ការ​បង្ហោះ​វីដេអូ​បង្ហាញ​ពី​សាក​សព​បុរស​ចង​ក​ក្នុង​ព្រៃ​នៅ​ប្រទេស​ជប៉ុន​របស់​ Logan Paul ​នាំ​ឲ្យ​អ្នក​ប្រើ​ YouTube រួម​ទាំង​តារា​ YouTube ជា​ច្រើន​ចេញ​​ប្រតិកម្ម​រិះគន់​ជា​បន្ត​បន្ទាប់។ ក្នុង​នោះ​ក៏​មាន​ PewDiePie ដែល​ជា​តារា​ YouTube មាន​ Subscriber ច្រើន​ជាង​គេ​ក្នុង​លោក​។

PewDiePie ទើប​តែ​បង្ហោះ​វីដេអូ​វាយ​ប្រហារ​ Logan Paul កាល​ពី​ថ្មីៗ​នេះ​ ​ឲ្យ​ Subscriber ទាំង​ ៥៩ លាន​នាក់​របស់​ខ្លួន​បាន​ទស្សនា។ នៅ​ក្នុង​វីដេអូ​មាន​បង្ហាញ​ពី​ឈុត​ខ្លះៗ​នៃ​វីដេអូ​​ក្នុង​ព្រៃ​ប្រទេស​ជប៉ុន​​របស់​ Logan Paul ​និង​បាន​និយាយ​ចំអន់​ដល់​ទង្វើ​របស់​ Logan Paul ផង​ដែរ។

នៅ​​ឈុត​ចុង​ក្រោយ​នៃ​វីដេអូ​​តារា​ YouTube វ័យ​ ២៨ ឆ្នាំ​រូប​នេះ​ បាន​​រំលឹក​​ពី​សារ​សុំទោស​ដែល​ Logan Paul បាន​បង្ហោះ​​លើ​គណនី​ Twitter ដែល​មាន​សរសេរ​ថា ៖ "ខ្ញុំ​មិន​បាន​ធ្វើ​វា​ដើម្បី​​ View(ចំនួន​ទស្សនា) ​ច្រើន​នោះ​ទេ។ ខ្ញុំ​មាន​អ្នក​មើល​ច្រើន​រួច​​ស្រាប់​ហើយ”។ ​នៅ​ត្រង់​នេះ​ PewDiePie បាន​និយាយ​ថា​ ១០០% ​ដែល​ Logan ធ្វើ​វា​ដើម្បី​ View (ចំនួន​ទស្សនា)។

តារា​ YouTube សញ្ជាតិ​ស៊ុយអែត​នេះ​ក៏​បាន​​សើច​ចំអក​ចំពោះ​ការ​ប្រើ​ Emoji សញ្ញា​​ដៃ​ពីរ​ក្នុង​សារ​សុំទោស​របស់​ Logan ផង​ដែរ។ ​

​​​​​​​​​​​​​​​​​​​​ក្រៅ​ពី​វីដេអូ​រិះគន់​ វាយ​ប្រហារ​ចំៗ​នេះ​ PewDiePie ក៏​បាន​បង្ហោះ​វីដេអូ​ខ្លី​មួយ​ទៀត​ដែល​​​​កំប្លែង​លេង​នឹង​វីដេអូ​របស់​ Logan Paul៕​​​​

ប្រភព៖ YouTube   ប្រែ​សម្រួល៖ សុខហេង