Bill Gates មិនទុកកេរ្តិ៍មរតកឲ្យកូនៗពេលស្លាប់ទៅ ដោយសារមូលហេតុនេះ

2018-02-22 01:26:21
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Bill Gates អ្នកបង្កើតក្រុមហ៊ុន Microsoft បានក្លាយជាបុគ្គលមានជាងគេនៅលើលោកយូរឆ្នាំមកហើយ ដោយទើបបានធ្លាក់ទៅកាន់តំណែងមហាសេដ្ឋីលេខ ២ កាលពីថ្មីៗនេះប៉ុណ្ណោះ។ គិតត្រឹមបច្ចុប្បន្នមហាសេដ្ឋីរូបនេះមានទ្រព្យសម្បត្តិសរុប ៩១,៧ ពាន់លានដុល្លារ ហើយគេដឹងថាលោកជាបុគ្គលមានចិត្តសប្បុរសបំផុត។

លោក Bill Gates និងភិរយា Melinda Gates មានកូនៗចំនួន ៣ រូបរួមមាន Jennifer អាយុ ២២ ឆ្នាំ, Phobe អាយុ ១៦ ឆ្នាំ និងកូនប្រុស Rory អាយុ ១៩ ឆ្នាំ។ បុរសវ័យ ៦២ ឆ្នាំរូបនេះជាមហាសេដ្ឋីមួយរូបស្ថិតក្នុងចំណោមមហាសេដ្ឋីជាច្រើនទៀត ដែលចង់បរិច្ចាគទ្រព្យសម្បត្តិជាច្រើនរបស់ខ្លួនទៅលើអំពើសប្បុរសធម៌។ ដូចនេះលោក មិនមែនផែនការថានឹងបន្សល់ទុកមរតកឲ្យកូនៗនោះទេ។

នៅក្នុងបទសម្ភាសន៍ជាមួយទូរទស្សន៍អង់គ្លេស នៅឆ្នាំ ២០១៦ លោក Bill Gates បានបកស្រាយអំពីការសម្រេចចិត្តរបស់ខ្លួន។ លោកបាននិយាយថា ៖ "កូនៗរបស់ពួកយើង នឹងទទួលបានការសិក្សាល្អ និងលុយមួយចំនួន ដូចនេះពួកគេនឹងមិនក្រនោះទេ ប៉ុន្តែពួកគេត្រូវតែចេញរកស៊ីចាប់ផ្ដើមមុខរបរដោយខ្លួនឯង”។

លោកបន្ថែមថា ៖ "វាជារឿងមិនល្អទេដែលក្មេងៗអាចបានលុយកាក់ច្រើនដោយមិនធ្វើអ្វីនោះ។ វារាំងស្ទះដល់សមត្ថភាពរបស់ពួកគេ ក្នុងការបង្កើតផ្លូវដើរដោយខ្លួនឯង។មហាសេដ្ឋីរូបនេះក៏បាននិយាយដែរថា កូនៗរបស់គាត់ទាំងបីសុទ្ធតែយល់ពីការសម្រេចចិត្តរបស់ឪពុក និងមានមោទនភាពដែលឪពុកយកទ្រព្យសម្បត្តិរបស់ខ្លួនទៅជួយដល់ពិភពលោក។

ចន្លោះឆ្នាំ ១៩៩៤ ដល់ពាក់កណ្ដាលឆ្នាំ ២០១៧ មហាសេដ្ឋី Bill Gates រួមនឹងភរិយាបានចំណាយទឹកប្រាក់ ៣៥ ពាន់លានដុល្លារទៅលើអំពើសប្បុរសធម៌ ដែលជួយដល់ផ្នែកសិក្សា និងសុខភាពក្នុងប្រទេសក្រីក្រ៕

ប្រភព៖ Dailymail | VNReview ប្រែសម្រួល៖ សុខហេង