បង្ហាញមុខ រដ្ឋមន្ត្រី និងឧកញ៉ាល្បីឈ្មោះ៧រូបនៅកម្ពុជា ប្រជាជនគោរពស្រលាញ់បំផុត

2018-02-25 07:41:15
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋមន្ត្រី និងឧកញ៉ាមួយចំនួនក្នុងប្រទេសកម្ពុជា កំពុងមានឈ្មោះល្បីខ្លាំងនាពេលបច្ចុប្បន្ននេះ តាមរយៈការបង្កើតសមិទ្ធធំៗជូនប្រជាពលរដ្ឋ ក៏ដូចជាអំពើសប្បុរសធម៌ជាច្រើន។ ដូច្នេះសូមមកស្គាល់រដ្ឋមន្ត្រី និងឧកញ៉ាចំនួន ៧រូបកំពុងល្បីល្បាញ ជាពិសេសនៅលើបណ្ដាញសង្គមហ្វេសប៊ុកតែម្ដង។

១. ហង់ជួន ណារ៉ុន រដ្ឋមន្ត្រីក្រសួងអប់រំ

ឯកឧត្ដម ហង់ជួន ណារ៉ុន បានចូលកាន់តំណែងជារដ្ឋមន្ត្រីក្រសួងអប់រំ យុវជន និងកីឡា កាលពីថ្ងៃទី១៣ ខែកញ្ញា ២០១៣ បន្តពីឯកឧត្ដម អឹម សិទ្ធី។ ការឡើងកាន់តំណែងរបស់ឯកឧត្ដម គឺស្របពេលដែលវិស័យអប់រំក្នុងប្រទេសកម្ពុជាកំពុងមានបញ្ហាស្មុគស្មាញជាច្រើនត្រូវដោះស្រាយ។

រដ្ឋមន្ត្រី ដែលទើបទើបទទួលគោរមងារជាបណ្ឌិតសភាចារ្យ កាលពីថ្មីៗនេះ ត្រូវមជ្ឈដ្ឋានអ្នកសិក្សាយល់ថា ជាបុគ្គលមានចំណេះដឹងខ្ពង់ខ្ពស់ និងអាចកែប្រែវិស័យអប់រំក្នុងប្រទេសកម្ពុជាឲ្យរីកចម្រើនបាន។

ឯកឧត្ដមទទួលបានការកោតសរសើរពីមហាជនគ្រប់មជ្ឈដ្ឋានក្រោយបានដាក់ចេញផែនការអប់រំចំនួន៨ចំណុចដូចជា៖ បង្កើនគុណភាព និងប្រសិទ្ធភាពសេវាអប់រំ, ពង្រឹងការគ្រប់គ្រងបុគ្គលិក, ពង្រឹងការប្រឡងគ្រប់ប្រភេទ, កែទម្រង់ឧត្ដមសិក្សា, អភិវឌ្ឍសម្រាប់យុវជននូវជំនាញបច្ចេកទេស និងជំនាញទន់, អនុវត្តកំណែទម្រង់ការគ្រប់គ្រងហិរញ្ញវត្ថុសាធារណៈ, បង្កើតធនាគារខួរក្បាលក្នុងវិស័យអប់រំ, កែទម្រង់ការអប់រំកាយ និងកីឡា។

កំណែទម្រង់ការប្រឡងមធ្យមសិក្សាទុតិយភូមិចាប់ពីឆ្នាំ២០១៤ ដោយធ្វើការរឹតបន្តឹងខ្លាំងជាប្រវត្តិសាស្ត្រ កាន់តែធ្វើឲ្យរដ្ឋមន្ត្រីរូបនេះល្បីឈ្មោះកាន់តែខ្លាំង។

២. ទេសរដ្ឋមន្ត្រី ស៊ុន ចាន់ថុល

រដ្ឋមន្ត្រីក្រសួងសាធារណការ និងដឹកជញ្ជូន ត្រូវមហាជនទទួលស្គាល់ថា ជាបុគ្គលតស៊ូក្នុងការសិក្សាមិនធម្មតាឡើយ។ ឯកឧត្ដម ស៊ុន ចាន់ថុល បានទទួលការអប់រំនៅសហរដ្ឋអាមេរិក ជាកន្លែងដែលលោកបានទទួលសញ្ញាបត្រជាន់ខ្ពស់សាកលវិទ្យាល័យ Wharton និងសាកលវិទ្យាល័យ Harvard។

