រាងឡូយកប់! គូប្រជែងថ្មីរបស់ Tesla នាដើមឆ្នាំ ២០១៨ ចេញមុខមកហើយ!

2018-03-29 08:59:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន SF Motors ទើបតែបញ្ចេញឡានដើរដោយថាមពលអគ្គិសនីសុទ្ធសាធរបស់ខ្លួនចំនួន ២ ម៉ូដែល គឺ SF5 និង SF7 ប៉ុន្មានម៉ោងមុននេះបន្តិច។ SF5 នឹងចាប់ទទួលការបញ្ជាទិញ នាចុងឆ្នាំ ២០១៨ នេះ រីឯ SF7 នឹងចេញលក់នាឆ្នាំក្រោយ។

ទាំងពីរម៉ូដែលគឺ SF5 និង SF7 ជាប្រភេទ Coupe UV (Coupe Utility Vehicle) មានកៅអីអង្គុយចំនួន២ជួរ ដែលទ្វារសងខាងអាចបើកបានដូចរថយន្តប្រណីត Rolls Royce អញ្ចឹង ធ្វើឲ្យពេលចេញចូលមានភាពស្រឡះល្អមិនទើសដៃទើសជើង។

រថយន្តទាំងពីរនេះ អាចមានថាមពលរហូតដល់ ១០០០ សេះឯណោះ ហើយអាចបង្កើនល្បឿនពី ០-១០០ គម/ម៉ ត្រឹមរយៈពេល ៣ វិនាទី តែប៉ុណ្ណោះ។ រាល់ការសាកពេញម្ដង រថយន្តនេះអាចបើកបរបានចម្ងាយប្រហែល ៤៨៣ គម តែខាងក្រុមហ៊ុនបានបញ្ជាក់ថា ចម្ងាយនៃការបើកបរនេះអាចដំឡើងបាន ដោយមិនមែនបន្ថែមទំហំផ្ទុកនៃថ្មឡើយ តែជាការបំពាក់ម៉ូទ័រដែលអាចសាកបញ្ចូលភ្លើង ពេលកំពុងបើកបររថយន្តឯណោះទេ។

គួរបញ្ជាក់ផងដែរថា ក្រុមហ៊ុន SF Motors បានទិញយកក្រុមហ៊ុន InEvit ដែលម្ចាស់ក្រុមហ៊ុននោះ លោក Martin Eberhard ជាអតីតអ្នកបង្កើត ក្រុមហ៊ុន Tesla ឡើងផងដែរ។ InEvit ជាក្រុមហ៊ុនដែលសិក្សាស្រាវជ្រាវលើអាគុយសម្រាប់រថយន្តអគ្គិសនី និងអភិវឌ្ឍឲ្យអាគុយទាំងនោះមានភាពប្រសើរឡើង ទាំងទំហំផ្ទុក និងការរក្សាសីតុណ្ហភាពឲ្យនៅថេរជាដើម។

ចង់ដឹងថា រថយន្ត SF5 និង SF7 របស់ SF Motors ស្អាតប៉ុណ្ណា សូមមើលរូបភាពខាងក្រោមជាមួយ Sabay ទាំងអស់គ្នា៖