ជំទាវ៣រូប មិនត្រឹមតែស្អាត និងមានទេពកោសល្យ ថែមទាំងជាម្តាយដ៏អស្ចារ្យ

2018-03-02 07:16:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីកម្ពុជា៣ កំពុងមានឈ្មោះបោះសម្លេងនៅក្នុងសង្គម ដែលត្រូវបានគេស្គាល់ថា អតីតសិល្បៈការិនី និងតារាបង្ហាញ និងសហគ្រិនស្រី្ត។ អ្វីដែលគួរឲ្យចាប់អារម្មណ៍ទៀតនោះ ភរិយារបស់សេដ្ឋីល្បីៗទាំង៣រូប មានសម្រស់ស្រស់ស្អាត មានទេពកោសល្យពីកំណើត និងជាម្ដាយមានព្រហ្មវិហារធម៌គួរឲ្យកោតសរសើរ។ ចង់ដឹងថា ជំទាវដ៏ស្រស់ស្អាតទាំងនេះ បានបំពេញតួនាទីជាម្ដាយដូចម្ដេចនោះ សូមអានលម្អិតខាងក្រោមនេះ៖

១. ជំទាវ ស្រីតូច ចំណាន

អតីតសិល្បៈការិនី ម៉ៅ ចំណាន ហៅ ស្រីតូច ចំណាន ទទួលបានងារជាជំទាវពេញសិទ្ធបន្ទាប់ពីរៀបអាពាហ៍ពិពាហ៍ជាមួយ អ្នកឧកញ៉ា គិត ម៉េង ប្រធានក្រុមហ៊ុន Royal Group និងជាប្រធានសភាពាណិជ្ជកម្មកម្ពុជា។ លោកជំទាវ មិនត្រឹមតែជាស្ត្រីខ្មែរមួយរូបមានសម្រស់ស្រស់ស្អាតនោះទេ រីឯក្នុងគ្រួសារលោកជំទាវជាម្ដាយសម័យថ្មីស្រឡាញ់ស្វាមី និងតែងតែក្បែរកូនៗ បង្រៀនកូនធ្វើជាមនុស្សល្អនៅក្នុងសង្គម។

ជាកស្ដែងក្នុងវីដេអូ៖ ២. ជំទាវ លី យ៉ាណា

អតីតតារាបង្ហាញម៉ូដ និងជាម្ចាស់ជយលាភី ចំណាត់ថ្នាក់លេខ២ ក្នុងកម្មវិធី «Super Model» លោកជំទាវ លី យ៉ាណា ត្រូវបានមហាជនជាច្រើនបានស្គាល់ ដោយសារតែលោកជំទាវជាភរិយារបស់ឧកញ៉ាចិត្តធម៌ ហុង ពីវ ម្ចាស់ក្រុមហ៊ុនអចលនាទ្រព្យឈ្មោះ “បុរីពិភពថ្មី” ដែលតែងតែជួយជនក្រីក្រ និងផ្ដល់ប្រាក់មូលនិធិទៅដល់មន្ទីរពេទ្យគន្ធបុប្ផាជាច្រើនលានដុល្លារកន្លងមកនេះផងដែរ។ លោកជំទាវជាម្ដាយចូលចិត្តតុបតែងខ្លួនឲ្យកូនស្រីតែមួយគត់ មានភាពទាក់ទាញក្លាយជាកុមារីឆ្លាត និងគួរឲ្យស្រឡាញ់នៅលើបណ្ដាញសង្គមហ្វេសប៊ុកទៀតផង។

(ជំទាវ លី យ៉ាណា និងកូនស្រី)

៣. ជំទាវ ដេត ម៉ាលីណា

ភរិយារបស់លោកឧកញ៉ា ឌួង ឆាយ គឺជំទាវ ដេត ម៉ាលីណា ជាស្ត្រីឆ្នើមមួយរូប កំពុងកាន់អាជីវកម្មគ្រាក់ៗជាច្រើនលើផលិតផលគ្រឿងសម្អាង និងសម្ភារៈរបស់មនុស្សស្រី ។ ក្រៅពីមើលការខុសត្រូវជំនួញ លោកជំទាវក៏ជាម្ដាយពោរពេញក្ដីស្រឡាញ់ ជាក់ស្ដែងក្នុងគ្រាដែលកូនប្រុសច្បងលោកជំទាវ ជួបបញ្ហាសុខភាពរហូតឈានដល់ការវះកាត់ ជំទាវ ម៉ាលីណា បានលះកិច្ចការជំនួញទាំងអស់ មកមើលថែកូនទាំងយប់ទាំងថ្ងៃនៅក្រៅប្រទេស៕