មិនធម្មតា! ឡាន Merces-AMG C43 នៅប្រទេសថៃចុះថ្លៃម្ដងជាង ៣ ម៉ឺនដុល្លារ

2018-02-20 04:30:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Mercedes-Benz ប្រចាំប្រទេសថៃ បានបង្ហាញចេញរថយន្ត Mercedes-AMG C 43 Coupé ប្រភេទដំឡើងក្នុងប្រទេសថៃ ដែលមានតម្លៃថោកជាងរថយន្តនាំចូលពីប្រទេសអាល្លឺម៉ង់ដល់ទៅជាង ៣ ម៉ឺនដុល្លារឯណោះ។

រថយន្តទ្វារពីរគឺជារថយន្តកំពូលល្បឿនដំបូងគេដែលដំឡើងក្នុងប្រទេសថៃ។ តម្លៃរថយន្តដែលនាំចូលពីអាល្លឺម៉ង់មានខ្ទង់ ៥,១៩ លានបាត (ប្រមាណ ១៦៥ ០០០ ដុល្លារ) ហើយប្រភេទដែលដំឡើងនៅប្រទេសថៃវិញមានតម្លៃ ៤,១៤ លានបាត (ប្រមាណ ១៣១ ៦៩០ ដុល្លារ)។

ដំឡើងនៅប្រទេសថៃមែនពិត ប៉ុន្តែម៉ាស៊ីនដែលដំណើរការរថយន្តមិនមានការផ្លាស់ប្ដូរឡើយ ពោលនៅតែប្រើម៉ាស៊ីន Twin-Turbocharged ស៊ីឡាំង ៦ ចំណុះ ៣,០ លីត្រ ផលិតកម្លាំងបាន ៣៦២ សេះ។ ប្រអប់លេខមានជាប្រភេទស្វ័យប្រវត្តិ ៩ វគ្គ 9G-Tronic និង 4Matic All-Wheel Drive (ប្រើប៉ុងពីរ)។

គួរដឹងថាកាលពីឆ្នាំកន្លងទៅក្រុមហ៊ុន Mercedes-Benz ប្រចាំថៃ បានធ្វើការដំឡើងរថយន្តម៉ូដែល Mercedes-Benz C250 Coupe ដើម្បីធ្វើឲ្យតម្លៃរថយន្តមានការថយចុះ និងដាក់សម្ពាធលើគូប្រកួតប្រជែងធំៗក្នុងប្រទេសថៃ រួមមាន Audi, BMW និង Lexus ជាដើម៕

ប្រភព៖ Bangkokpost ប្រែសម្រួល៖ សុខហេង