មិនចង់មានបញ្ហា គួរឲ្យកុមារចំណាយពេលប៉ុន្មានម៉ោងមុខកញ្ចក់ទូរទស្សន៍ ឬទូរស័ព្ទ?
- 2018-03-04 10:10:29
- ចំនួនមតិ 0 | ចំនួនចែករំលែក 0
មិនចង់មានបញ្ហា គួរឲ្យកុមារចំណាយពេលប៉ុន្មានម៉ោងមុខកញ្ចក់ទូរទស្សន៍ ឬទូរស័ព្ទ?
ចន្លោះមិនឃើញ
យោងតាមការណែនាំដែលបានចេញផ្សាយដោយសមាគមវិជ្ជាជីវៈកុមារ American Academy of Pediatrics (AAP) របស់សហរដ្ឋអាមេរិកបានដឹងថាក្មេងៗដែលមានអាយុពី ២ឆ្នាំ ទៅ ៥ ឆ្នាំ មិនគួរចំណាយពេលលើសពី១ម៉ោងក្នុង១ថ្ងៃមើលទូរទស្សន៍ Smartphone ឬ ឧបករណ៍អេឡិចត្រូនិចផ្សេងឡើយ។ នេះបើតាមការចុះផ្សាយពីសារព័ត៌មាន Time ដ៏មានប្រជាប្រិយភាព។
ចំពោះក្មេងចាប់ពីអាយុ៦ឆ្នាំឡើងទៅ ឪពុកម្តាយត្រូវប្រាកដថាពេលវេលាដែលកុមារនៅជាមួយទូរស័ព្ទស្មាតហ្វូន ហើយនិង មាតិកាដែលកុមារមើល វានឹងមិនប៉ះពាល់ដល់ម៉ោងគេង ហើយនិង សតិអារម្មណ៍កុមារ។ ប្រភពខាងលើបានបន្តថា វ័យដែលល្អបំផុតសម្រាប់កុមារគួរប្រើ Smartphone គឺចាប់ពីអាយុ១៣ឆ្នាំឡើងទៅ។
ប្រាកដណាស់ឪពុកម្តាយជាច្រើនពឹងផ្អែកលើទូរស័ព្ទ ឬ ឧបករណ៍ឌីជីថល ដើម្បីរក្សាកូនរបស់ពួកគេឲ្យនៅមួយកន្លែង នៅពេលពួកគេគ្មានពេលវេលាគ្រប់គ្រាន់ឲ្យកូន។ ប៉ុន្តែ M.C Mott ជាអ្នកជំនាញមកពីសាកលវិទ្យាល័យ Michigan បាននិយាយថាយក Smartphone ឬ ឧបករណ៍ឌីជីថលដើម្បីលួងកូនបានផ្ដល់នូវហានិភ័យ២យ៉ាង៖ ទី១ គឺការបណ្ដុះឥរិយាបថអវិជ្ជមានដល់កុមារ ពួកគេគិតថានឹងធ្វើអីចឹងទៀតដើម្បីបានទូរស័ព្ទ។ ទី២ នាំឲ្យកុមារយល់ថារាល់បញ្ហារបស់គេ មនុស្សធំជុំវិញខ្លួនអាចជួយដោះស្រាយជំនួសពួកគេបាន។
ការស្រាវជ្រាវរបស់វេជ្ជបណ្ឌិត Radesky នៃសមាគម AAP ខាងលើបានបង្ហាញថាការញៀននឹងទូរស័ព្ទស្មាតហ្វូន ឬ ឧបករណ៍ឌីជីថលរបស់កុមារនឹងធ្វើឲ្យពួកគេមានកម្រិតស្រ្តេស (stress) ខ្ពស់ ហើយ កម្រិតទំនាក់ទំនង ជាមួយឪពុកម្តាយកាន់តែទាប។
ប្រភពខាងលើបានបន្ថែមថា កំណត់ម៉ោងឲ្យកុមារប្រើប្រាស់ Smartphone ឬ ឧបករណ៍ឌីជីថល នោះនឹងធ្វើឲ្យកុមារមានពេលវេលាមកផ្តោតពីពិភពពិតរបស់សង្គមច្រើនជាង ព្រោះកុមារគឺជាវ័យកំពុងលូតលាស់ខួរក្បាល ត្រូវការពេលលេង ពេលគេង ពេលវេលារៀនសូត្រពីរបៀបគ្របគ្រងអារម្មណ៍ និង ការកសាងទំនាក់ទំនង។ ផ្ទុយទៅវិញ ឧបករណ៍អេឡិចត្រូនិចទាំងនោះនឹងធ្វើឲ្យរបបគេង ហើយនិង សុខភាពរាងកាយកុមារធ្លាក់ចុះ។
បើកុមារដាច់ខាតត្រូវការ Smartphone ឲ្យខាងតែបាន អ្នកស្រាវជ្រាវខាងលើបង្ហាញថា Sesame Street គឺជាវេបសាយអប់រំដ៏ល្អមួយ សម្រាប់ក្មេងចាប់ពីអាយុ៣ឆ្នាំឡើងទៅ វាមានទាំងវីដេអូ និង ហ្គេមកំសាន្ត។ ជាងនេះទៅទៀត ប្រភពខាងលើបានណែនាំឲ្យឪពុកម្តាយ ស្វែងយល់បន្ថែមពីការអប់រំ ថែទាំកុមារប្រកបដោយប្រសិទ្ធិភាពតាមរយៈវេបសាយ HealthyChildren.org ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