ឯកឧត្តម ស៊ុន ចាន់ថុល ត្រូវបានប្រជាពលរដ្ឋគោរពស្រឡាញ់ និងត្រូវបានពលរដ្ឋលើកសរសើរថាលោកជារដ្ឋមន្ត្រីមួយរូប ដែលដើរទាន់សម័យបច្ចេកវិទ្យាទៅទីណារីកចម្រើនទីនោះ។ ជាក់ស្ដែងក្នុងរយៈពេលនេះលោកបានសម្រេចសមិទ្ធផលធំៗជាច្រើនជូនពលរដ្ឋខ្មែរដូចជាកំណែទម្រង់ទៅលើ ការចុះបញ្ជីយានយន្ត ការធ្វើប័ណ្ណបើកបរ ប័ណ្ណសម្គាល់យានយន្ត ការប្រឡងយកប័ណ្ណបើកបរ ទៅជាប្រព័ន្ធស្វ័យប្រវត្តិកម្ម ដោយមិនចាំបាច់ទៅដល់ទីតាំងឡើយ ចំណេញទាំងពេលវេលា និងថវិកា ព្រមទាំងលប់បំបាត់ការចំណាយក្រៅផ្លូវការបានយ៉ាងល្អប្រសើរទៀតផង។

ជាពិសេសក្នុងពេលបច្ចុប្បន្នលោក កំពុងសម្រុកសម្រេចសមិទ្ធផលជាច្រើនដូចជា ការតភ្ជាប់ផ្លូវដែកនានា ជួសជុល និងសាងសង់ផ្លូវថ្មីៗ ស្ពានជាច្រើនកន្លែង។ ក្នុងនោះមានសមិទ្ធផលមួយចំនួនត្រៀមដាក់ឲ្យដំណើរការមុនចូលឆ្នាំខ្មែរដូចជា៖ ផ្លូវដែកពីប្រទេសថៃមកប៉ោយប៉ែត ផ្លូវដែកពីស្ថានីយទៅព្រលានយន្តហោះអន្តរជាតិភ្នំពេញ ស្ពានអាកាសផ្សារដីហុយ ស្ពានបាឡេឫស្សីកែវ ស្ពានកោះប៉ែន ការដឹកជញ្ជូនតាមផ្លូវទឹកពីព្រែកព្នៅ-ភ្នំពេញ-តាខ្មៅ។ល។

៣. ឯកឧត្ដម ជា សុផារ៉ា

ឯកឧត្ដម ជា សុផារ៉ា រដ្ឋមន្ត្រីក្រសួងដែនដីនគរោបនីយកម្ម និងសំណង់ ត្រូវបានប្រជាពលរដ្ឋគោរពស្រលាញ់កាន់តែខ្លាំងឡើងបន្ទាប់ពីលោកអាចដោះស្រាយបញ្ហាជាប់គាំងរាប់ឆ្នាំដោះស្រាយមិនចេញ ជូនប្រជាពលរដ្ឋនៅអគាប៊ូឌីញ «ស»។ ឯកឧត្ដម បានសម្រោះសម្រួលជាមួយប្រជាពលរដ្ឋឲ្យយល់ព្រមចាកចេញពីទីនោះ តាមសន្តិវិធី ដោយផ្ដល់សំណង ១ ៤០០ដុល្លារក្នុងមួយម៉ែត្រការ៉េ។ ជាពិសេសលោកបានជប់លៀងនំបញ្ចុក ២តោន ព្រមទាំងទៅចូលរួមដោយផ្ទាល់ និងរកដំណោះស្រាយផ្សេងៗជូនពលរដ្ឋក្នុងឱកាសនោះទៀតផង។

ក្រៅពីនោះ រដ្ឋមន្ត្រីដែលត្រូវប្រជាពលរដ្ឋមួយចំនួនដាក់ឈ្មោះថា «មន្ត្រីមុខដែក» រូបនេះបានដោះស្រាយវិវាទដីធ្លីជាច្រើនកន្លែងក្នុងប្រទេសកម្ពុជា ដោយសារតែលោកមានបទពិសោធន៍ជារដ្ឋមន្ត្រីក្រសួងអភិវឌ្ឍជនបទស្រាប់ផងនោះ។

តទៅនេះសូមបង្ហាញឧកញ៉ាល្បីឈ្មោះ៤រូបផ្នែកអំពើសប្បុរសធម៌៖

១. ឧកញ៉ា គួច ម៉េងលី

ឧកញ៉ា គួច ម៉េងលី ជាស្ថាបនិក និងជានាយកក្រុមហ៊ុន Mengly J. Quach Holding ត្រូវបានគេមើលឃើញថា លោកបានចែករំលែកទាំងចំណេះដឹង ទាំងជំនាញ ដល់សង្គមវិញដោយចំណាយថវិកាផ្ទាល់ខ្លួនរាប់សែនដុល្លារ។ លោកឧកញ៉ាបានចាត់ទុក រឿងធ្វើបុណ្យ ធ្វើទាន ការចែករំលែកដល់សង្គមជាសន្ដានចិត្តសប្បុរសធម៌មាននៅក្នុងអារម្មណ៍បេះដូងរបស់លោកឧកញ៉ា។ លោកឧកញ៉ាលោកលើកឡើងថា ធ្វើល្អបានល្អ ធ្វើអាក្រក់បានអាក្រក់។

