយក្នុងសហគមន៍មកដោះស្រាយ ដោយបង្កើតជាកម្មវិធីដាក់លើទូរសព្ទ ដែលមានការណែនាំពីគ្រូបង្វឹកស្ម័គ្រចិត្ត។

ក្រុមទាំងអស់នឹងត្រូវប្រកួតគ្នាថ្នាក់ជាតិ Technovation National Pitch ដើម្បីស្វែងរកជយលាភីថ្នាក់ជាតិ និងបន្តប្រកួតគ្នាដើម្បីឡើងទៅថ្នាក់អន្តរជាតិ។

ក្រុមដែលឈ្នះដល់វគ្គផ្ដាច់ព្រ័ត្រ ១០ ក្រុមពីជុំវិញពិភពលោកនឹងត្រូវអញ្ជើញទៅធ្វើបទបង្ហាញនៅទីក្រុង សាន់ហ្វ្រាន់ស៊ីស្កូល សហរដ្ឋអាមេរិក ក្នុងនោះ ២ ក្រុមចុងក្រោយដែលឈ្នះ នឹងទទួលបានប្រាក់រង្វាន់ ១០ ០០០ ដុល្លារអាមេរិក៕

ទស្សនាកម្មវិធីបើក Technovation ២០១៨