Twitter ប្រាប់មូលហេតុមិនបិទគណនីលោក ដូណាល់ ត្រាំ

2018-01-08 03:36:18
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ដាញទំនាក់ទំនង Twitter ទទួលបានការស្នើសុំជាច្រើនលើកច្រើនសារ ឲ្យបិទគណនីលោក ដូណាល់ ត្រាំ តាំងពីឆ្នាំ ២០១៦ មកម្ល៉េះ។ ការស្នើសុំនេះដោយសារតែលោក ត្រាំ បានប្រើពាក្យពេចន៍ញុះញង់ឲ្យមានអំពើហិង្សានៅលើ Tweet របស់ខ្លួន។

ជាក់ស្ដែងកាលពីសប្ដាហ៍កន្លងទៅមាន Tweet មួយរបស់ប្រធានាធិបតីអាមេរិករូបនេះ ដែលបណ្ដាលឲ្យកាន់តែមានភាពតានតឹងជាមួយនឹងកូរ៉េខាងជើង ទាក់ទងនឹងសង្គ្រាមនុយក្លេអ៊ែរ។ ទោះបីជាមានខ្លឹមសារដែលញុះញង់ឲ្យកើតមានអំពើហិង្សាក្ដី ប៉ុន្តែ Tweet នេះនៅតែមានវត្តមានលើ Twitter។

ទាក់ទងនឹងបង្ហាញនេះ Twitter ក៏បានចេញមុខបកស្រាយថា ៖ "មេដឹកនាំជាប់ឆ្នោតដើរតួនាទីយ៉ាងសំខាន់ក្នុងការសន្ទនា ដោយសារឥទ្ធិពលរបស់ពួកគេ (លោក ត្រាំ) មកលើសង្គមរបស់ពួកយើង។ Block មេដឹកនាំពិភពលោកពី Twitter ឬលុបចោល Tweet របស់ពួកគេ អាចនឹងលាក់បាំងព័ត៌មានសំខាន់ដែលមហាជនអាចមើលឃើញ ដើម្បីមានការជជែកវែកញែក។ វាមិនត្រឹមតែបិទសំឡេងមេដឹកនាំរូបនោះទេ ប៉ុន្តែវាក៏នឹងរារាំងការពិភាក្សាសំខាន់ជុំវិញពាក្យសម្ដី និងសកម្មភាពរបស់ពួកគេផងដែរ”។

ទន្ទឹមនឹងនេះ Twitter ក៏បានណែនាំឲ្យគណនីដទៃទៀតត្រូវតែអនុវត្តន៍តាមលក្ខណរបស់ក្រុមហ៊ុន ដើម្បីជៀសវាងពីការបិទគណនី៕

ប្រភព៖ The Verge ប្រែសម្រួល៖ សុខហេង