ចេះតែមានហើយ! ជនឆ្លៀតឱកាសបន្លំជួយសង្រ្គោះ ពេលភ្លើងឆេះច្បារអំពៅព្រឹកមិញ

2018-03-16 04:10:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពពី អាជីវករផ្សារ ច្បារអំពៅប្រាប់ Sabay ឲ្យដឹងថា សមត្ថកិច្ចផ្សារច្បារអំពៅបានចាប់ជនឆ្លៀតឱកាសដែលធ្វើសកម្មភាពលួចបន្លំយកអីវ៉ាន់របស់ពួកគេក្រោមរូបភាពជួយសង្រ្គោះពេលមានអាសន្ន។

លោក ទី អាជីវករលក់គ្រឿងក្រអូបបាននិយាយថា តាំងពីភ្លើងឆេះយប់មិញមកលោកបានបាត់ផលិតផលទ្បេម៉ាកវាសាលីនគិតជាប្រាក់ប្រមាណ1000$។ <<យំមិនចេញ!ស្ដាយចង់បោកខ្លួន ខ្ញុំស្មានតែគ្នាឯង...ភ័យផង ឆេះផង ចេះតែហុចអីវ៉ាន់ចេញៗដឹង អីចោរសោះ...អស់រលីង ហើយ>> លោក ទី ប្រាប់។

លោក សុខ ប៉ូទ្បូ អ្នកលក់ចាប់ហួយ៥តូបជាប់ៗដែលត្រូវភ្លើងឆេះខ្ទេច បានឲ្យដឹងថា៖<<អស់ហើយក្មួយអើយ! ឯអីវ៉ាន់ដែលយកបានខ្លះមិនដឹងទៅណាទៅណីទេព្រោះស្លន់ពេក! ដូចយកចេញឲ្យចោរលួចបន្ត>>។

ចំណែកអ្នកស្រី សុខហ៊ាង អាជីវករលក់គ្រឿងជ័រ ស្នោបានប្រាប់ថា អ្នកស្រីមិនបានបាត់អីវ៉ែអីវ៉ាន់ច្រើនទេដោយសារនាំ គ្នីគ្នាកូនចៅមកច្រើនជួយជញ្ជូនផង និងមើលអីវ៉ាន់ផង។

ដោយឡែកម្ចាស់តូបលក់ខោអាវសុំមិនបញ្ចេញឈ្មោះនិយាយថា៖<<ខ្ញុំបានមកដល់តូបតាំងពីយប់គឺពេលភ្លើងនៅឆេះតិចៗឃើញមានអ្នកទម្លុះទម្លាយទ្វារតូបគាត់ជញ្ជូនអីវ៉ាន់ចេញយ៉ាងលឿនដោយបក្សពួកគេស្រែកថាជួយគ្នាពួកយើងមួយដៃមួយជើងម្នាក់>>។

ប្រភពពីសមត្ថកិច្ចឈរជើងនៅកន្លែងមានភ្លើងឆេះផ្សារច្បារអំពៅបាន ប្រាប់ក្រុមការងារព័ត៌មានSabay ថា សមត្ថកិច្ចកំពុងដុតដៃដុតជើងស្រាវជ្រាវតាមពាក្យបណ្ដឹងរបស់ក្រុមអាជីវករដែលមានបញ្ហាបាត់ អីវ៉ាន់។