Apple ឲ្យម្ចាស់ iPhone ធ្វើរឿងនេះភ្លាម ក្រោយបែកធ្លាយកូដ iOS ធំបំផុតក្នុងប្រវត្តិសាស្ត្រ

2018-02-09 02:43:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីល្ងាចថ្ងៃម្សិលមិញនេះវិបសាយ Motherboard បានរាយការណ៍ថាកូដ iBoot របស់ iPhone ដែលប្រើសម្រាប់ដំណើរការប្រព័ន្ធប្រតិបត្តិការ បានលេចធ្លាយនៅលើវិបសាយអនឡាញ ដោយគេបានចាត់ទុកថាវាជាការលេចធ្លាយ Source Code ធំបំផុតក្នុងប្រវត្តិសាស្ត្រ Apple។

ក្រោយពីការចេញផ្សាយនេះ Apple ក៏បានបញ្ចេញសកម្មភាពលុបកូដចេញពីលើវិបសាយអនឡាញភ្លាមៗ។ ចំពោះការលេចធ្លាយនេះដែរ Apple បានធ្វើការឆ្លើយតប និងបានណែនាំដល់អ្នកប្រើប្រាស់ថា ៖

“Source Code ចាស់កាលពីបីឆ្នាំមុន ទំនងជាបានលេចធ្លាយ ប៉ុន្តែសុវត្ថិភាពនៃផលិតផលរបស់ពួកយើងមិនពឹងផ្អែកលើព័ត៌មានសម្ងាត់នៃ Source Code នោះទេ។ មានស្រទាប់ការពារទាំង Hardware និង Software ជាច្រើនស្រទាប់ត្រូវបានបំពាក់លើផលិតផលរបស់យើង ហើយយើងតែងលើកទឹកចិត្តដល់អតិថិជនឲ្យអាប់ដេតប្រព័ន្ធប្រតិបត្តិការ iOS ទៅកាន់ជំនាន់ចុងក្រោយ ដើម្បីបានផលប្រយោជន៍ពីការការពារថ្មីបំផុត”។

គេសម្គាល់ថា Source Code ដែលបែកខ្ចាយម្សិលមិញប្រហែលជា Source Code តាំងពីជំនាន់ iOS 9 ហេតុនេះផលប៉ះពាល់នៃការលេចធ្លាយនេះអាចមិនមានខ្លួននោះទេ ហើយ Apple ក៏បាននិយាយដែរថាការលេចធ្លាយនេះមិនប៉ះពាល់ដល់ប្រព័ន្ធសុវត្ថិភាព iPhone ឡើយ។ យ៉ាងណាក្ដី Apple នៅតែណែនាំឲ្យអ្នកប្រើប្រាស់អាប់ដេតប្រព័ន្ធប្រតិបត្តិការទៅកាន់ជំនាន់ចុងក្រោយ ដើម្បីប្រាកដថានឹងមិនរងគ្រោះពីការវាយប្រហារណាមួយ។

តាមការចេញផ្សាយចុងក្រោយបំផុតរបស់ Apple បង្ហាញថាអ្នកប្រើប្រាស់ឧបករណ៍ iDevice តិចជាង ១០% កំពុងប្រើប្រាស់ប្រព័ន្ធប្រតិបត្តិការ iOS ដែលចាស់ជាង iOS 10 និងមាន ៦៥% ប្រើ iOS 11៕

ប្រភព៖ 9to5Mac ប្រែសម្រួល៖ សុខហេង