ប្រាក់ចំណូល Box Office ប្រចាំខែមីនាឆ្នាំនេះធ្លាក់ចុះខ្លាំងធៀបនឹងឆ្នាំមុនៗ

2018-03-27 09:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយនៅសល់តែរយៈពេលមួយសប្ដាហ៍ចុងក្រោយទៀតនេះប៉ុណ្ណោះ ហូលីវូដទទួលបានភាពបរាជ័យយ៉ាងធ្ងន់ធ្ងរ ដោយសារតែភាពយន្តដែលបញ្ចេញនៅក្នុងខែនេះមិនមានលទ្ធភាពរកចំណូលបានច្រើនតាមការកំណត់។

ប្រាក់ចំណូលសរុបប្រចាំខែមីនា គិតត្រឹមថ្ងៃអាទិត្យចុងសប្ដាហ៍នេះគឺ ៧២២,៥លានដុល្លារ ធ្លាក់ចុះដល់ទៅ ២៨ភាគរយធៀបនឹងឆ្នាំមុនក្នុងពេលដដែល ដោយរកចំណូលបាន ៩៩៧,៣លានដុល្លារយោងទៅតាម ComScore។

សង្ឃឹមចុងក្រោយចំពោះចំណូលខែនេះគឺពឹងពាក់ទៅលើ ភាពយន្ត "Ready Player One” ដែលជាស្នាដៃរបស់ផលិតករភាពយន្តល្បីឈ្មោះ Steven Spielberg របស់ផលិតកម្មយក្ស Warner Bros. និង Amblin Entertainment ដាក់បញ្ចាំងនៅថ្ងៃព្រហស្បតិ៍សប្ដាហ៍នេះ។

កាលពីឆ្នាំមុនប្រាក់ចំណូលសរុបប្រចាំខែមីនាគឺដល់ទៅ ១,២ប៊ីលានដុល្លារ គិតតែនៅក្នុងស្រុក ដោយរកបានពីរឿងល្បីៗ "Beauty and the Beast” ៥០៤លានដុល្លារ "Logan” ២២៦លានដុល្លារ "The Boss Baby” ១៧៥លានដុល្លារ "Kong: Skull Island” ១៦៨លានដុល្លារ ខណៈឯចំណូលសរុបប្រចាំខែកាលពីឆ្នាំ២០១៦គឺ ៩៣៩លានដុល្លារ ប្រភពធំៗបានមកពី "Zootopia” ៣៤១លានដុល្លារ "Batman v. Superman: Dawn of Justice” ៣៣០,៤លានដុល្លារ។

ដូច្នេះប្រាក់ចំណូលប្រចាំខែនេះ ត្រូវការយ៉ាងតិចណាស់២០០លានដុល្លារទៀតទើបប្រហាក់ប្រហែលនឹងឆ្នាំចាស់ៗ។ ប្រសិនជាគ្មានជំនួយពីរឿង "Black Panther” ដែលបញ្ចេញកាលពីខែកុម្ភៈ ២០០លានដុល្លារនោះទេ ចំណូលខែនេះនឹងកាន់តែតិចខ្លាំងនឹកស្មានមិនដល់។