ញៀននឹងថត Selfie ជាជំងឺផ្លូវចិត្ត មានឈ្មោះថា Selfitis
- 2017-12-28 03:13:20
- ចំនួនមតិ 0 | ចំនួនចែករំលែក 0
ញៀននឹងថត Selfie ជាជំងឺផ្លូវចិត្ត មានឈ្មោះថា Selfitis
ចន្លោះមិនឃើញ
កាលពីឆ្នាំ ២០១៤ មានរឿងមួយបានល្បីពេញអ៊ីនធឺណិត ដែលនិយាយថាសមាគមចិត្តសាស្ត្រអាមេរិកបានប្រើពាក្យ "Selfitis” ជាឈ្មោះមួយនៃជំងឺផ្លូវចិត្តសម្រាប់អ្នកញៀននឹងការថតរូប Selfie និងចែករំលែកលើអ៊ីនធឺណិត។ ក្រោយមកគេបានដឹងថាវាជារឿងបោកប្រាស់ ប៉ុន្តែវាក៏បានញាំងឲ្យមានការស្រាវជ្រាវផងដែរ។ ពេលនេះជំងឺ "Selfitis” បានក្លាយជាការពិតហើយ។
អ្នកស្រាវជ្រាវឈ្មោះ Janarthanan Balakrishnan មកពីសាលា Thiagarajar School of Management ក្នុងប្រទេសឥណ្ឌា និង Mark D. Griffiths មកពីមហាវិទ្យាល័យ Nottingham Trent University ចក្រភពអង់គ្លេស បានចុះផ្សាយការសិក្សាថ្មីមួយក្នុងសៀវភៅសុខភាពផ្លូវចិត្ត និងការញៀន មានចំណងជើងថា “An Exploratory Study of ‘Selfitis’ and the Development of the Selfitis Behavior Scale”។
ការសិក្សាបានកំណត់កម្រិតនៃជំងឺ Selfitis ដែលមានបែកចែកកម្រិតញៀននឹងការថត Selfie ជាបីកម្រិត។ គេបានសិក្សាលើសិស្សនិស្សិត ២២៥ នាក់មកពីសកលវិទ្យាល័យពីរនៃប្រទេសឥណ្ឌា និងបានចាត់ថ្នាក់ជា កម្រិតធ្ងន់ធ្ងរ, មធ្យម និងធម្មតា។ ក្នុងចំណោមអ្នកចូលរួម មាន ៣៤% មានជំងឺ Selfitis កម្រិតធ្ងន់, ៤០,៥% កម្រិតមធ្យម និង ២៥,៥% កម្រិតធម្មតា។
ការសិក្សាបង្ហាញទៀតថាបុរសកើតមានជំងឺនេះក្នុងភាគរយខ្ពស់ជាងនារីដែលមានដល់ ៥៧,៥% ធៀបនឹង ៤២,៥%។ ៩% នៃអ្នកចូលរួមថតរូប Selfie លើសពី ៨ សន្លឹកជារៀងរាល់ថ្ងៃ និង ២៥% ចែករំលែករូបភាពយ៉ាងហោចណាស់ ៣ សន្លឹកនៃរូបភាព Selfie ទាំងនោះនៅលើអ៊ីនធឺណិត។
លោក Balakrishnan បាននិយាយថា ៖ "អ្នកដែលមានជំងឺនេះ ជួបបញ្ហាដូចជាខ្វះភាពជឿជាក់លើខ្លួនឯង និងព្យាយាមចង់ចូលចំណោមមនុស្សដែលនៅជុំវិញខ្លួន ហើយអាចនឹងមានអាកប្បកិរិយាស្រដៀងនឹងការញៀនដទៃទៀតដែរ”។
ក្រោយពីមានការបញ្ជាក់ពីវត្តមានជំងឺនេះនៅពេលនេះ គេសង្ឃឹមថានឹងមានការសិក្សាស៊ីជម្រៅបន្ថែមអំពីមូលហេតុដែលមនុស្សកើតមានជំងឺនេះ និងស្វែងរកវិធីព្យាបាលចំពោះអ្នកដែលមានជំងឺនេះធ្ងន់ធ្ងរ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
