តោះ! ចូលរួមប្រកួតគ្នាពានរង្វាន់"ស្ត្រីក្នុងវិស័យបច្ចេកវិទ្យា"នៅសល់តែប៉ុន្មានថ្ងៃទៀតទេ

2018-02-20 04:05:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងប្រៃសណីយ៍ និងទូរគមនាគមន៍ប្រកាសបើកនូវកម្មវិធីមួយឈ្មោះថា “ស្ត្រីកម្ពុជាក្នុងវិស័យបច្ចេកវិទ្យា"

រូបភាព| DMI

**#កាលបរិច្ឆេទផុតកំណត់៖**

កម្មវិធីនេះផ្ដោតលើប្រធានបទ “ការផ្ដល់សិទ្ធិអំណាចដល់ស្ត្រីតាមរយៈបច្ចេកវិទ្យាគមនាគមន៍ និងព័ត៌មាន”។
ក្រសួងកំពុងប្រកាសរកបេក្ខភាពជាស្ត្រី ចាប់ពីថ្ងៃទី ១៥ ខែកុម្ភៈ រហូតដល់ថ្ងៃទី ២៨ ខែកុម្ភៈ ឆ្នាំ ២០១៨។
បន្ទាប់មកក្រសួងនឹងធ្វើការជ្រើសរើស ហើយវាយតម្លៃរកស្ត្រីឆ្នើមដែលមានគុណសម្បត្តិគ្រប់គ្រាន់។ ជយលាភី ៣ រូប នឹងត្រូវផ្ដល់កិត្តិយសទទួលពានរង្វាន់នៅថ្ងៃទី ៧ ខែមីនា ឆ្នាំ២០១៨។

#ពានរង្វាន់ផ្នែកបច្ចេកវិទ្យា៖

"កម្មវិធីនេះមានពានរង្វាន់ផ្នែកបច្ចេកវិទ្យាចំនួន ៣ ប្រភេទគឺ៖

សហគ្រិនឆ្នើមស្ត្រីក្នុងបច្ចេកវិទ្យា (Cambodian Woman ICT Entrepreneur Award) - វិស្វករស្ត្រីជោគជ័យក្នុងជំនាញ ប.គ.ព (Cambodian Woman ICT Engineer Award)
ស្ត្រីដែលបានចូលរួមជំរុញនូវការប្រើប្រាស់បច្ចេកវិទ្យាសម្រាប់ការអភិវឌ្ឍន៍សង្គមឬសហគមន៍ (Cambodian Woman ICT For Community Award)។

រូបភាព| cbrd.gov.kh

ឯកឧត្ដម កាន ច័ន្ទមេត្តា រដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា៖ “កន្លងមកយើងមើលឃើញថា ស្ត្រីកម្ពុជាមានចំនួនតិចតួចណាស់ដែលបានចាប់យកជំនាញ និងធ្វើការក្នុងវិស័យនេះ ទោះជាពួកគាត់មានសមត្ថភាព និងការច្នៃប្រឌិតប្លែកៗមិនចាញ់បុរសក៏ដោយ។ ដើម្បីជំរុញការចូលរួមបន្ថែមទៀត យើងចាំបាច់ត្រូវបង្កើតកម្មវិធីលើកទឹកចិត្តនានា។ ជាលទ្ធផល ពានរង្វាន់ស្ត្រីឆ្នើមក្នុងវិស័យបច្ចេកវិទ្យានេះ នឹងជួយបំផុសទឹកចិត្តឱ្យស្ត្រីដទៃទៀតចាប់អារម្មណ៍ និងចូលរួមជាបន្តបន្ទាប់”។

កម្មវិធីនេះ មានគោលបំណងលើកទឹកចិត្តស្ត្រីឱ្យចូលរួមកាន់តែច្រើនផុលផុស នៅក្នុងវិស័យបច្ចេកវិទ្យាគមនាគមន៍និងព័ត៌មានដើម្បីចូលរួមចំណែកក្នុងការពាំនាំ និងកែប្រែកម្ពុជាឱ្យក្លាយទៅជាប្រទេសមួយដែលមានសក្ដានុពល និងរីកចម្រើននៅក្នុងយុគសម័យឌីជីថលនេះ។

រូបភាព| DMI

ស្ត្រីឆ្នើមនៅកម្ពុជាទាំង ៣ ប្រភេទដែលត្រូវបានជ្រើសរើសត្រូវតែជាក្រុមស្ត្រីកម្ពុជាដែលមានសក្ដានុពលក្នុងផ្នែកបច្ចេកវិទ្យា មានភាពជាអ្នកដឹកនាំខ្ពស់ ព្រមទាំងបានប្រើប្រាស់នូវជំនាញរបស់ខ្លួនដើម្បីបម្រើការក្នុងស្ថាប័នរបស់ខ្លួន ក៏ដូចជានៅក្នុងសហគមន៍របស់ខ្លួនរហូតមកដល់ពេលបច្ចុប្បន្ននេះ។ ក្រៅពីនេះ ពួកគាត់ក៏ត្រូវតែជាស្ត្រីកម្ពុជាដែលបានលះបង់នូវពេលវេលា និងកម្លាំងកាយចិត្តរបស់ខ្លួនដោយស្ម័គ្រចិត្ត ដើម្បីចូលរួមយ៉ាងសកម្មនៅក្នុងការចូលរួមស្វែងរកដំណោះស្រាយផ្នែកណាមួយក្នុងវិស័យបច្ចេកវិទ្យា សម្រាប់យកមកបម្រើផលប្រយោជន៍ក្នុងសង្គមកម្ពុជាជារួម។

រូបភាព| DMI

សាធារណជនអាចចូលរួមក្នុងកម្មវិធីនេះបាន ដោយស្នើបេក្ខភាព ស្ត្រីដែលលោកអ្នកគិតថាជាស្ត្រីឆ្នើមឬស្ត្រីគំរូក្នុងវិស័យនេះ។ ការស្នើបេក្ខភាពអាចធ្វើឡើងតាមប្រព័ន្ធអនឡាញ ដោយគ្រាន់តែចូលទៅក្នុងតំណភ្ជាប់ cbrd.gov.kh ទំនាក់ទំនងតាម info@cbrd.gov.kh ឬ ទូរស័ព្ទលេខៈ 023 723 121 ឬ 086 47 87 72 ។

អត្ថបទ៖ រក្សា