២. ឧកញ៉ា ហុង ពីវ

អ្នកឧកញ៉ា ហុង ពីវ អគ្គនាយកក្រុមហ៊ុនពិភពថ្មីគ្រុប ម្ចាស់បុរីពិភពថ្មី និងជាម្ចាស់គ្រឹះស្ថានហិរញ្ញវត្ថុពិភពថ្មី បានឧបត្ថម្ភថវិការាប់លានដុល្លារ សម្រាប់កិច្ចការងារសង្គម និងមនុស្សធម៌។ គេនៅចាំបានលោកឧកញ៉ា បានជួយទារកម្នាក់អាយុ២ខែ ដែលប្រឈមទៅនឹងការបាត់បង់កែវភ្នែក តាមរយៈការបញ្ជូនទៅព្យាបាលនៅប្រទេសសិង្ហបុរី ខណៈលោក និងក្រុមគ្រួសារទារកនោះមិនដែលស្គាល់គ្នាពីមុនមកសោះ។

សម្រាប់កិច្ចការងារក្នុងក្រុមហ៊ុនលោកតែងលើកទឹកចិត្តបុគ្គលិកដែលប្រឹងប្រែងធ្វើការ ដោយផ្ដល់នូវរង្វាន់លើកទឹកចិត្តជា ឡាន ផ្ទះ និងថវិកាយ៉ាងច្រើនសន្ធឹកសន្ធាប់។ លោកកាន់តែធ្វើឲ្យមានការចាប់អារម្មណ៍ បន្ទាប់ពីចំណាយទឹកប្រាក់ប្រមាណ ៦០ ម៉ឺនដុល្លារ ចែកជាអាំងប៉ាវដល់បុគ្គលិក ក្នុងឱកាសបុណ្យចូលឆ្នាំចិន កាលពីដើមឆ្នាំ២០១៧។

៣. ឧកញ៉ា ម៉ុង ឫទ្ធី

លោកឧកញ៉ា ម៉ុង ឫទ្ធី ជាម្ចាស់ក្រុមហ៊ុនជាច្រើន ដែលវិនិយោគលើវិស័យកសិកម្ម ត្រូវគេចាត់ទុកថាជាមនុស្សជោគជ័យលើអាជីវកម្ម និងមានទឹកចិត្តសប្បុរសធម៌ ជួយដល់ជនទីទាល់ក្រ។ លោកបានចំណាយថវិការាប់ម៉ឺនដុល្លារធ្វើកិច្ចការងារនេះ ហើយជាការតបស្នងមកវិញលោកទទួលបានការគោរពស្រលាញ់ពីមជ្ឈដ្ឋានទូទៅ។ លោកឧកញ៉ាបានលើកឡើងថា ទ្រព្យលែងជាវត្ថុចាំបាច់ទី១ ហើយសម្រាប់ជីវិតអ្នកឧកញ៉ា។ ដូច្នេះពេលរកស៊ីមានបាន គួរគិតគូរដល់អ្នកកំពុងខ្វះខាតផង។ "យើងគ្រប់គ្នាកើតមកខ្លួនទទេ ដល់ពេល ស្លាប់ទៅវិញក៏មិនអាចយកលុយទៅជាមួយបានដែរ"។

៤. ស្រី ចាន់ថន

លោកឧកញ៉ាស្រី ចាន់ថន អគ្គនាយកក្រុមហ៊ុន JET GROUP និង SKYLAND ខុនដូក៏មាននូវសកម្មភាពមនុស្សធម៌ស្ទើររាប់មិនអស់ដែរ។ លោកឧកញ៉ាតែងជួយដល់ទុរគតជន ជនគ្មានផ្ទះសម្បែង កសាងមន្ទីរពេទ្យ និងសាលារៀនជាដើម។ លោកឧកញ៉ាគឺជាសប្បុរសជនឈានមុនមួយរូប ដែលជួយឧបត្ថម្ភដល់កីឡាករកម្ពុជាជាច្រើននាក់ ពិសេសកីឡាករប្រដាល់។ ដោយមើលឃើញពីសកម្មភាពមិនអាចកាត់ថ្លៃបានអស់ទាំងនេះ កាលពីថ្ងៃទី ១៩ ខែឧសភា ឆ្នាំ២០១៧ កន្លងទៅ លោកឧកញ៉ាត្រូវបានតែងតាំងជាអនុប្រធានកិត្តិយសសហព័ន្ធកីឡាប្រដាល់គុនខ្មែរផងដែរ៕

អត្ថបទ៖ វឌ្ឍនៈ